ផេកផ្លូវការ Miss Grand International បានធ្វើសេចក្ដីប្រកាសហើយថាកម្មវិធី Miss Grand International នឹងប្រារព្ធឡើងនៅខេត្ត ភូកេត ព្រះរាជាណាចក្រថៃ។
មួយរយៈកន្លងមកនេះ ដោយសារតែប្រទេសថៃមានបញ្ហាវិបត្តិនយោបាយផង វិបត្តិរីករាលដាលជំងឺកូវីដ១៩ផង ដូច្នេះរឿងធ្វើជាម្ចាស់ផ្ទះកម្មវិធីប្រកួត Miss Grand International ត្រូវបានជជែកវែកញែកគ្នាខ្លាំងនៅលើសង្គមអនឡាញ ព្រោះតែហ្វេនគាំទ្រកម្មវិធីប្រកួតដ៏ធំនេះ បានយល់ឃើញថាកម្មវិធីអាចនឹងមករៀបចំក្នុងប្រទេសខ្លួន ដោយក្នុងនោះមានប្រទេស កម្ពុជា ប្រទេស ឥណ្ឌូនេស៊ី និងប្រទេសហ្វីលីពីនជាដើម។
កម្ពុជាដែលមានក្រុមហ៊ុនមហាហង្សទទួលបានកម្មសិទ្ធិបញ្ញារៀបចំការប្រកួតជ្រើសរើសស្រីស្អាតក្នុងស្រុក ហាក់មានក្ដីសង្ឃឹមច្រើននឹងបានធ្វើជាម្ចាស់ផ្ទះ ប៉ុន្តែបញ្ហាកញ្ចក់ថវិកាដ៏ច្រើនសន្ធឹកសន្ធាប់ធ្វើឱ្យអ្នកគាំទ្រនៅកម្ពុជាមិនហ៊ានសង្ឃឹមច្រើននោះទេ ខណៈដែលប្រទេសឥណ្ឌូនេស៊ីឯណោះ ក៏ដាក់ការរំពឹងខ្ពស់ថានឹងបានរៀបចំធ្វើជាម្ចាស់ផ្ទះកម្មវិធី MGI 2021 (Miss Grand International) ដូចគ្នា។
ប៉ុន្តែអ្វីៗហាក់បញ្ជាក់យ៉ាងច្បាស់ លែងមានជាមន្ទិលសង្ស័យសម្រាប់អ្នកគាំទ្រទៀត ព្រោះផេក MGI បានធ្វើការផុសវីដេអូបញ្ជាក់ជាផ្លូវការហើយថា កម្មវិធីប្រកួតដ៏ធំនេះនឹងប្រារព្ធឡើងនៅប្រទេសថៃ នាខេត្ត ភូកេត។
កម្មវិធីប្រកួតសម្រស់ដ៏ធំមានសញ្ជាតិដើមថៃនេះនឹងប្រកួតផ្ដាច់ព្រ័ត្រនៅថ្ងៃទី៤ ខែធ្នូ ឆ្នាំ២០២១៕