និយាយពីរឿងភាគកូរ៉េមិនអាចខ្វះឡើយតារាសម្ដែងដែលនឹងធ្វើឱ្យសាច់រឿងនីមួយៗកាន់តែល្អមើលនិងជក់ចិត្ត។ នៅក្នុងចំណោមតារាស្រីស្រស់ស្អាតដ៏ច្រើនដែលមានសមិទ្ធិផលរឿងល្បីៗ និងទាក់ចិត្តអ្នកទស្សនា មានតារាស្រីចំនួន៣ ដែលបានត្រូវអ្នកគាំទ្រយល់ឃើញថាស័ក្ដិសមនឹងរហស្សនាម Queen ឬម្ចាស់ក្សត្រីប្រចាំរឿងភាគកូរ៉េ។
តារាស្រីទាំង ៣រូបដែលសមនឹងងារជាម្ចាស់ក្សត្រីប្រចាំរឿងភាគកូរ៉េ ហើយត្រៀមវិលត្រលប់មកគ្រងបល្ល័ង្កសម្ដែងតាមរយៈរឿងភាគថ្មីរួមមាន៖ Jun Ji Hyun, Song Hye Kyo និង Son Ye Jin ។
១. Jun Ji Hyun ហៅ ឆូ សុងអ៊ី
ស្នាដៃចុងក្រោយរបស់ Jun Ji hyun គឺរឿង «Kingdom: Ashin of The North» ប៉ុន្តែតារាស្រីរូបនេះក៏នឹងត្រៀមមានខ្សែភាពយន្តភាគបែបរន្ធត់រឿង «Cliffhanger» ជាមួយនឹងតារាសម្ដែងរូបសង្ហា Ju Ji hoon ដើម្បីស្វែងរកមនុស្សដែលបាត់ខ្លួននៅតំបន់ភ្នំជីរី។ រឿងភាគចុងក្រោយដែល Jun Ji hyun សម្ដែងគឺរឿង «Legend of the Blue Sea» ដែលបានបញ្ចាំងកាលពីឆ្នាំ២០១៦ ចាប់ដៃគូជាមួយនឹង Lee Min Ho ។
២. Song Hye Kyo ហៅ ហាន់ ជីអ៊ុន
ភាពយន្តកំប្លែងបែបមនោសញ្ចេតនា Now We Are Breaking up គឺជាស្នាដៃថ្មីបន្ទាប់ពីស្នាដៃចុងក្រោយរឿង «Encounter» ដែលតារាស្រីវ័យ៤០ឆ្នាំរូបនេះសម្ដែងជាមួយនឹងតួប្រុសវ័យក្មេង Park Bo Geum កាលពីឆ្នាំ ២០១៨។ Now We Are Breaking Up បានកំណត់កាលបរិច្ឆេទបញ្ចាំងនៅខែវិច្ឆិកា ឆ្នាំ២០២១ខាងមុខនេះ។ រឿងនេះ Song Hye Kyo សម្ដែងជាតួអង្គ ប្រធានគ្រប់គ្រងផ្នែករចនាម៉ូដ. សម្រាប់រឿងនេះតួឯកប្រុសគ្មានអ្នកណាក្រៅពី Jang Ki young បុរសសង្ហាតួអង្គកញ្ជ្រោងកន្ទុយ៩ពីភាពយន្ត «My Roommate is A Ghumiho» នោះទេ។
៣. Son Ye Jin
តារាស្រីវ័យ៣៩ឆ្នាំ ដែលទទួលបានជោគជ័យយ៉ាងខ្លាំងតាមរយៈភាពយន្តភាគ Crash Landing On You កាលពីរវាងឆ្នាំ២០១៩-២០២០ មិនទាន់ទទួលសម្ដែងរឿងភាគឬភាគយន្តណាថ្មីនៅឡើយទេ។ ប៉ុន្តែថ្មីៗនេះ Son Ye Jin បានសម្រេចចិត្តចូលរួម Project សម្ដែងរឿងភាគថ្មីដែលនឹងត្រៀមបញ្ចាំងនៅពាក់កណ្ដាលឆ្នាំ២០២២។ រឿងនោះមានចំណងជើងថា «Thirty Nine» ដែលជារឿងបរិយាយពីមិត្តភាពរបស់មិត្តភក្ដិចំនួន៣នាក់តាំងពីរៀនជាមួយគ្នារហូតដល់អាយុ៣៩ឆ្នាំ។
តារាស្រីទាំង៣ដែលទទួលបានងារជាម្ចាស់ក្សត្រីប្រចាំរឿងកូរ៉េមិនមែនដោយភាពចៃដន្យនោះទេ ប៉ុន្តែស្ត្រីទាំង៣រូបនេះមានសមត្ថភាពនិងស្នាដៃដែលមានការទទួលស្គាល់ច្រើនពីអ្នកគាំទ្រទាំងជាតិនិងអន្តរជាតិ៕
ទស្សនាវិដេអូព័ត៌មានខាងក្រោមនេះ៖