តើអ្នកធ្លាប់មានអារម្មណ៍ថា ហើមមុខក្រោយពេលភ្ញាក់ពីដំណេក រៀងរាល់ព្រឹកព្រលឹមទេ? ការហើមមុខនេះមិនបង្កជាគ្រោះថ្នាក់ដល់សុខភាពអ្វីទេ គឺវាអាចស្រកមកជាធម្មតាវិញ ប៉ុន្ដែប្រសិនបើការហើមមុខរំខានដល់អ្នករយៈពេលយូរ ហើយមុខរបស់អ្នកនៅតែហើម រឺ ប៉ោងជាងមុន នោះវាអាចបណ្ដាលមកពីអ្នកប្រតិកម្ម អាលែកហ្ស៉ី ឬ បញ្ហាសុខភាពប្រចាំកាយរបស់អ្នក។
តោះ! មកដឹងពីចំណុចសំខាន់ៗ ដែលធ្វើឲ្យមុខរបស់អ្នកហើម៖
១) ការគេងមិនត្រឹមត្រូវ ៖ ការគេងខ្នើយខ្ពស់ពេកអាចធ្វើឲ្យសារធាតុរាវកកើតឡើងដែលបណ្ដាលមកពីសម្ពាធរបស់ខ្នើយ។ ហេតុនេះ អ្នកគួរតែគេងដោយមិនប្រើខ្នើយខ្ពស់ រឺ គេងផ្ទាល់នឹងពូកតែម្ដង និងព្យាយាមគេងផ្អៀងទៅខាងឆ្វេងទើបជាការប្រសើរ។
២) ផឹកស្រាច្រើន ៖ អ្នកអាចមានអាការៈ ឈឺក្បាល ធីងធោង ដោយសារតែការញុំាស្រាច្រើនពេក នៅពេលយប់មុនដំណេក។ ជួនកាលអាចបណ្ដាលមកពីការ ញុំាអាហារប្រៃពេក កំឡុងពេលញុំាគ្រឿងស្រវឹង ដែលបណ្ដាលឲ្យរលាករាងកាយ និង មុខ ព្រោះនៅពេលដែលយើងញុំាំប្រៃខ្លាំងពេក វាអាចធ្វើឲ្យអ្នកកើតជំងឺទឹកនោមផ្អែមផងដែរ។
៣) ការប្រែប្រួលអ័រម៉ូន ៖ ការប្រែប្រួលអ័តម៉ូនភាគច្រើនកើតលើស្រ្តី ព្រោះអាចប្រែប្រួលនៅពេលដែលមករដូវ ការអស់រដូវ ឬ ស្ត្រីមានផ្ទៃពោះ។ ប៉ុន្តែ ការប្រែប្រួលនេះនឹងត្រលប់មករកសភាពធម្មតាវិញ នៅពេលដែលវដ្ដអ័រម៉ូនមានស្ថិរភាព។ ចំណែកការហើមមុខរបស់ក្មេងស្រីវ័យជំទង់ គឺជាប្រាប់ឲ្យដឹងថា នេះជាសញ្ញានៃការជិតមានវដ្តរដូវលើកដំបូង។
៤) ស្រ្តេស ៖ ការស្ត្រេសក៏ជាផ្នែកមួយដែលបណ្ដាលឲ្យអ្នកហើមមុខផងដែរ ប្រសិនបើយើងស្ត្រេសច្រើនពេក វាអាចធ្វើឲ្យកម្រិតអ័រម៉ូន Cortisol កើនឡើង ដែលបណ្ដាលឲ្យរលាកពាសពេញរាងកាយ ព្រមទាំងផ្ទៃមុខ។ ដូច្នេះហើយ ទើបអ្នកដែលស្ត្រេសភាគច្រើនមានអាការៈហើមមុខនៅពេលព្រឹកព្រលឹមជាញឹកញាប់៕
ប្រភព៖ WebMD
