ក្លិបបាល់ទាត់ឡាយហ្វ ខេត្តព្រះសីហនុ នឹងធ្វើការដង្ហែពានរង្វាន់ជ័យលាភីលេខ១ នៃពានរង្វាន់ជម្រើសជើងឯកកម្ពុជាលីគ២ នៅតាមទីតាំងសំខាន់ៗចំនួន៩ ក្នុងខេត្តព្រះសីហនុ។
ក្លិបបាល់ទាត់ឡាយហ្វ នឹងមានការដង្ហែរពាននេះ គឺដើម្បីជាការថ្លែងអំណរគុណដល់អ្នកគាំទ្រទាំងអស់នៅខេត្តព្រះសីហនុ ដែលតែងតែគាំទ្រដល់ក្លិបចាប់តាំងពីចូលរួមប្រកួតប្រជែងពានរង្វាន់លីគទី២ កម្ពុជា។ ពិធីដង្ហែពាននេះ នឹងចាប់ពីម៉ោង ៣:៣០នាទី រសៀល ដល់ ម៉ោង ៦:០០នាទី ល្ងាច នៅថ្ងៃទី០២ ខែមេសា ឆ្នាំ២០២៤។
សម្រាប់ទីតាំងសំខាន់ៗ ដែលនឹងត្រូវដង្ហែឆ្លងកាត់មានដូចខាងក្រោម៖
១.កីឡដ្ឋានឡាយហ្វ (Life Stadium)
២.ស្តុបប្រេងឥន្ធនៈតូតាល់ ចំណោតរ៉ា (Total Energies Traffic Stop)
៣.វេទិកា៧មករា (January 7 Forum)
៤.រង្វង់មូលត្រីដាវ (Swordfish Circle)
៥.រមណីយដ្ឋាន (Blue Bay Resort)
៦.ផ្សារ (Prince Mall Sihanoukville)
៧.រង្វង់មូលតោ២ (Lion Roundabout 2)
៨.តំបន់អូរឈើទាល (Ou Chhateul Area)
៩.ទីលានតេជោ (ពយតាមូង) (Techo Field – Poy Tamong)
សម្គាល់៖ នៅទីតាំងចុងក្រោយ នឹងផ្តល់ឱកាសឲ្យមហាជនបានថតរូបជាមួយនិងពាន ព្រមទាំងក្រុមរបស់ក្លិបបាល់ទាត់ឡាយហ្វ ខេត្តព្រះសីហនុ!
សូមបញ្ជាក់ថា ក្លិបបាល់ទាត់ឡាយហ្វខេត្តព្រះសីហនុ បានក្លាយជាម្ចាស់ជើងឯក ក្នុងការប្រកួតលីគទី២ របស់កម្ពុជា Cambodian League 2 រដូវកាល ២០២៣-២៤ ក្នុងនាមជាក្រុមដែលមានពិន្ទុច្រើនជាងគេ ដោយបានបញ្ចប់ការប្រកួតនៅវគ្គផ្ដាច់ព្រ័ត្រក្នុងលទ្ធផល ៤-៤ ជាមួយសមាគមកីឡាបាល់ទាត់ក្រសួងមហាផ្ទៃ នៅកីឡដ្ឋាន បណ្ឌិត្យសភានគរបាលកម្ពុជា នៅថ្ងៃអាទិត្យ ទី៣១ ខែមីនា ឆ្នាំ២០២៤៕
