ក្នុងជំនួបប៉ះគ្នាចំនួន ៣លើកចុងក្រោយនៅក្នុងការប្រកួតពានរង្វាន់លីគកំពូលកម្ពុជា Cambodian Premier League រដូវកាលឆ្នាំ២០២៣/២៤ ភ្នំពេញក្រោនមិនដែលយកឈ្នះព្រះខ័នរាជស្វាយរៀងឡើង ដោយចាញ់ ២ និងស្មើ១។
មុនជួនគ្នាជាលើកទី៤ ដែលនឹងត្រូវដណ្ដើមពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤ នៅថ្ងៃទី២៨ ខែមេសា ឆ្នាំ២០២៤ ខាងមុខ នៅពហុកីឡដ្ឋានជាតិ ចាប់ពីម៉ោង ៤:០០នាទីរសៀលតទៅ។
ក្នុងពានរង្វាន់លីគកំពូលកម្ពុជា កាលពីថ្ងៃទី១១ ខែសីហា ឆ្នាំ២០២៣ ព្រះខ័នរាជស្វាយរៀង បានយកឈ្នះ ភ្នំពេញក្រោន ក្នុងលទ្ធផល ២-១ ដោយការប្រកួតសប្ដាហ៍ទី២ នៅកីឡដ្ឋានស្វាយរៀង។ ចូលដល់សប្ដាហ៍ទី១១ ក្រុមទាំង២បានប៉ះគ្នាម្ដងទៀត ភ្នំពេញក្រោន បានត្រឹម ០-០ ជាមួយព្រះខ័នរាជស្វាយរៀង កាលពីថ្ងៃទី២៦ វិច្ឆិកា ២០២៣ នៅកីឡដ្ឋាន ស្មាត អ អេស អិន។
ជួបគ្នាចុងក្រោយ នៅថ្ងៃទី៤ ខែកុម្ភ: ឆ្នាំ២០២៤ នៅក្នុងពានរង្វាន់លីគកំពូលកម្ពុជា ដដែល ព្រះខ័នរាជស្វាយរៀង បានយកឈ្នះភ្នំពេញក្រោន ក្នុងលទ្ធផល ៣ ទល់និង២ ក្នុងការប្រកួតសប្ដាហ៍ទី២០ នៅកីឡដ្ឋានស្វាយរៀង។
ភ្នំពេញក្រោន នឹងត្រូវប៉ះម្ចាស់ជើងឯកច្រើនជាងគេព្រះខ័នរាជស្វាយរៀង នៅថ្ងៃទី២៨ ខែមេសា ឆ្នាំ២០២៤ ខាងមុខ ខណៈក្រុមវិសាខា ត្រូវប៉ះបឹងកេត ដើម្បីដណ្តើមយកចំណាត់ថ្នាក់លេខ៣ នៃពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២។
មុនប៉ះគ្នាលើកនេះ គឺជាលើកទី២ហើយ ដែលក្រុមទាំអប៉ះគ្នានៅវគ្គផ្ដាច់ព្រ័ត្រ Hun Sen Cup ដោយនៅឆ្នាំ២០០៨ ភ្នំពេញក្រោន (កាលនោះឈ្មោះថា ភ្នំពេញ Empire) បានយកឈ្នះ ស្វាយរៀង ១-០ វគ្គផ្ដាច់ព្រ័ត្រ។
ក្រុមបាល់ទាត់ភ្នំពេញក្រោន ក្រោមការដឹកនាំរបស់លោក Oleg Starynskyi បានកក់កៅអីទៅវគ្គផ្តាច់ព្រ័ត្រ ជាលើកដំបូងនៃរយៈពេល ១៤ឆ្នាំ ក្រោន ខកខានឡើងទៅជុំផ្តាច់ព្រ័ត្រ អស់រយៈពេល ១៤ឆ្នាំហើយ ខណៈពានរង្វាន់ជើងឯកថ្នាក់ជាតិមួយនេះ បានបង្តើតឡើងនៅឆ្នាំ២០០៧ ពោលគឺមានអាយុកាល១៧ឆ្នាំ។
ងាកមកក្រុមព្រះខ័នរាជស្វាយរៀង បានឡើងមកកាន់វគ្គផ្ដាច់ព្រ័ត្រ ពានរង្វាន់បាល់ទាត់ សម្តេចតេជោ ហ៊ុន សែន (Hun Sen Cup) ថ្នាក់ជាតិ រដូវកាល ឆ្នាំ២០២៣-២៤ ឆ្នាំ២០២៤នេះ នាមជាក្រុមដែលឡើងដល់វគ្គផ្ដាច់ព្រ័ត្រច្រើនជាងគេ និងជាម្ចាស់ជើងឯក ៤សម័យកាលទៀតផថ។ ទាំងព្រះខ័នរាជស្វាយរៀង និងភ្នំពេញក្រោន សុទ្ធតែស្ថិតក្នុងបញ្ជីក្រុមវ័យចំណាស់ជាងគេនៅពានរង្វាន់ បើបូកទាំងណាហ្គាវើល, ខ.ភ.ម និង ក្រសួងមហាផ្ទៃ។
ខាងក្រោមនេះគឺជាម្ចាស់ជើងឯកដែលនៅធ្លាប់ឈ្នះ Hun Sen Cup៖
១) ព្រះខ័នរាជស្វាយរៀង ធ្លាប់ឈ្នះ៤សម័យកាល (២០១១,២០១២,២០១៥,២០១៧)
២) វិសាខា ធ្លាប់ឈ្នះ៣សម័យកាល (២០២០,២០២១,២០២២)
៣) ភ្នំពេញក្រោន ធ្លាប់ឈ្នះ២សម័យកាល (២០០៨,២០០៩)
៤) ណាហ្គាវើល ធ្លាប់ឈ្នះ១សម័យកាល (២០១៣)
៥) បឹងកេត ធ្លាប់ឈ្នះ១សម័យកាល (២០១៩) ចំណែកក្រុមខេមរាកីឡា ដែលធ្លាប់ឈ្នះជើងឯកកាលពីរដូវកាលទី១ ក្នុងឆ្នាំ២០០៧ កន្លងទៅបានរំសាយក្លិបបាត់ទៅហើយ៕