នាយករដ្ឋមន្ត្រីកម្ពុជា ប្រតិកម្មខ្លាំងៗ ចំពោះការលើកឡើងរបស់លោក សម រង្សី អ្នកនយោបាយជាប់ពិរុទ្ធ ដែលកំពុងភៀសខ្លួនទៅនៅក្រៅប្រទេស ដោយលោក សម រង្សី លើកឡើងថា គម្រោងព្រែកជីកហ្វូណនតេជោអាចនាំមកនូវគ្រោះថ្នាក់ដ៏ធ្ងន់ធ្ងរដល់បរិស្ថាន ជីវភាពរស់នៅប្រជាពលរដ្ឋខ្មែរ និងបម្រើផលប្រយោជន៍យុទ្ធសាស្ត្ររបស់ចិនកុម្មុយនិស្ត ដែលត្រូវការពង្រឹងឥទ្ធិពលរបស់ខ្លួន។ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាប្រតិកម្មតបនឹងការលើកឡើងនេះថា តើអ្នកនយោបាយចាស់វស្សាម្នាក់នេះ (លោក សម រង្ស៊ី) ជាមនុស្សល្ងង់ ឬជាមនុស្សចេះធ្វើល្ងង់?
ជុំវិញនឹងការលើកឡើងរបស់លោក សម រង្សី នេះ ប្រជាពលរដ្ឋខ្មែរក៏សម្ដែងនូវការមិនពេញចិត្ត និងហួសចិត្តផងដែរ ដែលលោកធ្លាប់អួតខ្លួនក្ដែងៗថា ស្នេហាជាតិ និងចង់ឃើញជាតិមានការរីកចម្រើន បែរជាប្រឆាំងនឹងការអភិឌ្ឍទៅវិញ ខណៈបរទេសខ្លះកំពុងរិះរកគ្រប់មធ្យោបាយដើម្បីប្រឆាំងនឹងគម្រោងនេះដែរ។
កាលពីថ្ងៃទី២៤ ខែមេសា ឆ្នាំ ២០២៣ កន្លងទៅ លោក សម រង្ស៊ី លើកឡើងក្នុងទំព័រហ្វេសប៊ុករបស់ខ្លួន ជាភាសាខ្មែរផង អង់គ្លេសផង និងបារាំងផង ដោយមានសេចក្ដីថា «គម្រោងជីកព្រែក ភ្ជាប់ទីក្រុងភ្នំពេញ ទៅដល់សមុទ្រ អាចនាំមកគ្រោះថ្នាក់ដ៏ធ្ងន់ធ្ងរ ដល់បរិស្ថាន និងជីវភាពរស់នៅ ប្រជាពលរដ្ឋខ្មែរ។ របប ហ៊ុន សែន បានសម្រេចធ្វើតាមសំណើចិនកុម្មុយនិស្ត យ៉ាងតក់ក្រហល់ និងគ្មានស្មារតីទទួលខុសត្រូវ ឲ្យជីកព្រែកបែបនេះ ដោយមិនទាន់បានធ្វើការសិក្សា គ្រប់ជ្រុងជ្រោយនៅឡើយ។ បំណងធំ នៃព្រែកនេះ មិនមែនបម្រើផលប្រយោជន៍សេដ្ឋកិច្ច ប្រទេសកម្ពុជាទេ តែបម្រើផលប្រយោជន៍យុទ្ធសាស្ត្ររបស់ចិនកុម្មុយនិស្ត ដែលត្រូវការពង្រឹងឥទ្ធិពលរបស់ខ្លួន ទៅដល់ឈូងសមុទ្រថៃ ដោយឆ្លងកាត់ប្រទេសលាវ និងប្រទេសកម្ពុជា ដែលស្ថិតក្រោមឥទ្ធិពលប្រទេសចិន រួចទៅហើយ»។
លោកក៏បានបន្ថែមថា «មូលដ្ឋានសឹករបស់ចិននៅរាម ក៏ជាឈ្នាន់ ដើម្បីបម្រើនយោបាយវាតទីនិយមរបស់ចិន។ របប ហ៊ុន សែន និង ហ៊ុន ម៉ាណែត អាចនាំមកគ្រោះថ្នាក់ឲ្យប្រទេសកម្ពុជា ដូចកាលពីសម័យ ប៉ុល ពត ដែលបានទៅអែបប្រទេសចិន ដើម្បីឲ្យចិន ជួយការពារអំណាចផ្ដាច់ការរបស់ខ្លួន»។
ដោយមើលឃើញនូវចេតនាមិនល្អ និងតែងបង្កជាទស្សនអគតិ ជ្រុលនិយមទៅរកបរទេសនោះ សម្ដេចធិបតី នាយករដ្ឋមន្ត្រីកម្ពុជា បានបញ្ចេញប្រតិកម្មតបតាមរយៈសំណេរលើទំព័រហ្វេសប៊ុកផ្លូវការរបស់លោកថា «តើអ្នកនយោបាយចាស់វស្សាម្នាក់នេះ ជាមនុស្សល្ងង់ ឬជាមនុស្សចេះធ្វើល្ងង់ !
ប្រជាជនកម្ពុជាមួយប្រទេសបានយល់អំពីអត្ថប្រយោជន៍ចំពោះសេដ្ឋកិច្ច និងសង្គមជាតិកម្ពុជា ដែលគម្រោងព្រែកជីកហ្វូណនតេជោ និងផ្ដល់ឲ្យសម្រាប់ប្រទេសនិងប្រជាជនខ្មែរ។ ប៉ុន្តែបែរជា សម រង្សី ដែលជាអ្នកនយោបាយចាស់វស្សាដែលតែងតែតាំងខ្លួនជាអ្នកស្រលាញ់ជាតិ មិនមានសមត្ថភាពក្នុងការមើលឃើញ ឬទទួលស្គាល់នូវអ្វីដែលល្អសម្រាប់ខ្មែរទៅវិញ។
តើគាត់ជាមនុស្សល្ងង់ពិតប្រាកដ ឬជាមនុស្សចេះប៉ុន្តែចេះល្ងង់។ ជាមនុស្សប្រឆាំង ដើម្បីប្រឆាំង។ ប្រឆាំងគ្មានរើសពេលវេលា ឬប្រធានបទ។ ប្រឆាំងសូម្បីតែសមិទ្ធផលសម្រាប់ជាតិ និងប្រជាជនខ្មែរខ្លួនឯងក៏ដោយ»។
លោកក៏បានសម្ដែងការហួសចិត្តចំពោះអ្វីដែលលោកសម រង្សីលើកឡើងថា «សូម្បីតែភូមិសាស្ត្រ ពាក់ព័ន្ធនឹងខេត្តដែលគម្រោងនេះនឹងតភ្ជាប់ ក៏គាត់ក្ដាប់មិនបាន និយាយមិនត្រូវផង…លោកម្ចាស់អើយ»។
សម្ដេចតេជោ ហ៊ុន សែន អតីតនាយករដ្ឋមន្ត្រី និងប្រធានព្រឹទ្ធសភា ដែលជាអ្នកផ្ដួចផ្ដើមគម្រោងព្រែកជីកហ្វូណតេជោធ្លាប់បានលើកឡើងកាលពីពេលកន្លងទៅថា ព្រែកជីក តេជោហ្វូណន គឺជាផលប្រយោជន៍សេដ្ឋកិច្ចសង្គមសុទ្ធសាធ ដែលវាជួយឲ្យកម្ពុជាទិសនិរតី មានផ្លូវទឹកដឹកជញ្ជូនទៅកាន់សមុទ្របន្ថែមលើផ្លូវដឹកជញ្ជូនតាមដងទន្លេមេគង្គ ដែលមានស្រាប់។ ជួយឲ្យប្រជាជននៅតាមព្រែកនេះមានទឹកប្រើប្រាស់សម្រាប់បង្កបង្កើនផល ជួយរំដោះទឹកជំនន់ក្នុងរដូវវស្សា។ល។
ចំណែកលោកបណ្ឌិត គី សិរីវឌ្ឍន៍ អ្នកជំនាញសេដ្ឋកិច្ច បានលើកឡើងក្នុងវេទិកាជជែកពិភាក្សា រៀបចំឡើងដោយសារព័ត៌មានកម្ពុជាថ្មី កាលពីថ្ងៃទី ២៥ ខែមេសា ឆ្នាំ ២០២៤ អំពីប្រយោជន៍សេដ្ឋកិច្ចសម្រាប់កម្ពុជានៅពេលដែលគម្រោងព្រែកជីកហ្វូណនសម្រេចជាស្ថាពរ ដែលក្នុងនោះរួមមាន៖ ទី១ បង្កើននូវឧត្ដមភាពនៃការប្រកួតប្រជែងលើទីផ្សារអន្តរជាតិ តាមរយៈកាត់បន្ថយថ្លៃដើមក្នុងការដឹកជញ្ជូន និងការនាំចេញ។ ទី២ សម្រួលដល់ការដឹកជញ្ជូនកសិផល និងផលិតផលកសិកម្ម។ ទី៣ ជាអាងផ្ទុកទឹក ដែលអាចបម្រើដល់កសិកម្ម និងជាផ្លូវរំដោះទឹកជំនន់។ ទី៤ ជំរុញឲ្យមានទីតាំងទេសចរណ៍កាន់តែច្រើន និងបង្កើតឱកាសរកស៊ីនៅក្នុងតំបន់។ ទី៥ បង្កើតនូវសុទិដ្ឋិនិយមដល់ប្រជាពលរដ្ឋឲ្យមើលឃើញថា កម្ពុជានឹងលែងរស់ដោយខ្ចីដង្ហើមគេដកទៀតហើយ យើងមានដង្ហើមសេដ្ឋកិច្ចខ្លួនឯង និងខិតខំបង្កើនផលិតផល ដើម្បីប្រកួតប្រជែងក្នុងទីផ្សារ។
ចំពោះការលើកឡើងពាក់ព័ន្ធនឹង ព្រែកជីកហ្វូណនជាគម្រោងយុទ្ធសាស្ត្រផ្លូវទឹកសម្រាប់កងទ័ពចិន វាជារឿងមួយដ៏ឆោតល្ងង់ និងគ្មានហេតុផលសោះឡើយ។ អ្នកជំនាញភូមិសាស្ត្រនយោបាយ ក៏ដូចជាថ្នាក់ដឹកនាំកំពូលៗរបស់កម្ពុជា ធ្លាប់បានពន្យល់ម្ដងហើយម្ដងទៀត ដោយលើកយកទឡ្ហីករណ៍ដ៏រឹងមាំមកបញ្ជាក់ថា នហេតុផលណាមួយ ដែលថាព្រែជីកហ្វូណនតេជោ បម្រើឲ្យការចល័តកងទ័ពបរទេសនៅលើទឹកដីខ្មែរនោះទេ។ ដូចសម្ដេចតេជោហ៊ុន សែន ធ្លាប់ចោទសួរថា តើកម្ពុជាឆោតល្ងង់ រហូតដល់យកកងទ័ពចិនមកនៅក្នុងប្រទេសរបស់ខ្លួន ដែលវាផ្ទុយជាមួយរដ្ឋធម្មនុញ្ញរបស់ខ្លួនឬ? និង តើចិនឆោតល្ងង់រហូតយកកងទ័ពខ្លួនមកនៅកម្ពុជា ដែលវាផ្ទុយជាមួយគោលការណ៍គោរពឯករាជ្យកម្ពុជា ពីសំណាក់ចិនឬ?
លោកបញ្ជាក់បន្ថែមថា ក្រៅពីមាត្រា៥៣ នៃរដ្ឋធម្មនុញ្ញ ដែលហាមឃាត់មិនឲ្យកម្ពុជា មានមូលដ្ឋានយោធាបរទេសលើទឹកដីរបស់ខ្លួន នៅមានមាត្រា៥៥ បានចែងយ៉ាងច្បាស់ថា សន្ធិសញ្ញា និងកិច្ចព្រមព្រៀងទាំងឡាយណា ដែលមិនស្របនឹងឯករាជ្យអធិបតេយ្យបូរណភាពទឹកដី អព្យាក្រឹតភាព និងឯកភាពជាតិរបស់ព្រះរាជាណាចក្រកម្ពុជា ត្រូវលុបចោល។ ចំណុចនេះបានបញ្ជាក់ច្បាស់ថា គ្មានកិច្ចព្រមព្រៀងណាមួយអនុវត្តបានទេ ប្រសិនវាមិនស្របជាមួយឯករាជ្យ អធិបតេយ្យកម្ពុជា ព្រោះរដ្ឋធម្មនុញ្ញបានលុបចោលរួចទៅហើយ។
សូមបញ្ជាក់ថា ផ្លូវទឹកថ្មីទៅកាន់សមុទ្រនេះ មានប្រវែង ១៨០គីឡូ ម៉ែត្រ ចាប់ពីព្រែកតាកែវ នៃទន្លេ មេគង្គ ឆ្លងកាត់តាមព្រែកតាឯក នៃទន្លេបាសាក់ ចូលតាមព្រែកតាហ៊ីងនៃទន្លេបាសាក់ ស្រុកកោះធំ និងបន្តរហូតដល់សមុទ្រ ខេត្តកែប ដោយឆ្លងកាត់ខេត្ត ៤ រួមមាន៖ ខេត្តកណ្ដាល តាកែវ កំពត និងខេត្តកែប ដែលមានប្រជាជនសរុបប្រមាណ ១.៦លាននាក់ រស់នៅអមសងខាងផ្លូវទឹកនេះ។ ផ្លូវទឹកនេះ មានទទឹងមុខកាត់ផ្នែកខាងលើ ប្រវែង ១០០ម៉ែត្រ និងមុខកាត់ផ្នែកខាងក្រោម ប្រមាណ ៨០ម៉ែត្រ និងជម្រៅទឹកប្រមាណ ៥.៤ម៉ែត្រ ( ជម្រៅនាវាចរណ៍ ៤.៧ម៉ែត្រ និងគម្លាតសុវត្ថិភាព ០.៧ម៉ែត្រ) មានគន្លងនាវាចរណ៍ ចំនួន ២គន្លង អាចចេញ-ចូល និងចៀសគ្នាបានដោយសុវត្ថិភាព៕
អត្ថបទ៖ ឈិន ធារ៉ាត់
