ក្រុមបាល់ទាត់ចំនួន៥បានប្រកាសជ្រើសរើសកីឡាករយុវជនថ្នាលប្រចាំក្រុមខ្លួនដើម្បីត្រៀមប្រកួតក្នុងពានរង្វាន់នានាដែលរៀបចំនៅឆ្នាំ២០២១ នេះផង ក៏ដូចជាបណ្តុះបណ្តាលប្រចាំក្រុមរបស់ខ្លួនផង។
លោក ផាន់ ចាន់ផាត ក្រុមគ្រូបង្វឹករបស់គីរីវង់សុខសែនជ័យ បានប្រកាសថា៖«សួស្តីប្អូនៗដែលមានបំណងចង់ក្លាយជាកីឡាករថ្នាលយុវជនអាយុក្រោម១៥របស់ក្លិបគិរីវង់សុខសែនជ័យ គឺ ក្លិបនឹងជ្រើសរើសប្អូនៗដែលមានឆ្នាំកំណើត (ឆ្នាំ 2006-2007-2008) ដើម្បីធ្វើតេស្តចូលរួមជាមួយក្រុមយុវជនអាយុក្រោម15ឆ្នាំរបស់ក្លិបត្រៀមប្រកួតពានរង្វាន់របស់សហព័ន្ធបាល់ទាត់កម្ពុជា និងពានរង្វាន់ផ្សេងៗទៀត។ សូមប្អូនត្រៀមលក្ខណៈសម្បត្តិអោយបានល្អរង់ចាំក្លិបជូនដំណឹងថ្ងៃធ្វើតេស្តពេលក្រោយ។ ទូរសព្ទតាមលេខ (097 722 1626/012 221 626)»។
ចំណែកហ្វេសប៊ុករបស់សាលាតម្រង់ទិសអាយុក្រោម១៨ឆ្នាំ ខេត្តក្រចេះ បានប្រកាសថា ត្រូវការជ្រើសរើសយុវជនដែលមានឆ្នាំកំណើត 2003 -2004-2005 ដើម្បីត្រៀមប្រកួតលីគយុវជន រដូវកាលថ្មី។
ចំពោះសាលាតម្រង់ទិសបាល់ទាត់ខេត្តបាត់ដំបង វិញក៏បានប្រកាសជ្រើសរើសកីឡាករចូលរួមហ្វឹកហាត់ដែរដោយជ្រើសរើស៣កម្រិតអាយុមាន៖
-ក្រុមអាយុក្រោម១៣ឆ្នាំ (2008-2009)
-យុវជនអាយុក្រោម១៥ឆ្នាំ (2006-2007)
-យុវនារីអាយុក្រោម១៥ឆ្នាំ(2006-2008)
ប្អូនៗដែលមានចំណាប់អារម្មណ៍ចង់ក្លាយជាកីឡាករ កីឡាការិនីរបស់សាលា សូមត្រៀមខ្លួនឲ្យបានល្អទាំងលក្ខខណ្ឌ បច្ចេកទេសនិងកម្លាំងផ្ទាល់ខ្លួន។សម្រាប់កាលបរិច្ឆេត Page របស់សាលានឹងផ្តល់ជូនជាដំណឹងតាមក្រោយឆាប់ៗនេះ។
ដោយឡែកសាលាតម្រង់ទិសបាល់ទាត់ខេត្តកណ្ដាល ក៏ត្រូវការជ្រើសរើសកីឡាករដែរ ដោយបញ្ជាក់ថា៖ប្អូនៗដែលមានចំណាប់អារម្មណ៍សូមទំនាក់ទំនង មកកាន់ប្រអប់សាររបស់យើងខ្ញុំ រួមទាំងការសម្របខ្លួន ទាំងកម្លាំង កាយសម្បទា និងបច្ចេកទេសផ្ទាល់ខ្លួនឲ្យបានល្អ។ ចំពោះពេលវេលានិងទីកន្លែងយើងខ្ញុំនឹងជម្រាបជូននៅពេលក្រោយ»។
សម្រាប់សាលាតម្រង់ទិសខេត្តព្រះសីហនុ បានប្រកាសជ្រើសរើសយុវជនអាយុក្រោម18ឆ្នាំ ដែលមានឆ្នាំកំណើតចន្លោះ 2003-2004-2005។ សូមត្រៀមលក្ខណៈផ្នែកកំលាំង កាយសម្បទានិងបច្ចេកទេសផ្ទាល់ខ្លួនអោយបានល្អ នៅខាងមុខនេះ។ សូមទាក់ទងតាមលេខ 015 417 715/099 402 484៕
