កីឡាករ គួន ម៉ុម សមាជិករបស់សមាគមបាល់ទះវិសាខា បានផ្ទេរទៅចូលរួមជាមួយក្លិបបាល់ទះ Lavie Long An នៅប្រទេសវៀតណាម (ក្នុងលក្ខខណ្ឌខ្ចីជើង) ជាលើកទី២ ដើម្បីចូលរួមប្រកួតប្រជែងក្នុងពានរង្វាន់បាល់ទះ ជើងឯកថ្នាក់ជាតិ ជុំទី១ ឆ្នាំ២០២៤។
ថ្ងៃនេះសារព័ត៌មានត្រយង សូមជម្រាបជូនប្រិយមិត្តអំពីកម្មវិធីប្រកួតរបស់កីឡាករ គួន ម៉ុម នៅក្លិបបាល់ទះ Long An ជើងទី១ រួមមានដូចជា៖
- នៅថ្ងៃទី៣១ ខែមីនា ឆ្នាំ២០២៤ Lavie Long An ប៉ះ Sanest Khánh Hòa ម៉ោង ៥:០០រសៀល
- នៅថ្ងៃទី១ ខែមេសា ឆ្នាំ២០២៤ Lavie Long An ប៉ះ Danang ម៉ោង ២:០០រសៀល
- នៅថ្ងៃទី២ ខែមេសា ឆ្នាំ២០២៤ Lavie Long An ប៉ះ LP Bank Ninh Binh ម៉ោង ៨:០០យប់
- នៅថ្ងៃទី៥ ខែមេសា ឆ្នាំ២០២៤ Lavie Long An ប៉ះ Ha Tinh ម៉ោង ៥:០០រសៀល
- នៅថ្ងៃទី៦ ខែមេសា ឆ្នាំ២០២៤ Lavie Long An ប៉ះ Thể Công ម៉ោង ៨:០០យប់។
គួន ម៉ុម បច្ចុប្បន្នមានវ័យ២៦ ជាកីឡាករដែលមានបទពិសោធន៍ខ្លាំងរបស់កម្ពុជា ដោយរូបគេធ្លាប់បានចេញទៅប្រកបអាជីពនៅប្រទេសឥណ្ឌូណេស៊ី នៅឆ្នាំ២០២០ កន្លងទៅជាមួយក្រុម Garuda Jakarta ក្នុងរដ្ឋធានីហ្សាកាតា។ យ៉ាងណាក្ដីកីឡាករូបនេះដុះចេញពីក្រុមបាល់ទះក្រសួងមហាផ្ទៃចន្លោះឆ្នាំ២០១៥ ដល់២០១៨ មុនផ្ទេរចូលរួមជាមួយក្រុមវិសាខា ពីឆ្នាំ២០១៨ រហូតដល់បច្ចុប្បន្ន។
កីឡាករដែលមានកម្ពស់ ១.៩៨ម៉ែត្ររូបនេះ បានជាប់ឈ្មោះក្នុងក្រុមជម្រើសជាតិកម្ពុជា តាំងពីឆ្នាំ២០១៩ ដល់បច្ចុប្បន្ន ស្របពេលរូបគេគឺជាតួសំខាន់ជួយឱ្យបាល់ទះបុរសក្នុងសាលរបស់កម្ពុជា ឈ្នះមេដាយសំរឹទ្ធិ ព្រឹត្តិការណ៍កីឡាស៊ីហ្គេមលើកទី៣១ នៅប្រទេសវៀតណាម និងមេដាយប្រាក់ ស៊ីហ្គេមលើកទី៣២ នៅរាជធានីភ្នំពេញ។
បច្ចុប្បន្នកីឡាករ គួន ម៉ុម គឺជាកីឡាករខ្មែរទី២ ដែលផ្លាស់ទៅប្រកបអាជីពបាល់ទះនៅក្រៅប្រទេស បន្ទាប់ពីកីឡាករ វឿន វាសនា ដែលកំពុងប្រកបអាជីពនៅលីគបាល់ទះតៃវ៉ាន់ Enterprise Volleyball League៕
