អ្នកឧកញ៉ាឡេង ណាវ៉ាត្រា បញ្ជាក់ថា វិធីសាស្ត្រដោះដូរទីតាំងផ្ទះ និងផ្ទះទៅជាដីឡូត៍ នៅគម្រោងបុរីឡេង ណាវ៉ាត្រា ផ្លូវជាតិលេខ ៦ A ធ្វើឡើងសម្រាប់តែអតិថិជនដែលស្ម័គ្រដោះដូរប៉ុណ្ណោះ ហើយក៏មិនមានការបង្ខិតបង្ខំដាក់សម្ពាធនោះដែរ។ ចំណែកឯអ្នកដែលមិនយល់ព្រម គឺរក្សានៅដដែល ប៉ុន្តែត្រូវការពេលវេលាយូរ ខណៈការចាក់ដី និងសំណង់មានភាពយឺតយ៉ាវ ដោយសារក្រុមហ៊ុនរបស់លោកកំពុងជួបវិបត្តិសេដ្ឋកិច្ចធ្ងន់ធ្ងរ។ អ្នកឧកញ៉ា ក៏បានថ្លែងសូមអភ័យទោស និងការយោគយល់អធ្យាស្រ័យពីអតិថិជនចំពោះបញ្ហារកាំរកូស យឺតយ៉ាវ ដែលកើតមានផងដែរ។
បើយោងតាមសារសំឡេង របស់អ្នកឧកញ៉ា ឡេង ណាវ៉ាត្រា លោកបានលើកឡើងយ៉ាងដូច្នេះ «កន្លងទៅបងប្អូនគាត់ធ្លាប់ដូរមកផ្ទះនៅទួលពង្រ និងកំបូលសរុបជិត៥០០ផ្ទះ មិនមានការដាក់សម្ពាធក៏ដូចជាជំរុញ ឬបង្ខិតបង្ខំទេ គ្រាន់តែជាការដោះស្រាយផ្នែកតូចៗខ្លះ។ ដូច្នេះ ដើម្បីជាសមធម៌ ពួកយើងបានគិតដោះដូរឱ្យបានទំហំដីសមាមាត្រទៅនឹងថវិកាកុំឱ្យមានការខាតបង់ និងរៀបចំហេដ្ឋារចនាសម្ព័ន្ធជាមួយបុរី ភ្លើង ទឹក ផ្លូវ បេតុង លូ និងការចាក់ដី បំពេញឱ្យដូចគ្នា ហើយនឹងប្រឹងប្រែងបំបែកប័ណ្ណរឹងឱ្យបានលឿនតាមដែលអាចធ្វើបាន»។
អ្នកឧកញ៉ា ឡេង ណាវ៉ាត្រា ស្នើដល់អតិថិជនរបស់ខ្លួន កុំនិយាយមិនល្អអំពីគម្រោង ដែលមានភាពយឺតយ៉ាវ ដោយលើកហេតុផលថា ការនិយាយពាក្យអវិជ្ជមានអំពីគម្រោង គឺពុំមានលទ្ធផលល្អនោះទេ មានតែធ្វើឲ្យប៉ះពាល់ដល់ទ្រព្យខ្លួនឯង ខូចហាងឆេង លក់មិនបានថ្លៃ។ លោកបន្ថែមថា អតិថិជនគម្រោង៦អា មានទាំងផ្ទះទាំងដីរហូតដល់រាប់ម៉ឺននាក់ អតិថិជនទាំងអស់ជាសរសៃឈាមទាំងអស់គ្នា។
ទោះជាយ៉ាងណា អ្នកឧកញ៉ាមិនបានបញ្ជាក់ពីទំហំវឌ្ឍនភាពនៃគម្រោងរបស់លោកនៅផ្លូវជាតិលេខ៦ A ទេ ដោយគ្រាន់តែលើកឡើងថា «បុរីកំពុងតែដំណើរការរហូត និងមានការរីកចម្រើន ការចាក់ដីជិតបញ្ចប់ សំណង់ក៏ឡើងបានច្រើន គ្រាន់តែថាមិនបានលឿនដូចអ្វីដែលអតិថិជនចង់បានទាំងស្រុងទេ»។ ជាមួយគ្នានេះ អ្នកឧកញ៉ាស្នើឲ្យអតិថិជនសាមគ្គីគ្នាលើកពីចំណុចសក្ដានុពល ការពិត ជាក់ស្ដែង នៃគម្រោង ផ្សព្វផ្សាយ ថ្ងៃក្រោយពេលលក់ដី លក់ផ្ទះក៏បានទទួលផលចំណេញទាំងអស់គ្នា ព្រោះប្លង់រឹងនឹងបានឆាប់ៗ ហើយគម្រោងក៏នឹងបញ្ចប់នាពេលខាងមុខ។ បើដី ឬបុរីលក់បានល្អ គម្រោងក៏បញ្ចប់បានកាន់តែលឿនដែរ។
គួររំឭកផងដែរថា កន្លេងមកអតិថិជនដែលបានបង់ប្រាក់រំលស់ទិញផ្ទះនៃគម្រោងបុរីឡេង ណាវ៉ាត្រា ផ្លូវជាតិលេខ៦A បានរិះគន់ច្រើនលើកច្រើនសារពីភាពយឺតយ៉ាវនៃការសាងសង់ ក្រោយពេលដែលពួកគេខ្លះបានបង់ប្រាក់មករហូតជាង៣ឆ្នាំមកហើយ។ ការរិះគន់របស់ភាគីអតិថិជនត្រូវបានភាគីក្រុមហ៊ុន ឡេង ណាវ៉ាត្រា ចេញមកអះអាងថា ភាពយឺតយ៉ាវនៃការសាងសង់ផ្ទះជូនដល់អតិថិជន គឺបណ្ដាលមកពីវិបត្តិនៃសេដ្ឋកិច្ចសកល៕
អត្ថបទ ឈិន ធារ៉ាត់
