យោងតាមការបញ្ជាក់របស់សហព័ន្ធកីឡាបាល់ទាត់របស់ប្រទេសម៉ុងហ្គោលី បានបង្ហោះកាលពីពេលថ្មីៗកន្លងទៅ សម្រាប់ជំនួបមិត្តភាពអន្តរជាតិ រវាងក្រុមបាល់ទាត់ជម្រើសជាតិម៉ុងហ្គោលី និងក្រុមបាល់ទាត់ជម្រើសជាតិកម្ពុជា នឹងត្រូវធ្វើឡើងចំនួន ២ជើង ក្នុងខែតែមួយ ខណៈ សហព័ន្ធកីឡាបាល់ទាត់កម្ពុជា ប្រកាសតែការជួបគ្នានៅពហុកីឡដ្ឋានជាតិ រាជធានីភ្នំពេញ ប៉ុណ្ណោះ។
ដោយការប្រកួតនៅជើងទី១ ក្រុមបាល់ទាត់ជម្រើសជាតិម៉ុងហ្គោលី នឹងធ្វើដំណើរមកកាន់ទឹកដីកម្ពុជា ដើម្បីសាកជើងជាមួយក្រុមគោព្រៃកម្ពុជា នាថ្ងៃទី៧ ខែមិថុនា ឆ្នាំ ២០២៤ខាងមុខនេះ ក្នុងជំនួបមិត្តភាពអន្តរជាតិ។
ខណ:ការប្រកួតនៅជើងទី២ ក្រុមបាល់ទាត់ជម្រើសជាតិកម្ពុជា នឹងត្រូវធ្វើដំណើរទៅកាន់ទឹកដីម៉ុងហ្គោលី ក្នុងជំនួបមិត្តភាពអន្តរជាតិ ដូចគ្នា ដែលត្រូវធ្វើឡើង ៤ថ្ងៃបន្ទាប់ គឺនៅថ្ងៃទី១១ ខែមិថុនា ឆ្នាំ២០២៤ ជំនួបមិត្តភាពអន្តរជាតិដូចគ្នា។
រំដែរថា សម្រាប់កម្ពុជា គឺជាការប្រកួតក្នុងដីលើកដំបូងក្នុងឆ្នាំ២០២៤ ដែលសហព័ន្ធកីឡាបាល់ទាត់កម្ពុជា នឹងរៀបចំការប្រកួតមិត្តភាពអន្តរជាតិ រវាងក្រុមជម្រើសជាតិកម្ពុជា ប្រកួតជាមួយក្រុមជម្រើសជាតិម៉ុងហ្គោលី នៅថ្ងៃសុក្រ ទី៧ ខែមិថុនា ឆ្នាំ២០២៤ ខាងមុខនេះ នាវេលាម៉ោង ១៨:៣០នាទី នៅពហុកីឡដ្ឋានជាតិ។
គួរបញ្ជាក់ថា ជំនួបមិត្តភាពនេះ ក៏ជាការបើកអោយអ្នកទាំងចូលអង្គុយទស្សនាជាលើកដំបូងក្រោយពេលសហព័ន្ធកីឡាបាល់ទាត់កម្ពុជា បានបំពាក់កៅអីមានបង្អែកថ្មី ដែលស្របតាមស្តង់ដាគោលការណ៍ FIFA និង AFC នៅពហុកីឡដ្ឋានជាតិ រួចរាល់ជាស្ថាពរ ហើយទីតាំងនេះ អាចផ្ទុកទស្សនិកជន ចូលរួមទស្សនាសរុបចំនួន ៣០,០០០នាក់៕
