ដោយយល់ឃើញថា វិស័យកងទ័ពកម្ពុជាប្រៀបដូចជាសជីផ្ងារ គឺបានន័យថា ចំនួននាយទាហានច្រើនលើសលប់ មិនសមាមាត្រនឹងចំនួនពលទាហាន សម្ដេចធិបតីហ៊ុន ម៉ាណែត នាយករដ្ឋមន្ត្រីកម្ពុជា ហើយក៏ធ្លាប់ជាមេទ័ពជើងគោកផងនោះ បានផ្ដល់អនុសាសន៍ដល់ក្រសួងការពារជាតិ ក៏ដូចជាកងយោធពលខេមរភូមិន្ទ ធ្វើការកែទម្រង់ការងារជ្រើសរើសកងទ័ព ដោយបន្ថយចំនួននៃការជ្រើសរើសនាយទាហាន និងបង្កើនចំនួននៃការជ្រើសរើសពលទាហាន ដើម្បីធ្វើយ៉ាងណាឲ្យមានតុល្យភាពយោធិនដែលមានតួនាទីដឹកនាំបញ្ជា និងយោធិនប្រយុទ្ធនៅគោលដៅផ្ទាល់។
សម្ដេចធិបតីថ្លែងថា ដើម្បីជំរុញឲ្យការងារនេះដំណើរការទៅបាន ក្រសួងការពារជាតិ និងកងយោធពលខេមរភូមិន្ទ ព្រមទាំងស្ថាប័នពាក់ព័ន្ធ ត្រូវសិក្សាស្រាវជ្រាវឲ្យបានហ្មត់ចត់អំពីច្បាប់កាតព្វកិច្ចយោធា និងឯកសារគតិយុត្តិពាក់ព័ន្ធ ដែលមានរួចមកហើយ ពិចារណាកែសម្រួល បំពេញបន្ថែមឲ្យបានពេញលេញ ដើម្បីស្នើសុំធ្វើវិសោធនកម្ម និងកសាងបន្ថែមនូវឯកសារគតិយុត្តិពាក់ព័ន្ធចាំបាច់ ឆ្ពោះទៅអនុវត្តច្បាប់កាតព្វកិច្ចយោធាឲ្យបានជាជំហានៗស្របតាមសភាពការណ៍ និងភារកិច្ចការពារជាតិនៅពេលវេលាសមស្របខាងមុខ។
ពាក់ព័ន្ធនឹងច្បាប់ស្ដីពីកាតព្វកិច្ចយោធា នាយករដ្ឋមន្ត្រីកម្ពុជាបានក្រើនរំលឹកឲ្យគិតគូរឲ្យបានឆាប់រហ័ស ពោលគឺត្រូវចាប់ផ្ដើមរៀបចំនៅក្នុងឆ្នាំ ២០២៤ និង២០២៥ នេះ ដើម្បីជ្រើសរើសយោធាកាតព្វកិច្ចមកផ្សាំឲ្យស៊ាំជាបណ្ដើរ ហើយច្បាប់នេះក៏ជារូបមន្តដើម្បីឲ្យមានតុល្យភាពរវាងនាយទាហាន នាយទាហានរង និងពលទាហានផងដែរ។
អនុសាសន៍របស់នាយករដ្ឋមន្ត្រីកម្ពុជាខាងលើនេះ លើកឡើងនៅក្នុងកម្មវិធីសម្ពោធអគារសហសិក្សា អគារស្នាក់នៅ អគារអាហារដ្ឋាន និងបិទវគ្គបណ្ដុះបណ្ដាល និងហ្វឹកហ្វឺនឆ្នាំ២០២៣ បន្តបើកវគ្គសិក្សាឆ្នាំ២០២៤ នៅសាកលវិទ្យាល័យការពារជាតិ កាលពីព្រឹកថ្ងៃទី ១៩ ខែមេសា ឆ្នាំ ២០២៤៕
អត្ថបទ៖ ឈិន ធារ៉ាត់
