សិល្បៈជាតិ៖ មួយរយៈនេះអ្នកលេងបណ្ដាញសង្គមបានបញ្ចេញទស្សនៈច្រើននៅពេលមានការបង្ហោះរូបភាពរាំញ័រញាក់របស់ក្មេងៗ ពិសេសក្មេងៗស្រី រហូតធ្វើឱ្យកើតមានជាគំនិតវិភាគ និង វាយតម្លៃទាបចំពោះអ្នកទាំងអស់នោះ ប៉ុន្តែលោក ឆឹម សក្កដា បែរជាបញ្ចេញនូវការយល់ឃើញខុសពីអ្នកលេងបណ្ដាញសង្គមទូទៅ។
តារាសម្ដែងរូបនេះបានលើកឡើងថា៖ «កុំទាន់វាយតំលៃមនុស្សលើការរាំ! ពេលខ្លះបទប្រពៃណីក៏គេរាំ តែអ្នកថតមិនថតផុស ព្រោះផុសអត់អ្នកlikeដូចបទញាក់! ពួកយើងក៏ធ្លាប់រាំ គួរតែយល់ពីការសប្បាយតាមបទភ្លេង! ពេលវ័យផ្លាស់ប្ដូរ ចរិតក៏ផ្លាស់ប្ដូរ!» បន្ថែមដោយ Comment ខាងក្រោមផុសនោះទៀតថា៖ «អ្នកខ្លះក្នុងវង់រាំលះសាហាវ តែចរិតក្រៅឡើងសុភាព! អ្នកខ្លះទើបមានបានតិចតួចដៀលគេ ភ្លេចខ្លួនកាលនៅក្មេងស្លុយសាហាវ អ្នកខ្លះដើរតែដៀលគេទំពាំងស្អុយ តែខ្លួនឯងជាមេរោគធំ….ត្រូវចាំថាកុំទាន់មើលងាយមនុស្ស អ្នកខ្លះពីក្មេងមិនសូវៗ ធំឡើងឧកញ៉ាព្រៀត….មនុស្សភាគច្រើនធ្លាប់ឆ្លងកាត់យុវវ័យភាព គួរតែយល់ហើយ។»
ការលើកឡើងរបស់លោកនេះ ត្រូវបានអ្នកលេងបណ្ដាញសង្គម យល់ស្រប ដោយអ្នកខ្លះបាននិយាយថា យើងមិនអាចវាយតម្លៃមនុស្សតែសំបកក្រៅនោះឡើយ៕
