វិសាខា ភ្នំពេញក្រោន ព្រះខ័នរាជស្វាយរៀង និងបឹងកេត គឺជាក្រុមទាំង ៤ដែលអាចឡើងមកកាន់វគ្គពាក់កណ្ដាលផ្ដាច់ព្រ័ត្រពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤ ស្របពេលដែលនៅលីគកំពូលកម្ពុជា ក្រុមទាំង ៤នេះក៏បានកក់កៅអី Top 4 រួចរាល់ហើយដែលបើទោះជានៅសល់មួយប្រកួតទៀត។
ដោយឡែកសម្រាប់ពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤ ក្រុមទាំង ៤នឹងត្រូវជួបគ្នា នៅវគ្គពាក់កណ្តាលផ្តាច់ព្រ័ត្រជើងទី២ ថ្ងៃទី១០ ខែមេសា ស្អែកនេះ ដោយព្រះខ័នរាជស្វាយរៀង ប៉ះ បឹងកេត នៅកីឡដ្ឋាន ស្វាយរៀង វេលាម៉ោង ១៨:០០នាទីល្ងាច និង ភ្នំពេញក្រោន ប៉ះ វិសាខា នៅកីឡដ្ឋាន ស្មាត អអេសអិន វេលាម៉ោង ១៨:០០នាទីល្ងាច។
រំលឹកថា នៅវគ្គពាក់កណ្ដាលផ្ដាច់ព្រ័ត្រក្នុងជំនួបជើងទី១ កន្លងមកព្រះខ័នរាជស្វាយរៀង បានយកឈ្នះបឹងកេត ៣-១ ខណ:ភ្នំពេញក្រោន ស្មើជាមួយវិសាខា ២-២ នៅវគ្គពាក់កណ្ដាលផ្ដាច់ព្រ័ត្រ ជើងទី១ នៃពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤។
ជំនួបទាំង២ ជើងនេះក្រុមដែលមានគ្រាប់បាល់ច្រើននឹងត្រូវឡើងជួបគ្នានៅវគ្គផ្ដាច់ព្រ័ត្រ នៅថ្ងៃទី២៨ ខែមេសា ឆ្នាំ២០២៤ ដើម្បីដណ្ដើមជើងឯក នៃពានរង្វាន់បាល់ទាត់សម្តេចតេជោ ហ៊ុន សែន (Hun Sen Cup) លើកទី១៧ រដូវកាល ឆ្នាំ២០២៣-២៤ ថ្នាក់ជាតិ។
ខាងក្រោមនេះគឺជា អតីតម្ចាស់ជើងឯកដែលនៅសល់ក្នុងវគ្គ៨ក្រុមចុងក្រោយមានដូចជា៖
១) ព្រះខ័នរាជស្វាយរៀង ធ្លាប់ឈ្នះ៤សម័យកាល (២០១១,២០១២,២០១៥,២០១៧)
២) វិសាខា ធ្លាប់ឈ្នះ៣សម័យកាល (២០២០,២០២១,២០២២)
៣) ភ្នំពេញក្រោន ធ្លាប់ឈ្នះ២សម័យកាល (២០០៨,២០០៩)
៤) ណាហ្គាវើល ធ្លាប់ឈ្នះ១សម័យកាល (២០១៣)
៥) បឹងកេត ធ្លាប់ឈ្នះ១សម័យកាល (២០១៩)
ចំណែកក្រុមខេមរាកីឡា ដែលធ្លាប់ឈ្នះជើងឯកកាលពីរដូវកាលទី១ ក្នុងឆ្នាំ២០០៧ កន្លងទៅបានរំសាយក្លិបបាត់ទៅហើយ៕
