ឆ្នាំនេះខេត្តព្រៃវែង បានរៀបចំសង្រ្កាន្ដឆ្នាំថ្មី ដើម្បីស្វាគមន៍ភ្ញៀវទេសចរជាតិ-អន្តរជាតិ មកទស្សនា និងលេងកម្សាន្ដក្នុងព្រឹត្តិការណ៍ «សង្រ្កាន្ដព្រៃវែង២០២៤» នៅទីរួមខេត្ត ដែលនឹងប្រព្រឹត្តទៅចាប់ពីថ្ងៃទី១២ ដល់ថ្ងៃទី១៦ ខែមេសា ឆ្នាំ២០២៤ ខាងមុខនេះ។ ក្រៅពីនោះ លោកអ្នកអាចឆ្លៀតទៅលេងកម្សាន្ដនៅទីតាំងល្បីៗ ប្រចាំខេត្តផងដែរ។
បើទៅលេងខេត្តព្រៃវែងក្នុងឱកាសបុណ្យចូលឆ្នាំថ្មីប្រពៃណីជាតិ កុំរំលងកន្លែងកម្សាន្ដល្បីៗ ៣ទីតាំង ប្រចាំខេត្ត។
១. ចុងប៉មកន្លែងមើលថ្ងៃលិចស្អាតបំផុត
ជាទីកន្លែងដែលអាចអង្គុយមើលសម្រស់ថ្ងៃលិចស្អាតបំផុត រួមទាំងមានខ្យល់អាកាសបរិសុទ្ធ។ លើសពីនេះលោកអ្នកអាចទៅទស្សនារោងទូក«ង» វែងជាងគេលើពិភពលោក ដែលមានប្រវែងជាង ១០០ម៉ែត្រ ត្រូវបានគេប្រសិទ្ធនាមថា «កម្ពោជិកបុត្តាខេមរាតរី» បានជាប់កំណត់ត្រាពិភពលោក World Guinness Record នៅថ្ងៃទី១២ ខែវិច្ឆិកានេះ បន្ទាប់ពីបានដាក់ឲ្យបង្ហាញខ្លួននៅលើដងទន្លេរបស់កម្ពុជា នៅទីប្រជុំជនអ្នកលឿងត្រើយខាងកើត។ ពិធីបំបែកកំណត់ត្រាពិភពលោកនេះ បានធ្វើឡើងក្រោមអធិបតី សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ និងលោក Pravin Patel គណកម្មាធិការវិនិច្ឆ័យមកពីអង្គការ World Guinness Record។
២. ឈើកាច់បាភ្នំ
បាភ្នំជារមណីយដ្ឋានទេសចរណ៍ប្រវត្តិសាស្ត្រដែលមានសក្ដានុពលជាងគេបំផុតនៅខេត្តព្រៃវែង។ អ្នកប្រវត្តិសាស្ត្រអះអាងថា ទីនេះជាទឹកដីរាជធានីខ្មែរដំបូងបង្អស់ដែលមានឈ្មោះថា «នគរភ្នំ ឬហ៊្វូណន» ក្នុងរជ្ជកាលព្រះបាទ ហ៊ុន ទៀន នាសតវត្សទី១។ បរិយាកាសធម្មជាតិ ខ្យល់បរិសុទ្ធ ព្រៃឈើ និងវាលស្រែពណ៌ខៀវស្រងាត់ជាផ្នែកមួយទាក់ទាញភ្ញៀវមកកម្សាន្តទីនោះ។ លក្ខណៈពិសេសមួយទៀតគឺ រមណីយដ្ឋាននគរភ្នំជាតំបន់ស័ក្ដិសិទ្ធិ ហើយប្រជាពលរដ្ឋក្នុងតំបន់នោះតែងតែរៀបចំពិធីឡើងអ្នកតាមេសរ ជារៀងរាល់ឆ្នាំដើម្បីសុំសេចក្តីសុខ និងការពារប្រជាពលរដ្ឋទាំងអស់នៅក្នុងភូមិ។
៣. បឹងស្នេហ៍
ជាតំបន់ដែលមានសត្វស្លាបជាច្រើនប្រភេទរាប់សិបម៉ឺនក្បាល ដែលហោះជាក្រុមៗមកទំជ្រកនៅព្រៃលិចទឹករាល់ល្ងាចនៅបឹងស្នេហ៍ ហើយតំប់នេះបានក្លាយជាទិដ្ឋភាពយ៉ាងស្អាតបែបធម្មជាតិជាមួយនឹងសំឡេងស្រែកឆ្លើយឆ្លងកងរំពងលាន់ឮពេញព្រៃលិចទឹកទំហំ ៨០ហិកតា ធ្លាយដល់ផ្ទៃជលសារបឹងស្នេហ៍ជាង ២ពាន់ហិកតា ដែលព័ទ្ធជុំវិញព្រៃនោះ។
ក្រៅពីតំបន់ទាំងនោះលោកអ្នកក៏អាចទៅលេងកម្សាន្ដតំបន់រមណីយដ្ឋានជាច្រើនកន្លែងទៀតផងដែរ លើសពីនេះអាចវិលត្រឡបមកលេងល្បែងប្រជាប្រិយ រាំលេងកម្សាន្ដ ទស្សនាការតាំងពិព័ណ៌នៅទីរួមខេត្តនាឱកាសបុណ្យចូលឆ្នាំ២០២៤នេះផងដែរ៕
