ការប្រកួតជម្រើសជើងឯក Cambodian League 2 រដូវកាល ២០២៣-២៤ បានឈានដល់សប្ដាហ៍ចុងក្រោយហើយ ដោយនៅថ្ងៃអាទិត្យ ទី៣១ ខែមីនានេះ គឺជាប្រកួតដណ្ដើមជើងឯករវាង សមាគមកីឡាបាល់ទាត់ក្រសួងមហាផ្ទៃ ប៉ះ ក្លិបបាល់ទាត់ឡាយហ្វ ខេត្តព្រះសីហនុ នៅកីឡដ្ឋាន បណ្ឌិត្យសភានគរបាលកម្ពុជា វេលាម៉ោង ៣:៤៥ នាទីរសៀល។
គួរឱ្យដឹងផងដែរថាការប៉ះគ្នា២ប្រកួតកន្លងទៅ ម្ចាស់ផ្ទះសមាគមកីឡាបាល់ទាត់ក្រសួងមហាផ្ទៃ មិនទាន់ស្គាល់ពាក្យថាឈ្នះក្លិបបាល់ទាត់ឡាយហ្វ ខេត្តព្រះសីហនុ នោះទេ ដោយជើងទី១ ក្រសួងមហាផ្ទៃ ចាញ់ ឡាយហ្វ ២ទល់០ និង ជើងទី២ ក្រសួងមហាផ្ទៃ បន្ដចាញ់ ក្លិបបាល់ទាត់ឡាយហ្វ ១ទល់០ ទៀត។
សម្រាប់ម្ចាស់ជើងឯកពានរង្វាន់លីគទី២ គិតចាប់តាំងពីបង្កើតឡើងមកមាន ឆ្នាំ២០១៦ បានទៅក្រុមគីរីវង់សុខសែនជ័យ ឆ្នាំ២០១៧ បានទៅក្រុមវិសាខា ឆ្នាំ២០១៨និង២០១៨ មិនមានការរៀបចំនោះទេ ហើយនៅឆ្នាំ២០២០ ជើងឯកបានទៅក្រុមព្រៃវែងអែហ្វស៊ី ឆ្នាំ២០២១ បានទៅក្រុមយុវជនសាលាបាល់ទាត់ជាតិបាទី និងឆ្នាំ២០២២ នេះជើងឯកបានទៅក្រុមអគ្គីសនីកម្ពុជា៕
