សិល្បៈជាតិ៖ ទើបតែចេញផ្សាយក្ដៅៗកាលពីថ្ងៃទី៧ ខែមេសា ឆ្នាំ២០២៤ កំពូលតារាចម្រៀងសំនៀងផ្អែមស្រទន់ អ្នកនាង មាស សុខសោភា បានចេញបទចម្រៀង «តប់» វាយលុកចូលទីផ្សារ ក្នុងឱកាសបុណ្យចូលឆ្នាំថ្មីប្រពៃណីជាតិ មហាសង្ក្រាន្ត ២០២៤។ ជាការកត់សម្គាល់លើសពីអត្ថន័យ គុណភាព នៃបទចម្រៀង ហ្វេនៗមានការចាប់អារម្មណ៍ជាពិសេសចំពោះវត្តមានតួឯកប្រុសរូបសង្ហាទំរង់មុខកូនកាត់ ហ្វីលីពីន រឹម ហាក់ហេង។
បើចាំមិនខុស អ្នកនិយមគាំទ្រវិស័យប្រកួតសម្រស់ប្រាកដជាស្គាល់តួឯកប្រុសរបស់អ្នកនាង មាស សុខសោភា ខាងលើនេះយ៉ាងច្បាស់ ព្រោះ រឹម ហាក់ហេង មានតំណែងជាលំដាប់រងទីមួយ នៃកម្មវិធីប្រកួតសម្រស់ផ្នែកបុរស Mister Friendship Cambodia 2023 ហើយបុរសសង្ហាដដែលនេះ មុនពេលចូលប្រកួត ក៏ធ្លាប់ផ្ទុះនូវប្រជាប្រិយភាពខ្លាំងដែរ បន្ទាប់ពីមានសារព័ត៌មានក្នុងស្រុកមួយបានទៅសម្ភាសន៍លោក និយាយអំពីផ្កាក្រដាស នាទិវាបុណ្យនៃក្ដីស្រលាញ់។
សម្រាប់ MV គុណភាព បទ «តប់» នេះ ឃើញថាមានសន្ទុះគាំទ្រយ៉ាងច្រើន ពីហ្វេនៗរបស់អ្នកនាង មាស សុខសោភា ចាប់តាំងពីបានបង្ហោះផ្សព្វផ្សាយកាលពីព្រឹកថ្ងៃអាទិត្យ ទី៧ ខែមេសា មកដល់ត្រឹមថ្ងៃទី៨ ខែមេសា មានចំនួនទស្សនា (Views) 55K។