សិល្បៈជាតិ៖ នេះជាលើកទីមួយហើយដែល មានការសម្ដែងទំរង់សិល្បៈល្ខោននិយាយនៅក្នុងរាជបណ្ឌិត្យសភាកម្ពុជា ហើយអ្វីដែលកាន់តែអស្ចារ្យជាងនោះគឺវត្តមានបវរកញ្ញាតំណាងប្រទេសកម្ពុជានៃកម្មវិធី Universal Woman Pageant កញ្ញា Brianna ចូលរួមសម្ដែងផងដែរ។
បើតាមសេចក្ដីប្រកាសពីរាជបណ្ឌិត្យសភាកម្ពុជា នៅលើទំព័រហ្វេសប៊ុករបស់ខ្លួនបានឱ្យដឹងថា នឹងមានការសម្ដែងល្ខោននិយាយរឿង «នេះមិនមែនសុបិន្ត» នៅសាលាមហោស្រពខេមរវិទូនៃរាជបណ្ឌិត្យសភាកម្ពុជា ដែលរឿងនេះមានការចូលរួមសម្ដែងពីសិល្បករ-សិល្បការនីពោរពេញដោយបទពិសោធនិងសមត្ថភាពក្នុងវិស័យល្ខោននិយាយនៅកម្ពុជា ដូចជា លោក ណេន ភារិទ្ធ និងកញ្ញា កែវ សុផានិត។
ក្រៅពីវត្តមានសិល្បករជំនាញៗផ្នែកល្ខោននិយាយហើយនោះវត្តមានរបស់ បវរកញ្ញា Brianna Mai,3rd Runner-up កម្មវិធីសម្រស់ស្រ្តីជាសកល (Universal Woman Pageant) ក៏បានចូលរួមសម្តែងជាអប្សរាស ក្នុងឈុតឆាកមួយនៅក្នុងរឿងនេះ ក៏កំពុងធ្វើឱ្យសាធារណជនមានការចាប់អារម្មណ៍ជាខ្លាំងផងដែរ។
បវរកញ្ញានៅក្នុងកម្មវិធីសម្រស់ស្រ្តីជាសកល (Universal Woman Pageant) ដែលជាកូនកាត់ខ្មែរ-អាមេរិក ម្ចាស់តំណែង 3rd Runner-up ក្រៅពីប្រកួតតំណាងឱ្យជាតិលើឆាកអន្តរជាតិទទួលបានលទ្ធផលល្អហើយនោះកញ្ញាក៏ជាគ្រូរបាំ និងជាអ្នករបាំនៅក្នុងសមាគមអង្គរបែនគ្រុបនៃទីក្រុង ឡូវែល មួយរូបដែរ។
អ្វីដែលកាន់តែពិសេសនៃល្ខោននិយាយ «នេះមិនមែនសុបិន្ត» គឺបានឆ្លុះបញ្ចាំងឱ្យឃើញយ៉ាងច្បាស់ពីភាពដ៏មហស្ចារ្យនៃរបាំអប្សរារបស់ខ្មែរ តាមរយៈការចូលសម្តែងពី ក្រុមសិល្បៈឥសីវ៉ូលេ ដែលពោរពេញដោយភាពល្បីល្បាញនៅក្នុងវិស័យសិល្បៈនាពេលបច្ចុប្បន្ន។
សម្រាប់បងប្អូនដែលជាប់ភារកិច្ចមិនអាចទៅទស្សនាផ្ទាល់បាន អាចតាមដានការសម្ដែងរឿងនេះ តាមរយៈគេហទំព័រហ្វេសប៊ុកនៃរាជបណ្ឌិត្យសភាកម្ពុជា និងគេហទំព័រមជ្ឈមណ្ឌលបណ្តុះបណ្តាលនិងស្រាវជ្រាវ។
សូមជំរាបជូនថា ល្ខោននិយាយរឿង «នេះមិនមែនសុបិន្ត» គឺជាស្នាដៃនិពន្ធដោយ កញ្ញា ហ៊ួត សុខកន្និដ្ឋា ណែនាំសាច់រឿងនិងដឹកនាំដោយលោកបណ្ឌិត ហង្ស រិទ្ធីរ៉ាវុធ ប្រឹក្សាអត្ថបទនិងណែនាំការដឹកនាំរឿងដោយលោក ណេត ភារិទ្ធ រួមសម្ដែងដោយក្រុមសិល្បៈអង្គរ Angkor Dance Troupe នៃទីក្រុងឡូវែល។
