ក្រុមបាល់ទាត់ភ្នំពេញក្រោន ក្រោមការដឹកនាំរបស់លោក Oleg Starynskyi បានកក់កៅអីទៅវគ្គផ្តាច់ព្រ័ត្រ ជាលើកដំបូងនៃរយៈពេល ១៤ឆ្នាំ ក្រោយយកឈ្នះលើក្រុមវិសាខា នៅជើងទី២ដោយលទ្ធផល ៤-១ សរុបទាំងពីរជើង ៦-៣ កាលពីរាត្រីថ្ងៃទី១០ ខែមេសា ឆ្នាំ២០២៤ កន្លងទៅ ក្នុងកីឡដ្ឋាន Smart RSN ។
បើនិយាយឱ្យស៊ីជម្រៅបន្តិច ក្រុមបាល់ទាត់ភ្នំពេញក្រោន ខកខានឡើងទៅជុំផ្តាច់ព្រ័ត្រ អស់រយៈពេល ១៤ឆ្នាំហើយ ខណៈពានរង្វាន់ជើងឯកថ្នាក់ជាតិមួយនេះ បានបង្តើតឡើងនៅឆ្នាំ២០០៧ ពោលគឺមានអាយុកាល១៧ឆ្នាំ។
មុនខកខានឡើងទៅវគ្គផ្តាច់ព្រ័ត្រ ក្រុមបាល់ទាត់ភ្នំពេញក្រោន បានគ្រងជើងឯកពានរង្វាន់សម្តេចតេជោ បានចំនួន២រដូវកាលរួចទៅហើយក្នុងនោះឈ្នះជើងឯកឆ្នាំ២០០៨ និងនៅឆ្នាំ២០០៩ ពោលគឺ២ឆ្នាំជាប់ៗគ្នាតែម្តង។
ទាំងនេះគឺជាប្រវត្តរបស់ក្រុមភ្នំពេញក្រោន ចាប់ពីឆ្នាំ២០១០ មកដល់ឆ្នាំ២០២៤៖
ក្រោយមកនៅឆ្នាំ២០១០ ក្រុមភ្នំពេញក្រោន ចាញ់ក្រុមកងយោធនពលខេមរភូមិន្ទ ដោយលទ្ធផល ២-៣ នៅវគ្គផ្តាច់ព្រ័ត្រ កាលពីថ្ងៃទី៧ ខែកុម្ភៈ ឆ្នាំ២០១០។
ឆ្នាំ២០១១ ក្រុមភ្នំពេញក្រោន ចាញ់ក្រុមបៀលប្រាយយូណាយធីត វគ្គ៨ក្រុមចុងក្រោយ ដោយលទ្ធផល ៧-៦។
នៅឆ្នាំ២០១២ ក្រោមភ្នំពេញក្រោន ធ្លាក់ត្រឹមវគ្គ៨ក្រុមចុងក្រោយ ដោយថ្វីជើងព្រះខ័នរាជស្វាយរៀង ដោយគ្រានោះចាញ់ដោយលទ្ធផល ៤-០ កាលពីថ្ងៃទី៨ ខែកុម្ភៈ ឆ្នាំ២០១២ ដែលការប្រកួតនោះធ្វើនៅកីឡដ្ឋានស្តាតចាស់។
ឆ្នាំ២០១៣ ក្រោមភ្នំពេញក្រោន ធ្លាក់ត្រឹមវគ្គ៤ក្រុមចុងក្រោយ បន្ទាប់ពីចាញ់ក្រុមទ័ព ដោយបាល់កាត់ក្តី១១ម៉ែត្រ ក្រោយស្នើគ្នា ១-១ ពេញ៩០នាទី និងម៉ោងបន្ថែម ហើយក្រោមភ្នំពេញក្រោន បានត្រឹមលេខ៣ ក្រោយឈ្នះគិរីវង្សសុខសែនជ័យ ដោយលទ្ធផល ៣-០។
ឆ្នាំ២០១៤ ក្រោមភ្នំពេញក្រោន ធ្លាក់ត្រឹមវគ្គ៨ក្រុមចុងក្រោយ ដោយថ្វីជើង ក្រុមបៀលប្រាយយូណាយធីត ដោយលទ្ធផល ១-០ កាលពីថ្ងៃទី៥ ខែមិនា ឆ្នាំ២០១៤ ដែលការប្រកួតនោះធ្វើនៅកីឡដ្ឋានស្តាតចាស់។
ឆ្នាំ២០១៥ ក្រោមភ្នំពេញក្រោន ធ្លាក់ត្រឹមវគ្គ៨ក្រុមចុងក្រោយ ដោយថ្វីជើងព្រះខ័នរាជស្វាយរៀង ដោយលទ្ធផល ៤-១ កាលពីថ្ងៃទី១ កុម្ភៈ ឆ្នាំ២០១៥ នៅកីឡដ្ឋានខេត្តស្វាយរៀង ។
ឆ្នាំ២០១៦ ក្រោមភ្នំពេញក្រោន បានត្រឹមលេខ៣ ប៉ុណ្ណោះ ក្រោយចាញ់ក្រុមព្រះខ័នរាជស្វាយរៀង នៅវគ្គ៨ក្រុមចុងក្រោយ ដោយបាល់កាត់ក្តី១១ ម៉ែត្រ ក្រោយស្នើគ្នា ០-០ ពេញ៩០នាទី និងម៉ោងបន្ថែម តែឈ្នះ ក្រុមCMAC នៅវគ្គដណ្តើមយកលេខ៣ ដោយលទ្អផល ១-០ ដែលការប្រកួតនោះធ្វើឡើងនៅពហុកីឡដ្ឋានជាតិ។
ឆ្នាំ២០១៧ ក្រោមភ្នំពេញក្រោន ធ្លាក់ត្រឹមវគ្គ៨ក្រុមចុងក្រោយ ដោយថ្វីជើងណាហ្គាវើលដ៍ ក្រោយចាញ់ទាំងពីរជើង សរុបលទ្ធផល ៣-១ ដោយកាលពីជើងទី១ ភ្នំពេញក្រោន ចាញ់ណាហ្គាវើលដ៍ ២-១ និងជើងទី២ ០-១។
ឆ្នាំ២០១៨ ក្រោមភ្នំពេញក្រោន ធ្លាក់ត្រឹមវគ្គ៨ក្រុមចុងក្រោយ ក្រោយចាញ់ក្រុមអង្គរថាយហ្គឺរ យ៉ាងមិនគួរឱ្យជឿរ នៅវគ្គបាល់កាត់ក្តី១១ម៉ែត្រ ៣-៤ បន្ទាប់ពីស្មើគ្នាទាំងពីរជើង ៤-៤ ។
ឆ្នាំ២០១៩ ក្រោមភ្នំពេញក្រោន ធ្លាក់ត្រឹមវគ្គ៤ក្រុមចុងក្រោយ ក្រោមថ្វីជើងក្រោម ព្រះខ័នរាជស្វាយរៀង ដោយបាល់កាត់ក្តី១១ម៉ែត្រ ៥-៤ ក្រោយស្មើគ្នា ០-០ ពេញ៩០នាទី និងម៉ោងថែម ។
នៅឆ្នាំ២០២០ ក្រោមភ្នំពេញក្រោន ធ្លាក់ត្រឹមវគ្គពាក់កណ្តាលផ្តាច់ព្រ័ត្រ ក្រោមថ្វីជើងក្រុមណាហ្គាវើលដ៍ នៅវគ្គបាល់កាត់ក្តី១១ ម៉ែត្រ ដោយលទ្ធផល ៣-១ ក្រោយស្នើគ្នា ០-០។
ឆ្នាំ២០២១ ក្រោមភ្នំពេញក្រោន ធ្លាក់ត្រឹមវគ្គពាក់កណ្តាលផ្តាច់ព្រ័ត្រ ក្រោយចាញ់ក្រុមព្រះខ័នរាជស្វាយរៀង ដោយគ្រានោះស្វាយរៀង យកឈ្នះដោយលទ្ធផល ៣-២ ហើយក្រុមភ្នំពេញក្រោន បន្តចាញ់បឹងកេត ដោយលទ្ធផល ២-០ នៅវគ្គដណ្តើមយកលេខ៣។
ឆ្នាំ២០២២ ក្រោមភ្នំពេញក្រោន ធ្លាក់ត្រឹមវគ្គពាក់កណ្តាលផ្តាច់ព្រ័ត្រ ក្រោយចាញ់ក្រុមវិសាខា ទាំងពីរជើងដោយលទ្ធផល ៤-២ ដោយកាលពីជើងទី១ វិសាខា ឈ្នះ២-១ ជើងទី២ វិសាខា បន្តឈ្នះ២-១ ទៀត។
ពេលនេះឆ្នាំរដូវកាលឆ្នាំ២០២៣-២៤ ក្រុមភ្នំពេញក្រោន បានយកឈ្នះលើក្រុមវិសាខា ដោយលទ្ធផលវាយបក ៤-១ សរុបទាំងពីរជើង៦-២។
ដូចនេះក្រុមភ្នំពេញក្រោន នឹងត្រូវប៉ះក្រុមណដែលឈ្នះជើងឯកច្រើនជាងគេព្រះខ័នរាជស្វាយរៀង នៅថ្ងៃទី២៨ ខែមេសា ឆ្នាំ២០២៤ ខាងមុខ ខណៈក្រុមវិសាខា ត្រូវប៉ះបឹងកេត ដើម្បីដណ្តើមយកចំណាត់ថ្នាក់លេខ៣។
សូមបន្ថែមថា ក្រុមព្រះខ័នរាជស្វាយរៀង មានឱកាសបន្តងារជាក្រុមឈ្នះពានរង្វាន់នេះបានច្រើនជាងគេ ខណៈគិតត្រឹមពេលនេះធ្លាប់ឈ្នះជើងឯកបាន៤លើកហើយ គឺនៅឆ្នាំ២០១១,២០១២,២០១៥,២០១៧។
ទាំងព្រះខ័នរាជស្វាយរៀង និងភ្នំពេញក្រោន សុទ្ធតែស្ថិតក្នុងបញ្ជីក្រុមវ័យចំណាស់ជាងគេនៅពានរង្វាន់ បើបូកទាំងណាហ្គាវើល, ខ.ភ.ម និង ក្រសួងមហាផ្ទៃ៕