ថ្មីៗនេះ មានរឿងដ៏សោកស្ដាយជាពន់ពេកមួយបានកើតឡើងនៅក្នុងទឹកដីខេត្តមាត់ឆ្នេរនៃព្រះរាជាណាចក្រកម្ពុជា ដោយសារតែកងទ័ពអាវសមួយរូបបានបាត់បង់ជីវិតព្រោះតែកូវីដបានឆក់យកជីវិត បន្សល់ទុកត្រឹមការចង់ចាំនិងក្ដីទុក្ខសោកសម្រាប់ក្រុមគ្រួសារ មិត្តភក្ដិ ក៏ដូចជាសាធារណជនដែលទទួលបានដំណឹងនេះ។
កញ្ញា អ៊ឹម ស្រីនិ អ្នកគ្រូពេទ្យជួរមុខវ័យ២៨ឆ្នាំ ជាមន្ត្រីសុខាភិបាលបម្រើការងារនៅមន្ទីរពេទ្យបង្អែកក្រុងព្រះសីហនុ បានទទួលមរណភាពកាលពីថ្ងៃអាទិត្យទី២៨ ដោយសារតែជំងឺកូវីដ-១៩។
ការពលិជីវិតរបស់កញ្ញា អ៊ឹម ស្រីនិ វីរជនអាវសដែលជាគ្រូពេទ្យជួរមុខបានលះបង់កម្លាំងកាយ ពេលវេលា និង សេចក្ដីសុខផ្ទាល់ខ្លួនដើម្បីចូលរួមប្រយុទ្ធប្រឆាំងនឹងទប់ស្កាត់ការរីករាលដាលជំងឺកូវីដ-១៩ បានធ្វើឱ្យមតិសាធាណជនមានការសោកស្ដាយយ៉ាងខ្លាំង ក្នុងនោះអ្នកសិល្បៈខ្មែរជាច្រើនរូបក៏បានបង្ហាញនូវអារម្មណ៍សោកស្ដាយនិងចូលរួមរំលែកទុក្ខចំពោះការបាត់បង់ធនធានមនុស្សគ្មានថ្ងៃវិលវិញនេះផងដែរ។
១. អ្នកនាង ពេជ្រ សូលិកា
«នាងខ្ញុំ នឹង ក្រុមគ្រួសារ សូមចូលរួមសោកស្តាយ នឹង សូមរំលែកទុក្ខពីចំងាយដល់គ្រួសារសពផង»
២. ពិធីករ លោក សុខ រ៉ាស៊ី
«សូមចូលរួមរំលែកទុក្ខ គ្រូពេទ្យស្ម័គ្រចិត្ត ទីមួយ បានស្លាប់ ដោយសារ ជំងឺកូវីត១៩ សូមអោយប្អូនទៅបានសុគតិភព បងប្អូន មានពាក្យអ្វី ចង់រំលែកទុក្ខ ជូនគាត់ អាចComment មក! សូមអគុណនូវការលះបង់ដ៏ធំធេងនេះ ចូលរួមរំលែកទុក្ខដល់ក្រុមគ្រួសារទាំងមូលផង»
៣. កញ្ញា នី មុនីនាថ
«នាងខ្ញុំសូមសំដែងនូវការសោកស្ដាយ និង ការគោរពចំពោះការលះបង់ដ៏ធំធេងទាំងកំលាំងកាយនិងកំលាំងចិត្តដើម្បីប្រយុទ្ធប្រឆាំង COVID-19 របស់វិរះនារីកងទ័ពអាវសជួរមុខ សូមឧទ្ទិសកុសលផលបុណ្យដែលនាងខ្ញុំបានសាងសូមជួយបញ្ជូនវិញ្ញាណក្ខ័ន្តរបស់អ្នកគ្រូពេទ្យទៅកាន់សុគតិភពផងចុះ»
៤. ពិធីករ-តារាសម្ដែង លោក ប៉ែន ចំរុង
«ធ្វើជាពេទ្យមើលថែអ្នកជំងឺបានគ្រប់គ្នា ប្រាប់អ្នកជំងឺអោយរឹងមាំហេតុអី តែពេលនេះអ្នកគ្រូបែជាលាចាកលោកទាំងភាពសោកស្តាយបំផុត សូមសំដែងនូវការគោរពចំពោះការលះបង់ដ៏ធំធេងទាំងកំលាំងកាយនិងកំលាំងចិត្តដើម្បីប្រយុទ្ធប្រឆាំង COVID-19 របស់វិរះនារីកងទ័ពអាវសជួរមុខ សូមឧទ្ទិសកុសលផលបុណ្យដែលខ្ញុំបានសាងសូមជួយបញ្ជូនវិញ្ញាណក្ខ័ន្តរបស់អ្នកគ្រូពេទ្យទៅកាន់សុគតិភពផងចុះ»
៥. តារាចម្រៀង ជ័យ សុវ៉ាត
«អរគុណគ្រប់យ៉ាងដែរអ្នកគ្រូបានលះបង់ដើម្បីប្រទេសរបស់យើង ពួកយើងនិងចងចាំអ្នកគ្រូនៅក្នុងបេះដូងរហូតទៅ»
អ្នកគ្រូពេទ្យ អ៊ឹម ស្រីនិ បានឆ្លងជំងឺកូវី១៩ ហើយត្រូវបានបញ្ជូនមកសំរាកព្យាបាលនៅមជ្ឈមណ្ឌល ព្រីមៀម សែនសុខ កាលពីចុងសប្ដាហ៍មុន មកដល់ថ្ងៃអាទិត្យទី ២៨ វេលាម៉ោង១០យប់ អ្នកគ្រូពេទ្យ បានស្លាប់បាត់បង់ជីវិត ព្រោះអាការៈជំងឺកូវីដ១៩ ធ្វើទុក្ខខ្លាំង រហូតមិនអាចជួយសង្គ្រោះបាន៕
