កម្ពុជា នឹងទទួលធ្វើជាម្ចាស់ផ្ទះ ការប្រកួតការប្រកួតកីឡាប៊ូលីងប៉ារ៉ាជើងឯកកម្ពុជា នាអំឡុងខែ មិថុនា ឆ្នាំ២០២៤ខាងមុខនេះ ដោយមានអត្តពលិកជាជនមានពិការភាពប្រមាណជា ១០០នាក់ មកពីបណ្តាប្រទេសនានា។
លោក Leon Lim អនុប្រធានសហព័ន្ធកីឡាប៊ូលីងកម្ពុជា និងជាគ្រូបង្វឹកកីឡាប៊ូលីងមាន ប្រសាសន៍ ថា ការប្រកួតកីឡាប៊ូលីងប៉ារ៉ាជើងឯកកម្ពុជា (1st Cambodia Open Para Bowling Championship 2024)គ្រោងនឹងរៀបចំពីថ្ងៃទី២១-២៧ ខែមិថុនា ឆ្នាំ២០២៤ នៅប្រូប៊ូល (ខាលែន ឌែលម៉ល) រាជធានីភ្នំពេញដែលជាទីលានស្តង់ដារអន្តរជាតិ ។ តាមការគ្រោងទុកនឹងមានកីឡាករ កីឡាការិនី មានពិការភាពប្រមាណ ១០០នាក់ចូលរួមប្រកួតប្រជែងមេដាយ មកពីប្រទេសកូរ៉េ ម៉ាឡេស៊ី ជប៉ុន ថៃ សិង្ហបុរី និងបណ្តាប្រទេសមួយចំនួនទៀតដែលកំពុងតែពិភាក្សាគ្នា។
លោក បញ្ជាក់ទៀតថា នេះជាការទទួលធ្វើម្ចាស់ផ្ទះលើកដំបូង លើប្រភេទកីឡាប៊ូលីង សម្រាប់ជនមានពិការភាពអន្តរជាតិ នៅប្រទេសកម្ពុជា។ សម្រាប់កម្ពុជាម្ចាស់ផ្ទះ គឺត្រៀមកីឡាករកីឡាការិនីជនមានពិការភាពឆ្នើមចំនួន១០នាក់ ដើម្បីចូលរួមប្រកួតប្រជែងក្នុងព្រឹត្តិការណ៍អន្តរជាតិនេះ។ ក្នុងចំណោម១០នាក់ដែលជាកីឡាករកីឡាការិនីឆ្នើមៗនេះ នឹងជ្រើសរើសយកកីឡាករ៥នាក់ និងកីឡាការិនី៥នាក់។
អនុប្រធានសហព័ន្ធ បានគូសបញ្ជាក់បន្ថែមទៀតថា បច្ចុប្បន្នកម្ពុជាបានប្រមូលកីឡាករកីឡាការិនីជនមានពិការភាពឲ្យចូលហ្វឹកហាត់ចំនួន២០នាក់ នឹងចំរាញ់ធ្វើតេសជាបន្តបន្ទាប់រហូតចំរាញ់ជ្រើសរើសបានកីឡាករកីឡាការិនីឆ្នើមតាមគម្រោងដែលបានគ្រោងទុក។ពោលការហ្វឹកហាត់ចំរាញ់នេះ មានរយៈពេល២ខែ ឬជាង២ខែ ។
អនុប្រធានសហព័ន្ធ លោក Leon Lim ក៏បានបង្ហាញពីការប្តេជ្ញាចិត្តខ្ពស់ថា លោកនឹងប្រឹងប្រែងឱ្យអស់ពីសមត្ថភាព ដើម្បីបង្វឹកដល់កីឡាករ កីឡាការិនីកម្ពុជាឱ្យមានគុណភាពល្អ ដើម្បីចូលរួមប្រកួតប្រជែងមេដាយ ក្នុងព្រឹត្តិការណ៍អន្តរជាតិមួយនេះ ក្នុងនាមជាម្ចាស់ផ្ទះ។
លោក ឆាយ កៀក អគ្គលេខាធិការសហព័ន្ធកីឡាប៊ូលីងកម្ពុជាបានគូសបញ្ជាក់ថា គោលបំណងចម្បងនៃការរៀបចំព្រឹត្តិការណ៍អន្តរជាតិមួយនេះ ចង់ចែករំលែកបទពិសោធន៍ និងចំណេះដឹងបច្ចេកទេសជូនដល់កីឡាករ កីឡាការិនីជំនាន់ក្រោយៗឱ្យចូលរួមលេងកីឡាឱ្យបានច្រើន និងចង់ចូលរួមជួយដល់សង្គមផងដែរ។
ជាមួយនឹងការហ្វឹកហាត់របស់ក្រុមកីឡាករ កីឡាការិនីមានពិការភាពកម្ពុជា នាពេលនេះ ក៏សម្រួចគោលដៅឆ្ពោះទៅចូលរួមប្រកួតកីឡា អាស៊ានប៉ារ៉ាហ្គេម លើកទី១៣ នាឆ្នាំ២០២៥ នៅប្រទេសថៃផងដែរ។
សូមបញ្ជាក់ថា កាលពីឆ្នាំ២០២៣កន្លងទៅ កម្ពុជាធ្លាប់រៀបចំធ្វើម្ចាស់ផ្ទះ ការប្រកួតកីឡាប៊ូលីង 34th Asian Inter-City ម្តងរួចទៅ ដោយទទួលបានជោគជ័យ ហើយនៅឆ្នាំ២០២៤នេះដែរ កម្ពុជាក៏បានគ្រោងរៀបចំការប្រកួតកីឡាប៊ូលីង 1st Cambodia International Open 2024 នាខែសីហា ឆ្នាំ២០២៤ ខាងមុខផងដែរ៕
ប្រភព៖ olympiccambodia