ក្រុមបាល់ទាត់វិសាខា សមាជិកពានរង្វាន់លីគកំពូលកម្ពុជា Metfone Cambodian Leagueបានប្រកាសចែកផ្លូវជាមួយកីឡាករជម្រើសជាតិអាហ្វហ្គានីស្ថាន Mustafa Zazai នៅដំណាច់ជើងទី១ ដូចកាលឆ្នាំ២០២១ នេះ។ នេះបើតាមការជូនដំណឹងរបស់ក្លិបនៅព្រឹកថ្ងៃចន្ទ ដើមសប្ដាហ៍នេះ។
ក្លិបវិសាខា បានបញ្ជាក់នៅលើហ្វេសប៊ុកផ្លូវការថា៖«ពួកយើងទាំងអស់គ្នា សូមអរគុណកីឡាករ Mustafa Zazai សម្រាប់ការខិតខំប្រឹងប្រែងជួយក្លិបរបស់យើងកន្លងមក។ តាងនាមគ្រួសារបាល់ទាត់វិសាខា សូមជូនពរ ZAZAI ជួបតែសំណាងល្អ និងទទួលបានជោគជ័យក្នុងអាជីពនាថ្ងៃអនាគត»។
ការចែកផ្លូវជាមួយកីឡាករប្រជាជាតិអាស៊ីមួយនេះគឺស្របពេលដែលវិសាខា មានកីឡាករអាស៊ីមួយរូបទៀតគឺ Lee Jae-gun ជាជនជាតិកូរ៉េខាងត្បូង ស្របពេលដែលក្លិបបានបន្ថែមខ្សែប្រយុទ្ធជនជាតិប្រេស៊ីល Cristian Alex ដែលបានចូលជំនួសកីឡាករអង់គ្លេស Charlie Machell ចាកចេញទៅលីគកំពូលម៉ាឡេស៊ី។
អត្ថបទពាក់ព័ន្ធ៖ខ្សែប្រយុទ្ធកូរ៉េខាងត្បូងថ្មីរបស់វិសាខា និយាយពីដំណើរមកប្រកបអាជីពលើកដំបូងនៅកម្ពុជា
ចំណែកម្សិលមិញនេះក្រុមវិសាខា បានប្រកួតឱ្យប្រធានក្រុម ង៉យ ស្រ៊ីន ខ្ចីជើងទៅក្រុមខេត្តព្រៃវែង ហើយកីឡាករ ផុន តៃនិញ ទៅក្លិបអគ្គីសនីកម្ពុជា ខ្ចីជើងផងដែរក្នុងជើងទី២នេះ។
ចំពោះការផ្ទេរកីឡាករជាតិ (Transfer Window 2) សម្រាប់ជុំទី២ នេះនឹងពន្យារពេលពីថ្ងៃទី ២០ ខែសីហា ទៅថ្ងៃទី១០ ខែកញ្ញា ឆ្នាំ២០២១វិញ។ ដោយឡែកចំពោះការផ្ទេរកីឡាករអន្តរជាតិ គណៈកម្មការប្រកួតបាល់ទាត់ជាតិកម្ពុជា នឹងរក្សាកាលបរិច្ឆេទថ្ងៃទី២០ ខែសីហា ឆ្នាំ២០២១ ឱ្យនៅដដែល។
សូមបញ្ជាក់ថាក្លិបនីមួយៗក្នុងលីគកំពូលកម្ពុជា អាចធ្វើការដោះដូរកីឡាកររបស់ខ្លួនក្នុងជើងទី២ នេះបានចំនួន៥នាក់ ដែលក្នុងនោះមានកីឡាករខ្មែរចំនួន៣នាក់ និងកីឡាករបរទេសចំនួន២នាក់ផងដែរ៕
អត្ថបទពាក់ព័ន្ធ៖៥សំនួរជាមួយលោក Colum Curtis ក្រោយក្រុមវិសាខា ឈរកំពូលតារាងបណ្ដោះអាសន្ន
