ថ្មីៗនេះ អ្នកលេងបណ្ដាញសង្គមបានដឹងហើយថា អ្នកនាង គង់ ច័ន្ទស្រីមុំ កំពុងរងនូវមតិរិះគន់ជាច្រើនរហូតមានបង្កើតយុទ្ធនាការស្នើសុំឱ្យដកអ្នកនាង ចេញពីកម្មវិធី 3Fun ដែលអ្នកនាងជាពិធីការិនីរួមជាមួយនឹងលោក អៀ វិច្ឆ័យ និងអ្នកនាង ផេនខេក។ ជាមួយនឹងចលនាដ៏ផុសផុលចង់ឃើញតារាសម្ដែង ពិធីការិនី និងអ្នកជំនួញអនឡាញរូបនេះ ចេញមកទទួលស្គាល់កំហុស និងសុំទោសចំពោះទង្វើរបស់ខ្លួននោះ កាន់តែមានច្រើនឡើងៗ ប៉ុន្តែអ្នកនាង ហាក់នៅបន្តរក្សាភាពស្ងប់ស្ងាត់ មិនមានប្រតិកម្មតបត ឬបង្ហោះជាសារអ្វីទាំងអស់ ប៉ុន្តែនៅមានបង្ហោះជា Story មួយៗដែលកាន់តែធ្វើឱ្យអ្នកមិនពេញចិត្ត ក្ដៅក្រហាយចំពោះទង្វើរបស់អ្នកនាង។
យ៉ាងណាមិញយុទ្ធនាការ Hashtage#CancelKongChansreymomFrom3FunCambodia ហាក់នៅតែត្រូវបានអ្នកលេងបណ្ដាញសង្គម ប្រើប្រាស់យ៉ាងគគ្រឹកគគ្រេងដើម្បីភ្ជាប់ជាមួយនឹងករណីរបស់បុគ្គលល្បីល្បាញរូបនេះ។
ត្បិតថាមានសំណូមពរយ៉ាងច្រើនសន្ធឹកសន្ធាប់ពីសាធារណជន និងអ្នកដែលមិនពេញចិត្តចំពោះអ្នកនាង គង់ ច័ន្ទស្រីមុំ ដោយសារតែហេតុការណ៍ទៅលេងប្រទេសថៃ និងបង្ហោះផ្សព្វផ្សាយនៅលើបណ្ដាញទំនាក់ទំនងសង្គមនោះ ទំព័រហ្វេសប៊ុក 3FUN Channel Cambodia បានចេញមកឆ្លើយតបយ៉ាងខ្លី ដែលសារនោះ ហាក់ដូចជាមិនបង្ហាញចំណុចណាមួយនឹងដកអ្នកនាង គង់ ច័ន្ទស្រីមុំ ចេញពីកម្មវិធីនោះឡើយ។ «ជូនចំពោះបងប្អូនទាំងអស់គ្នា សូមបងប្អូនស្ងប់អារម្មណ៍បន្តិចណា។ សុំទុកពេលបន្តិច យើងនឹងធ្វើការឆ្លើយតបបងប្អូនឆាប់ៗនវ! ក្នុងស្ថានភាពនេះ សូមបងប្អូនយោគយល់ណា..»
យ៉ាងណាមិញបើមើលតាមមតិជាច្រើននៅខាងក្រោមសាររបស់កម្មវិធី Talk Show ដ៏ល្បីល្បាញខាងលើ មានអ្នកគាំទ្រជាច្រើនបានចូលមកបញ្ចេញយោបល់ ចង់ឃើញពិធីការិនីពូកែវោហារនាំសំណើច ត្រលប់មកធ្វើជាពិធីការិនីក្នុងកម្មវិធីវិញ ព្រោះតាំងពីដំបូងមកអ្នកនាងគឺជា ពិធីការិនីនៃកម្មវិធីមួយនេះ។
សូមជម្រាបជូនថា ទន្ទឹមនឹងមានយុទ្ធនាការទាមទារឱ្យដកអ្នកនាង គង់ ច័ន្ទស្រីមុំនេះ ក៏មានអ្នកមួយចំនួនបានលើកយកពីចំណុចល្អៗរបស់អ្នកនាង មកចែករំលែក និងស្នើសុំឱ្យផ្ដល់ឱកាសដល់អ្នកនាង ព្រោះមនុស្សយើងមិនអាចចៀសផុតពីកំហុសឆ្គងដោយប្រការណាមួយមិនបានតាំងចិត្តនោះឡើយ៕