ព្រះខ័នរាជស្វាយរៀង នឹងត្រូវបើកទ្វាកីឡដ្ឋានស្វាយរៀង ដើម្បីទទួលក្រុមបឹងកេត ក្នុងជំនួបជើងទី២ នៃពានរង្វាន់បាល់ទាត់សម្តេចតេជោ ហ៊ុន សែន (Hun Sen Cup) លើកទី១៧ រដូវកាល ឆ្នាំ២០២៣-២៤ ថ្នាក់ជាតិ នៅល្ងាចនេះ ចាប់ពីម៉ោង ៦:០០នាទីល្ងាចតទៅ។
ជុំវិញការប៉ះគ្នានៅជើងទី២នេះ លោក Pep Munos គ្រូបងបង្វឹកព្រះខ័នរាស្វាយរៀង បានលើកឡើងថា៖ វាអាចជាការប្រកួតយុទ្ធសាស្ត្រមួយ។ បឹងកេតទើបតែរក្សាបានតំណែង ក្រុមកំពូលទាំង ៤នៅក្នុង លីគកាលពីអាទិត្យមុន ហើយពួកគេកំពុងតែលេង ស៊ីចង្វាក់គ្នាបានយ៉ាងល្អ។ ពួកគេបង្ហាញពីគុណភាពនៃការលេងរបស់គេ រៀងរាល់ការប្រកួត ហើយយើងបានដឹង យើងត្រូវតែលេងការលេងឲ្យបាន ល្អដើម្បីទទួលបានជោគជ័យ។
ពានរង្វាន់សម្តេច ហ៊ុន សែន គឺពិតជាពិសេសណាស់សម្រាប់យើង ហើយក្រុមមានការតាំងចិត្តខ្ពស់ដើម្បីថ្ងៃនេះ។ វគ្គពាក់កណ្តាលផ្តាច់ព្រ័ត្រ ជាវគ្គដែលតានតឹងខ្លាំង យើងត្រូវតែបង្ហាញពីមហិច្ចតារបស់យើង និងភាពជឿជាក់ ហើយនឹងគោលបំណងទៅកាន់វគ្គផ្ដាច់ព្រ័ត្រ។ ពួកយើងចង់ផ្តល់ជូនជ័យជំនះ មួយផ្សេងទៀតជូនអ្នកគាំទ្ររបស់យើងនៅក្នុងដី។
វិសាខា ភ្នំពេញក្រោន ព្រះខ័នរាជស្វាយរៀង និងបឹងកេត គឺជាក្រុមទាំង ៤ដែលអាចឡើងមកកាន់វគ្គពាក់កណ្ដាលផ្ដាច់ព្រ័ត្រពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤។ ខណ:មួយគូទៀត នៅល្ងាចនេះ វិសាខា ប៉ះភ្នំពេញក្រោន នៅកីឡដ្ឋាន ស្មាតអអេសអិន។
ជំនួបទាំង២ ជើងនេះក្រុមដែលមានគ្រាប់បាល់ច្រើននឹងត្រូវឡើងជួបគ្នានៅវគ្គផ្ដាច់ព្រ័ត្រ នៅថ្ងៃទី២៨ ខែមេសា ឆ្នាំ២០២៤ ដើម្បីដណ្ដើមជើងឯក នៃពានរង្វាន់បាល់ទាត់សម្តេចតេជោ ហ៊ុន សែន (Hun Sen Cup) លើកទី១៧ រដូវកាល ឆ្នាំ២០២៣-២៤ ថ្នាក់ជាតិ។
រំលឹកថា នៅវគ្គពាក់កណ្ដាលផ្ដាច់ព្រ័ត្រក្នុងជំនួបជើងទី១ កន្លងមកព្រះខ័នរាជស្វាយរៀង បានយកឈ្នះបឹងកេត ៣-១ ខណ:ភ្នំពេញក្រោន ស្មើជាមួយវិសាខា ២-២ នៅវគ្គពាក់កណ្ដាលផ្ដាច់ព្រ័ត្រ ជើងទី១ នៃពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤៕
