តៃប៉ិ៖ គ្រោះរញ្ជួយដីជាង ៨០លើក ដែលកម្លាំងខ្លាំងបំផុត ៦.៣រ៉ិចទ័រ បានវាយប្រហារឆ្នេរសមុទ្រភាគខាងកើតរបស់កោះតៃវ៉ាន់ ចាប់ពីយប់ថ្ងៃចន្ទ រហូតដល់ព្រឹកថ្ងៃអង្គារ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី២៣ ខែមេសា ឆ្នាំ២០២៤។
រដ្ឋបាលអាកាសធាតុរបស់កោះតៃវ៉ាន់បាននិយាយថា អគារមួយចំនួននៅទីក្រុងតៃប៉ិ បានរង្គើរដោយសារតែការរញ្ជួយដី។ ការរញ្ជួយដីបានផ្តោតទៅលើតំបន់ភាគខាងកើតនៃទីក្រុង Hualien ជាកន្លែងដែលមនុស្សយ៉ាងហោចណាស់ ១៧នាក់ បានស្លាប់ បន្ទាប់ពីមានការរញ្ជួយដីកម្រិត ៧.២រ៉ិចទ័រ កាលពីថ្ងៃទី៣ ខែមេសា ថ្មីៗនេះ។ ក្រោយមកតៃវ៉ាន់ត្រូវបានរាយការណ៍ថា បានរងគ្រោះដោយការរញ្ជួយដីរាប់រយដងចាប់តាំងពីពេលនោះមក។
យោងតាមរដ្ឋបាលអាកាសធាតុកណ្តាលបានឱ្យដឹងថា គ្រោះរញ្ជួយដីដ៏ខ្លាំងលើកទី១ ដែលមានកម្រិត ៥.៥រ៉ិចទ័រ បានវាយប្រហារកាលពីថ្ងៃចន្ទ នៅម៉ោងប្រហែល ៥:០៨នាទីល្ងាច ប្រហែលជាចាប់ផ្ដើមនៅក្នុងរដ្ឋធានីតៃប៉ិ របស់កោះតៃវ៉ាន់ ហើយក្រោយមកមានការរញ្ជួយដីជាបន្ដបន្ទាប់ទៀត។
យោងតាមគេហទំព័រក្នុងតំបន់ Hualien បានឱ្យដឹងថា ការរញ្ជួយតូចៗ រាប់សិបទៀត ត្រូវបានកត់ត្រាដោយរដ្ឋបាលអាកាសធាតុកណ្តាលពេញមួយយប់ ដោយមានការរញ្ជួយថ្មីរៀងរាល់២ ទៅ ៣នាទីម្តង។
សូមជម្រាបថា កោះតៃវ៉ាន់ស្ថិតនៅជិតចំណុចប្រសព្វនៃបន្ទះប្លាកែត២ ហើយជារឿយៗ ងាយនឹងមានការរញ្ជួយដីណាស់។ កាលពីឆ្នាំ២០១៦ មនុស្សជាង ១០០នាក់បានស្លាប់ក្នុងការរញ្ជួយដីនៅភាគខាងត្បូងកោះនេះ ខណៈការរញ្ជួយដីកម្រិត ៧.៣រ៉ិចទ័រ បានសម្លាប់មនុស្សជាង ២,០០០នាក់ កាលពីឆ្នាំ១៩៩៩៕