បាងកក៖ រដ្ឋាភិបាលថៃបានឱ្យដឹងកាលពីថ្ងៃអង្គារ សប្ដាហ៍នេះថា ប្រទេសថៃនឹងរៀបចំការបោះព្រឹទ្ធសភានៅខែមិថុនា ដែលជាការបោះឆ្នោតលើកដំបូងសម្រាប់សភាជាន់ខ្ពស់ ចាប់តាំងពីមានរដ្ឋប្រហារយោធាមួយទសវត្សរ៍មកនេះ។ នេះបើយោងតាមការចេញផ្សាយដោយសារព័ត៌មាន CNA នាថ្ងៃអង្គារ ទី២៣ ខែមេសា ឆ្នាំ២០២៤។
ខុទ្ទកាល័យនាយករដ្ឋមន្ត្រីថៃ លោក ស្រេតថា ថាវីស៊ីន បានគាំទ្រផែនការសម្រាប់ការបោះឆ្នោតពហុដំណាក់កាលដ៏ស្មុគស្មាញនេះ ដែលមិនរាប់បញ្ចូលការបោះឆ្នោតសាធារណៈដ៏ពេញលេញទេ។
រដ្ឋមន្ត្រីក៏បានយល់ព្រមធ្វើប្រជាមតិមួយដោយសួរប្រជាជនថៃថា តើពួកគេនឹងគាំទ្រការផ្លាស់ប្តូររដ្ឋធម្មនុញ្ញដែលត្រូវបានចងក្រងឡើងដោយរបបយោធាដែលកាន់អំណាចនៅឆ្នាំ២០១៧ ដែរឬទេ។
ព្រឹទ្ធសភាដែលមានសមាជិកបច្ចុប្បន្នចំនួន ២៥០នាក់ត្រូវបានតែងតាំងដោយរបបយោធាដែលបានដណ្តើមអំណាចក្នុងឆ្នាំ២០១៤ បានដើរតួនាទីយ៉ាងសំខាន់ក្នុងការកំណត់លទ្ធផលនៃការបោះឆ្នោតសកលកាលពីឆ្នាំមុន។
គណបក្សចលនាឆ្ពោះទៅមុខ (MFP) បានឈ្នះអាសនៈភាគច្រើននៅក្នុងសភា ប៉ុន្តែមេដឹកនាំរបស់ខ្លួន លោក Pita Limjaroenrat ត្រូវបានរារាំងមិនឱ្យក្លាយជានាយករដ្ឋមន្ត្រី ដោយសារតែលោក មិនបានប្រមូលផ្តុំការគាំទ្រគ្រប់គ្រាន់នៅក្នុងព្រឹទ្ធសភា។
ម្លោះហើយបានជា លោក Srita មកពីគណបក្សភឿថៃជាប់ចំណាត់ថ្នាក់លេខ២ ក្នុងការបោះឆ្នោតនោះ ដោយបានបង្កើតរដ្ឋាភិបាលចម្រុះជាមួយគណបក្សដែលមានទំនាក់ទំនងជាមួយយោធា។
ក្នុងដំណើរការនេះ សភាជាន់ខ្ពស់ (ព្រឹទ្ធសភា) នឹងត្រូវកាត់បន្ថយសមាជិកព្រឹទ្ធសភាមកនៅត្រឹមចំនួន ២០០នាក់ ដែលនឹងត្រូវបានជ្រើសរើសពីក្រុមតំណាង ២០វិស័យផ្សេងៗ រួមមាន៖ យុត្តិធម៌ ការអប់រំ សុខភាពសាធារណៈ ឧស្សាហកម្ម សិល្បៈ និងកីឡា មនុស្សចាស់ និងជនជាតិភាគតិចជាដើម។
យ៉ាងណាម៉ិញ មានតែបេក្ខជនប្រជែងតំណែងសមាជិកព្រឹទ្ធសភាប៉ុណ្ណោះ ទើបមានមានសិទ្ធិបោះឆ្នោត ដោយការបោះឆ្នោតដែលនឹងធ្វើឡើងចំនួន ៣ជុំ នៅថ្ងៃទី៩ ខែមិថុនា ថ្ងៃទី១៦ ខែមិថុនា និងថ្ងៃទី២៦ ខែមិថុនា ខាងមុខ។
ទាក់ទិននឹងបញ្ហានេះ អ្នករិះគន់បានអះអាងថា វិធីសាស្រ្តនេះខ្វះគោលការណ៍ប្រជាធិបតេយ្យ ហើយធ្វើឱ្យដំណើរការស្មុគស្មាញ។
ជាមួយគ្នា អ្នកនាំពាក្យរបស់គណបក្សចលនាឆ្ពោះទៅមុខ (MFP) លោក Parit Wacharasindhu បានប្រាប់ AFP ថា «នេះមិនមែនជាការបោះឆ្នោតទេ ពីព្រោះសមាជិកព្រឹទ្ធសភា មិនបានមកដោយផ្ទាល់ពីសាធារណជនទេ»។
យ៉ាងណាក៏ដោយ លទ្ធផលនៃការបោះឆ្នោតត្រូវបានគេរំពឹងទុកថា នឹងត្រូវប្រកាសនៅថ្ងៃទី២ ខែកក្កដា៕