ក្នុងកំឡុងសម្ភាសន៍ជាមួយនឹងទស្សនាវដ្ដី People តារាស្រីវ័យ៤៦ឆ្នាំ ដែលជាបេសកជនពិសេសរបស់ឧត្តមស្នងការអង្គការសហប្រជាជាតិសម្រាប់ជនភៀស(UNHCR) បានលើកឡើងពីបញ្ហាភាពតានតឹងដែលកំពុងតែញ៉ាំញីប្រទេសអាហ្វហ្គានីស្ថានក្រោយទ័ពសហរដ្ឋអាមេរិកដកខ្លួនចេញពីប្រទេសនេះ។
តារាសម្ដែងជួរមុខរបស់ហូលីវូដ Angelina Jolie បានចេញមកនិយាយពីបញ្ហាវិបត្តិនៅក្នុងប្រទេសអាហ្វហ្គានីស្ថានក្រោយក្រុមតាលីបង់ក្ដោបក្ដាប់ប្រទេសមួយនេះ។
អ្នកស្រី Angelina Jolie បានលើកថា «លើកមុនក្រុមតាលីបង់គ្រប់គ្រងអាហ្វហ្គានីស្ថាន ពួកគេបានឃុំ មនុស្សស្រីឱ្យនៅតែក្នុងផ្ទះ ហាមឃាត់នារីៗមិនឱ្យទៅសាលារៀន និងមិនឱ្យនារីមានសិទ្ធិបញ្ចេញមតិយោបល់។ ពួកយើងមិនដឹងទេថាក្រុមតាលីបង់បានផ្លាស់ប្ដូរឬអត់? ប៉ុន្តែពេលនេះពិភពលោកបានផ្លាស់ប្ដូរហើយ។ យើងមានបច្ចេកវិទ្យាជាឧបករណ៍ស្រាប់។ យើងអាចធ្វើការទំនាក់ទំនងគ្នាទូទាំងពិភពលោក។ យើងមានឱកាសអាចនៅក្បែរៗជនជាតិអាហ្គានីស្ថានដែលកំពុងតែព្យាយាមប្រឹងប្រែងប្រកបដោយក្ដីសង្ឃឹមនិងខិតខំបញ្ជៀសការប្រើប្រាស់ហិង្សានិងការធ្វើទុក្ខបុកម្នេញក្នុងប្រទេសរបស់ខ្លួន »
តារាហូលីវូដដ៏ល្បីរូបនេះក៏បានលើកឡើងពីវិធីសាស្ត្រខ្លះៗដែលអាចជួយដោះវិបត្តិប្រទេសអាហ្វហ្គានីស្ថានផងដែរថា «ពួកយើងអាចទទួលបានដំណឹងនិងរឿងរ៉ាវដែលកើតឡើងនិងការគាំពារសិទ្ធិមនុស្សដើម្បីធ្វើឱ្យអំពើរំលោភនានាដែលត្រូវបានលាក់បាំង អាចលាតត្រដាងចេញមកខាងក្រៅ។ យើងក៏អាចគាំទ្រអង្គការសិទ្ធិមនុស្សដែលកំពុងតែធ្វើការនៅទីនោះ។»
ក្នុងនោះអ្នកស្រីក៏បានបន្ថែមទៀតដែរថា «យើងអាចសាកសួរទៅជនជាតិអាហ្វហ្គានីស្ថាន ថាពួកគេចង់ឱ្យយើងជួយទៅលើអ្វីខ្លះដែលពួកគេកំពុងត្រូវការជាចាំបាច់ ហើយពួកគេចង់ផ្ញើសារអ្វីចេញមកកាន់ពិភពខាងក្រៅ។»
មុននេះ Angelina Jolie បានបង្កើតគណនីនៅលើ Instagram ជាលើកដំបូង ដោយបង្ហោះសំបុត្រពីក្មេងស្រីអាហ្វហ្គានីស្ថានម្នាក់នៅលើផុសរបស់ខ្លួន ដើម្បីជាសំឡេងមួយជួយដល់ប្រជាជនប្រទេសនេះដែលកំពុងតែត្រូវបានគេរឹតត្បិតសិទ្ធិសេរីភាពក្នុងការទំនាក់ទំនងនិងបង្ហាញគំនិតរបស់ពួកគេនៅលើបណ្ដាញសង្គម។
អ្នកស្រី Angelina Jolie គឺជាតារាហូលីវូដដ៏មានឈ្មោះល្បីល្បាញមួយរូប បច្ចុប្បន្នអ្នកស្រីមានវ័យ៤៦ឆ្នាំ អ្នកស្រីមានកូនចំនួន៦នាក់ ក្នុងនោះកូនប្រុសច្បងរបស់អ្នកស្រី Maddox គឺជាកូនចិញ្ចឹមជនជាតិខ្មែរ៕
ទស្សនាវីដេអូព័ត៌មានខាងក្រោម៖