សិល្បៈជាតិ៖ កាលពីថ្ងៃទី៧ ខែមេសា ឆ្នាំ២០២៤ កម្មវិធីសង្ក្រាន្តខ្មែរនៅកូរ៉េ បានរៀបចំឡើងចំនួន ៣ទីតាំងនៅសាធារណរដ្ឋកូរ៉េ ដែលមានសហគមន៍ខ្មែរចូលរួមប្រមាណ ៣០៥០នាក់។
កម្មវិធី នេះអាចប្រព្រឹត្តទៅបានក្រោយកិច្ចសហការរវាងក្រសួងការងារ និង បណ្ដុះបណ្ដាលវិជ្ជាជីវៈ ជាមួយនឹង ស្ថានឯកអគ្គរាជទូតនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េ ក្រុមការងារ ESEA និងសមាគមខ្មែរក្នុងសាធារណរដ្ឋកូរ៉េ។ កម្មវិធីនេះរៀបចំនៅ៣ទីតាំងខុសៗ ក្នុងនោះរួមមានតំបន់ក្វាងជូ មានសហគមន៍ខ្មែរចូលរួមប្រមាណ ២០០០នាក់ តំបន់អ៊ុលសាន មានសហគមន៍ខ្មែរចូលរួមប្រមាណ ១០០០នាក់ និងតំបន់ថេហ្គូ មានសហគមន៍ខ្មែរចូលរួមប្រមាណ១០០នាក់។ ទន្ទឹមគ្នានេះ ពលរដ្ឋខ្មែរនៅតំបន់ផ្សេងៗទៀត ដូចជា តំបន់គីមផូ តំបន់ប៊ូឆន់ និងកោះជេជូ ក៏រៀបចំកម្មវិធីនេះដូចគ្នាដែរ។
ការប្រារព្ធកម្មវិធីបុណ្យជាតិនេះ ស្ថិតក្រោមស្មារតីជាតិនិយមរបស់បងប្អូនខ្មែរ ដែលចង់រក្សានូវទំនៀមទំលាប់ប្រពៃណីដ៏ល្អផូរផង់របស់ដូនតាខ្មែរ។ កម្មវិធីនោះមានរៀបចំពិធីសានា ទៅតាមប្រពៃណីទំនៀមទំលាប់ព្រះពុទ្ធសាសនាខ្មែរ និងលេងល្បែងប្រជាប្រិយនានា ដូចជា៖ បោះអង្គញ់ ចោលឈូង ទាញព្រ័ត្រ លាក់កន្សែង និងរាំលេងកម្សាន្ដ ប្រកបដោយបរិយាកាសស្និទ្ធស្នាល សប្បាយរីករាយ និងសាមគ្គីភាពស្រាលាញ់រាប់អានគ្នាដូចបងប្អូនរួមផ្ទៃតែមួយ។
បន្ថែមពីនេះ បងប្អូនខ្មែរនៅកូរ៉េ ក៏មិនអាចភ្លេចបាននូវការរៀបចំកម្មវិធីដាក់បង្ហាញម្ហូបអាហារខ្មែរ ផលិតផលខ្មែរជាច្រើន ដូចជានំអន្សម នំគម ម្រេចខ្មែរ សម្លៀកបំពាក់ប្រពៃណីខ្មែរ ដើម្បីឱ្យអ្នកចូលរួមទស្សនា កម្សាន្ត និងស្វែងយល់ពីវប្បធម៌និងអរិយធម៌ខ្មែរដ៏ផូរផង់ រួមផ្សំជាមួយនឹងកម្មវិធីអាហារសាមគ្គីរួមគ្នា ក្រោយពីបញ្ចប់កម្មវិធីផងដែរ ។ សូមបញ្ជាក់ផងដែរថា កម្មវិធីធំនៃ “សង្ក្រាន្តខ្មែរនៅកូរ៉េ” នឹងរៀបចំនៅថ្ងៃទី២១ ខែមេសា ឆ្នាំ២០២៤ ដោយមានការចូលរួមពីសំណាក់សិល្បករល្បីៗពីប្រទេសកម្ពុជា និងបន្តសហការរៀបចំនៅតាមតំបន់នានានៅសប្តាហ៍បន្តបន្ទាប់ទៀតរហូតដល់ចុងសប្តាហ៍ទី៤ នៃខែមេសា ឆ្នាំ២០២៤ ខាងមុខនេះ៕