នាយកប្រតិបត្តិនៃសហភាពសហគមន៍ ព្រះវិហារមានជ័យ លោក អឿ សំអាត បានចែករំលែកបទពិសោធន៍នៃការធ្វើកសិកម្មតាមកិច្ចសន្យាថា កសិកម្មប្រភេទនេះ បានផ្ដល់នូវគុណសម្បត្តិយ៉ាងច្រើនដល់កសិករ។ គុណសម្បត្តិទាំងនោះរួមមាន៖
ធានាបានថា កសិករបង្កបង្កើនផលកសិកម្មស្របទៅតាមតម្រូវការទីផ្សារ ត្រង់ចំណុចនេះ តាមរយៈការចងក្រងជាសហគមន៍ ឬក្រុមសហគមន៍ តំណាងសហគមន៍នឹងមានឱកាសជួបចរចាជាមួយក្រុមហ៊ុនរកស៊ីលើផលិតផលកសិកម្មដោយផ្ទាល់ មិនចាំបាច់មានឈ្មួញកណ្ដាល ហើយពួកគាត់អាចពិភាក្សាគ្នាអំពីទិសដៅតម្រូវការ ទំហំតម្រូវការ តម្លៃ និងលក្ខន្តិកផ្សេងៗ ដើម្បីធ្វើកិច្ចសន្យារវាងតំណាងសហគមន៍កសិកម្ម និងពាណិជ្ជករ។
ធានាបាននូវស្ថិរភាពតម្លៃ តាមរយៈការចុះកិច្ចសន្យាជាមួយពាណិជ្ជករ កសិករនឹងមិនចាំបាច់បារម្ភអំពីគម្លាតនៃការឡើងចុះតម្លៃទិន្នផលកសិកម្មទេ។ ខុសពីទីផ្សារឈ្មួញកណ្ដាល ដែលឡើងចុះតាមរដូវកាល និងឱកាសនិយម។
មានទិសដៅ និងផែនការក្នុងការបង្កបង្កើនផលច្បាស់លាស់ មិនផ្សងព្រេងផ្សងសំណាង និងមិនខ្ជះខ្ជាយកម្លាំង ពូជ ជី និងដើមទុន។ ការណ៍នេះបានន័យថា កាលណាសហគមន៍កសិកម្មធ្វើកិច្ចសន្យាជាមួយពាណិជ្ជករ ពួកគាត់នឹងទទួលបាននូវមតិយោបល់ និងការណែនាំផ្សេងៗ ពីមជ្ឈដ្ឋានពាក់ព័ន្ធ ដើម្បីឲ្យកសិករធ្វើការបង្កបង្កើនផលស្របទៅតាមផែនការកំណត់។
កសិករមានឱកាសទទួលបានការគាំទ្រពីក្រុមហ៊ុនដៃគូនៃកិច្ចសន្យា និងស្ថាប័នពាក់ព័ន្ធផ្សេងៗទៀត លើផ្នែកបច្ចេកទេសដាំដុះ ថែទាំ និងដោះស្រាយលើបញ្ហាប្រឈមនានា។ លើសពីនេះកសិករក៏អាចនឹងទទួលភាគលាភបន្ថែមលើកសិផលរបស់ពួកគាត់ផងដែរ។
លោក អឿ សំអាត ន្ថែមថា ជាក់ស្ដែង កសិករនៃសហភាពសហគមន៍របស់លោក ដែលផ្ដោតទៅលើការដាំដុះដំណាំកសិកម្មសរីរាង្គ មិនប្រើធាតុចូលខាងក្រៅ មានជី និងថ្នាំគីមីកសិកម្មជាដើម ពួកគាត់ត្រូវបានលើកទឹកចិត្តពីខាងពាណិជ្ជករ ដោយទទួលបានកម្រៃបន្ថែម ២៤០ ០០០រៀល ឬ៦០ដុល្លារ ក្នុងមួយតោន លើតម្លៃដើមនៃទិន្នផល។ ឧទាហរណ៍ថា ស្រូវសរីរាង្គរបស់គាត់ ១តោន មានតម្លៃ ១ ០០០ ០០០ រៀល ដូច្នេះ កសិករនឹងទទួលបាន ១ ២៤០ ០០០ រៀល។
នាយកប្រតិបត្តិនៃសហភាពសហគមន៍ ព្រះវិហារមានជ័យ បញ្ជាក់ថា ក្រៅតែពីអត្ថប្រយោជន៍ ដែលកសិករទទួលបាន ភាគីខាងក្រុមហ៊ុនពាណិជ្ជកម្ម ដែលរកស៊ីលើផលិតផលកសិកម្ម និងជាដៃគូនៃកិច្ចសន្យា ក៏ទទួលបាននូវអត្ថប្រយោជន៍ផងដែរ។ តាមរយៈធ្វើកសិកម្មតាមកិច្ចសន្យា ពាណិជ្ជករធានាបានថា ពួកគាត់នឹងទទួលបានកសិផលដែលមានប្រភពច្បាស់លាស់ បទដ្ឋានគុណភាពស្របតាមតម្រូវការ ដោយសារការបង្កបង្កើនផល ធ្វើទៅតាមលក្ខន្តិកៈកំណត់។ មួយវិញទៀត ការផ្គត់ផ្គង់ផលិតផលកសិកម្មពីកសិករ គឺជាលក្ខណៈបណ្ដុំ និងបំពេញតាមចំនួនត្រូវការ។
បើយោងតាមប្រធានមន្ទីរកសិកម្ម រុក្ខា ប្រមាញ់ និងនេសាទ ខេត្តព្រះវិហារ លោក ពឹង ទ្រីដា បច្ចុប្បន្ននេះ ដើម្បីធានាបាននូវស្ថិរភាពតម្លៃ និងចំណូលបន្ថែម ព្រមទាំងអត្ថប្រយោជន៍ជាច្រើនទៀតនៃកសិកម្មប្រជាកសិករខេត្តព្រះវិហារបានចងក្រងជាសហគមន៍បាន ៤៣ សហគមន៍ មានប្រមាណជាង១ម៉ឺនគ្រួសារ ក្នុងនោះសហគមន៍ចំនួន ៣៣ បានចុះកិច្ចសន្យាជាមួយក្រុមហ៊ុនឯកជន ដើម្បីផលិតកសិផលសរីរាង្គ។
លោក គង់ ពិសិដ្ឋ ប្រធានការិយាល័យចុះបញ្ជី និងជំរុញសហគមន៍កសិកម្ម នៃនាយកដ្ឋានអភិវឌ្ឍសហគមន៍កសិកម្ម លើកឡើងថា កសិកម្មកិច្ចសន្យាអាចធ្វើទៅបានលុះត្រាតែកសិករចងក្រងគ្នាជាសហគមន៍ ដែលមានទំហំផ្ទៃដីបង្កបង្កើនផលធំ ផលិតបានច្រើន។
យោងតាមលោក គង់ ពិសិដ្ឋ គិតត្រឹមដើមឆ្នាំ ២០២៤ នេះ សហគមន៍កសិកម្ម ដែលបានចុះបញ្ជីទទួលស្គាល់ដោយមន្ទីរកសិកម្មរាជធានីខេត្ត មានចំនួន ១២៤៥ សហគមន៍ ក្នុងនោះសហភាពសហគមន៍កសិកម្មមានចំនួន ២១។ ប៉ុន្តែក្នុងចំណោម ២១ សហភាពសហគមន៍កសិកម្មនេះ មានតែ ៣ ប៉ុណ្ណោះដែលក្នុងនោះមាន ២៥៨ សហគមន៍ កំពុងដំណើរការទៅដោយភាពល្អប្រសើរ គឺ សហភាពសហគមន៍កសិកម្មព្រះវិហារមានជ័យ ខេត្តព្រះវិហារ សហភាពសហគមន៍គ្រឿងទេស ខេត្តត្បូងឃ្មុំ និងសហភាពសហគមន៍បន្លែសុវត្ថិភាព ខេត្តបាត់ដំបង។
អត្ថបទ៖ ឈិន ធារ៉ាត់
