ជារឿងរ៉ាវដ៏សែនសោកសៅមួយសម្រាប់តារាសម្ដែងស្រីល្បីឈ្មោះកញ្ញា Poklook Funthip ដែលបានប្រកាសនៅថ្ងៃទី២២ ខែសីហា នេះថាអ្នកម្ដាយដែលបានសំរាកព្យាបាលនៅមន្ទីរពេទ្យជាង៣ខែកន្លងមកនេះបានទទួលអនិច្ចកម្មហើយកាលពីរាត្រីទី២១ ខែសីហា ឆ្នាំ២០២១ កន្លងទៅ។
អ្នកម្ដាយរបស់តារាសម្ដែងរូបនេះបានដួលបោកក្បាលនឹងឥដ្ឋបណ្ដាលឱ្យបាត់ដង្ហើម រហូតក្លាយជាអាការៈ Coma នឹងត្រូវវះកាត់បូមឈាមដែលស្ទះក្នុងខួរក្បាលចេញ បន្ទាប់មកក៏សំរាកព្យាបាលនៅក្នុងមន្ទីរពេទ្យរហូតមក។ ទីបំផុតមច្ចុរាជបានឆក់យកជីវិតរបស់អ្នកម្ដាយរបស់តារាល្បីរូបនេះ ទាល់តែបានទោះជា Poklook ទើបតែចេញមកប្រកាសសុំចែកផ្លូវពីគូស្នេហ៍តារាសម្ដែងឯកដ៏ល្បីរបស់ថៃ Mike មកនៅត្រឹមជាមិត្តភក្ដិដើម្បីចំណាយពេលវេលាមើលថែរក្សាព្យាបាលអ្នកម្ដាយឱ្យបានពេញទំហឹង និងមិនចង់ឱ្យខាងប្រុសមកលំបាកកើតទុក្ខជាមួយខ្លួននិងគ្រួសារ។
Poklook បានផុសនៅលើ Instagram របស់ខ្លួនថា៖ «អ្នកម៉ាក់បានលាចាកលោកនេះទៅយ៉ាងស្ងប់សុខហើយកាលពីយប់មិញ… សូមអនុញ្ញាតប្រើបណ្ដាញសង្គមផ្ដល់ជូនជាព័ត៌មានដល់គ្រប់ៗគ្នាដែលស្គាល់អ្នកម៉ាក់ កម្មវិធីបុណ្យ នឹងជម្រាបជូនលម្អិតម្ដងទៀត គ្រួសារយើងខ្ញុំសូមអរគុណចំពោះសាច់ញាតិ មិត្តភក្ដិ ដែលបានផ្ដល់ជាកម្លាំងចិត្ត និងអធិដ្ឋានដើម្បីឱ្យអ្នកម៉ាក់មានសុខភាពល្អឡើងវិញរហូតមក សូមអរគុណអស់ពីដួងចិត្ត»។
ក្រោយសេចក្ដីប្រកាសរឿងរ៉ាវសោកសៅរបស់តារាស្រីរូបនេះត្រូវបានបង្ហោះនៅលើបណ្ដាញសង្គម មានបងប្អូន មិត្តភក្ដិ ទាំងក្រៅនិងក្នុងរង្វង់សិល្បៈបានចូលមក Comment លើកទឹកចិត្តនិងរំលែកទុក្ខយ៉ាងច្រើន៕
