ប៉ូលិសបាននិយាយថា យ៉ាងហោចណាស់មនុស្ស ៤នាក់ត្រូវបានសម្លាប់នៅក្នុងហេតុការណ៍ផ្ទុះរោងចក្រដ៏ធំមួយនៅឯក្រុមហ៊ុនគីមីមួយកន្លែងនៅក្នុងសង្កាត់ Sangareddy នៃរដ្ឋ Telangana កាលពីថ្ងៃពុធ នេះ ខណៈមនុស្ស ១៦នាក់ផ្សេងទៀតបានរងរបួសក្នុងហេតុការណ៍នោះ។ នេះបើយោងតាមការចេញផ្សាយដោយសារព័ត៌មាន India Today នាថ្ងៃព្រហស្បតិ៍ ទី៤ ខែមេសា ឆ្នាំ២០២៤។
បើតាមប៉ូលីសក្នុងតំបន់ បានឱ្យដឹងថា ហេតុការណ៍ផ្ទុះនេះកើតឡើងនៅម៉ោងប្រហែល ៥នាទីល្ងាច ថ្ងៃពុធ ទី៣ ខែមេសា ខណៈកម្មករប្រមាណ ២០នាក់ កំពុងធ្វើការនៅក្រុមហ៊ុនឱសថ SB Organics នេះ។
បើតាមសាក្សីបានប្រាប់ឱ្យដឹងថា ការផ្ទុះនេះកើតឡើងនៅពេលដែលគេលាយសារធាតុគីមី។ យ៉ាងណាម៉ិញ ប៉ូលិសមិនទាន់បញ្ជាក់លម្អិតអំពីអ្នកស្លាប់ និងចំនួនអ្នកបាត់ខ្លួននៅក្នុងហេតុការណ៍ នៅឡើយទេ។
ទន្ទឹមនោះប្រមុខរដ្ឋ Telangana លោក Revanth Reddy បានទៅពិនិត្យប្រតិបត្តិការជួយសង្គ្រោះ និងបានស្នើឱ្យមន្ត្រីធានាឱ្យបាននូវជំនួយផ្នែកវេជ្ជសាស្រ្តឱ្យបានត្រឹមត្រូវ។
លោក បានបញ្ជាឲ្យមន្ត្រីជំនាញពន្លត់អគ្គិភ័យ ពន្លឿនប្រតិបត្តិការជួយសង្គ្រោះជាបន្ទាន់ ហើយលោកក៏បានណែនាំដល់អាជ្ញាធរក្នុងតំបន់ ផ្តល់ការថែទាំព្យាបាលដល់អ្នករបួសក្នុងឧបទ្ទវហេតុនេះផងដែរ។
ទោះបីជាយ៉ាងណា ក្រុមអ្នកកាសែតមិនអាចទាក់ទងជាមួយក្រុមហ៊ុនខាងលើ ដើម្បីសុំការអត្ថាធិប្បាយបាននៅឡើយទេ ខណៈការស៊ើបអង្កេតនឹងចាប់ផ្ដើមឆាប់ៗនេះ៕