ក្រុមបាល់ទាត់ជម្រើសជាតិម៉ុងហ្គោលី នឹងធ្វើដំណើរមកកាន់ទឹកដីកម្ពុជា ដើម្បីសាកជើងជាមួយក្រុមគោព្រៃកម្ពុជា នាដើមខែមិថុនា ឆ្នាំ ២០២៤ខាងមុខនេះ ក្នុងជំនួបមិត្តភាពអន្តរជាតិ។
នេះក៏ជាការប្រកួតក្នុងដីលើកដំបូងក្នុងឆ្នាំ២០២៤ ដែលសហព័ន្ធកីឡាបាល់ទាត់កម្ពុជា នឹងរៀបចំការប្រកួតមិត្តភាពអន្តរជាតិ “Vattanac International Friendly Match” រវាងក្រុមជម្រើសជាតិកម្ពុជា ប្រកួតជាមួយក្រុមជម្រើសជាតិម៉ុងហ្គោលី នៅថ្ងៃសុក្រ ទី៧ ខែមិថុនា ឆ្នាំ២០២៤ ខាងមុខនេះ នាវេលាម៉ោង ១៨:៣០នាទី នៅពហុកីឡដ្ឋានជាតិ។
ងាកមកតារាងចំណាត់ថ្នាក់ពិភពលោក (FIFA Ranking) គិតត្រឹមថ្ងៃទី៥ ខែមីនា ឆ្នាំ២០២៤ កម្ពុជាធ្លាក់ទៅឈរចំណាត់ថ្នាក់លេខ១៧៩ ក្រោយបរាជ័យ ២ប្រកួតជួបៗគ្នានៅ FIFA Series 2024។ ដោយឡែកសម្រាប់ ក្រុមម៉ុងហ្គោលី វិញ ស្ថិតនៅចំណាត់ថ្នាក់លេខ ១៩១ ថយចុះ ១ចំណាត់ថ្នាក់បើធៀបនឹងខែមុន ដូចកម្ពុជាដែរ។
គួរបញ្ជាក់ថា ជំនួបមិត្តភាពនេះ ក៏ជាការបើកអោយអ្នកទាំងចូលអង្គុយទស្សនាជាលើកដំបូងក្រោយពេលសហព័ន្ធកីឡាបាល់ទាត់កម្ពុជា បានបំពាក់កៅអីមានបង្អែកថ្មី ដែលស្របតាមស្តង់ដាគោលការណ៍ FIFA និង AFC នៅពហុកីឡដ្ឋានជាតិ រួចរាល់ជាស្ថាពរ ហើយទីតាំងនេះ អាចផ្ទុកទស្សនិកជន ចូលរួមទស្សនាសរុបចំនួន ៣០,០០០នាក់៕