កើតជាកូនប្រុសរបស់បុគ្គលល្បីលំដាប់ពិភពលោកដូចជា Angelina Jolie និង Brad Pitt ច្បាស់ជាមិនអាចគេចផុតបានទេពីការឃ្លាំមើលនិងតាមដានពីសំណាក់អ្នកសារព័ត៌មាននិងសាធារណជន ទោះជាឪពុកម្ដាយដ៏ល្បីល្បាញរបស់រូបគេព្យាយាមយ៉ាងពេញទំហឹងដើម្បីការពារជីវិតឯកជនរបស់កូនៗក្ដី។
Maddox Jolie-Pitt ថ្វីត្បិតត្រឹមជាកូនដែល Angelina Jolie និង Brad Pitt យកមកចិញ្ចឹមបីបាច់ ប៉ុន្តែអ្នកកំលោះវ័យ ១៩ឆ្នាំ គឺជាកែវភ្នែកនិងជាបេះដូង ជាកូនប្រុសច្បងដែលធ្វើឱ្យអ្នកស្រី Angelina Jolie ស្គាល់ពាក្យថាម្ដាយ។
1.ឈ្មោះដំបូងរបស់ Maddox កូនប្រុសច្បងក្នុងត្រកូល Jolie-Pitt
មនុស្សជាច្រើនអាចនឹងមិនដឹងទេថាឈ្មោះដើមរបស់ Maddox គឺ Rath Vibol កុមារាជនជាតិកម្ពុជា កូនប្រុសច្បង ដែល Angelina Jolie និង Brad Pitt យកមកចិញ្ចឹមបីបាច់ពីមណ្ឌលកុមារកំព្រា ក្នុងខេត្តបាត់ដំបង កាលពី២០០២ ខណៈនៅត្រឹមជាទារកវ័យ៧ ខែ។ ទារកតូចដែលធ្វើឱ្យតារាសម្ដែងល្បីឈ្មោះលំដាប់ពិភពលោកស្គាល់ពាក្យថាម៉ែ កូនប្រុសរូបនេះទទួលបានការស្រលាញ់ ថែទាំ និងយកចិត្តទុកដាក់យ៉ាងខ្លាំងពីម្ដាយរបស់ខ្លួនអ្នកស្រី Angelina Jolie ប្រៀបដូចជាកូនបង្កើតដែលកើតចេញពីផ្ទៃរបស់ខ្លួនដូច្នោះដែរ។
2. Maddox គឺជាកម្លាំងជំរុញទឹកចិត្តក្នុងការបង្កើតមូលនិធិ Jolie-Pitt
ប្រទេសកម្ពុជាប្រៀបដូចជាផ្ទះទីពីរសម្រាប់ Angelina Jolie ក៏ថាបានដែរ ម្យ៉ាងវិញទៀតស្ត្រីដ៏ល្បីរូបនេះ បានលង់ស្រលាញ់ប្រទេសកម្ពុជាព្រោះជាទឹកដីកំណើតកូនប្រុសដំបូងរបស់ខ្លួន។ ក្នុងឋានៈជាបេសកជនពិសេសរបស់ឧត្តមស្នងការអង្គការសហប្រជាជាតិសម្រាប់ជនភៀស(UNHCR) Jolie បានបង្កើតមូលនិធិ Maddox Jolie-Pitt ដែលជាមូលនិធិជួយសង្គ្រោះដល់ពលរដ្ឋកម្ពុជាដែលក្រខ្សត់និងជួយគាំទ្រដល់ស្ត្រីជាពិសេសធ្វើការងារអនុរក្សមរតកធម្មជាតិរបស់កម្ពុជា ក្នុងនោះមានធម្មជាតិ និងសត្វព្រៃ។ ក្រៅពីនេះ Angelina Jolie នៅបង្កើតមណ្ឌលកុមារកំព្រា Maddox Chivan នៅក្នុងក្រុងភ្នំពេញដែលជាផ្ដោតសំខាន់លើកុមារកើតជំងឺអេដស៍ឬកុមារងាយរងគ្រោះព្រោះជំងឺអេដស៍ ដោយមជ្ឈមណ្ឌលនេះបង្កើតឡើងដើម្បីជាកិត្តិយសដល់កូនប្រុសច្បងរបស់ខ្លួន។
3.ប្ដូរជីវិតពីកូនសេដ្ឋីក្លាយជាក្មេងគេងក្នុងអន្តេវាសិកដ្ឋាន
ជីវិតរបស់ Maddox រស់ក្នុងភាពស្រណុកសុខស្រួលមិនបាច់លំបាកធ្វើអ្វីនោះទេ ព្រោះជាកូនប្រុសច្បងរបស់បុគ្គលល្បីមានកេរ្តិ៍ឈ្មោះលំដាប់ពិភពលោក។ តាំងពីតូចរហូតធំដឹងក្ដីគេរស់ក្នុងភូមិគ្រឹះតម្លៃវាល់លានដុល្លារ ប៉ុន្តែគ្រប់យ៉ាងបានផ្លាស់ប្ដូរនៅពេល Maddox សម្រេចចិត្តផ្លាស់ទៅសិក្សានៅប្រទេសកូរ៉េ ក្នុងមហាវិទ្យាល័យយ៉ន់សេ មុខជំនាញគីមីវិទ្យា។ ក្រៅពីត្រូវបែកផ្ទះហើយ Maddox ត្រូវគេងរួមបន្ទប់ជាមួយនឹងមិត្តរួមបន្ទប់ និង ត្រូវប្រើបន្ទប់ទឹករួមជាមួយនឹងអ្នកផ្សេងផងដែរ។
4. សម្ព័ន្ធភាពរវាងឪពុកនិងកូនប្រេះឆា
កាលពីឆ្នាំ ២០១៦ មានលេចចេញដំណឹងលែងលះគ្នារវាង Angelina Jolie និង Brad Pitt ធ្វើឱ្យកក្រើកពិភពសិល្បៈ ឬអាចនិយាយបានថាព័ត៌មានអាស្រូវដែលល្បីល្បាញពេញពិភពលោក។ សារព័ត៌មានធំៗបានបញ្ចេញព័ត៌មានពាក់ព័ន្ធនឹងមូកហេតុសំខាន់ដែលធ្វើឱ្យគូស្នេហ៍ដ៏មានឥទ្ធិពលមួយគូនេះចែកផ្លូវគ្នាយ៉ាងទាន់ហន់ ដោយមូលហេតុនោះកើតចេញពី Brad Pitt និង Maddox បានឈ្លោះប្រកែកគ្នាខ្លាំងលើយន្តហោះផ្ទាល់ខ្លួន ខណៈដែលគ្រួសាររបស់ខ្លួនធ្វើដំណើរពីបារាំងទៅ L.A. សហរដ្ឋអាមេរិក។ ព័ត៌មានបានផ្សាយទៀតថា Brad Pitt បានប្រើហិង្សាលើ Maddox ដោយសារតែកូនប្រុសច្បងរូបនេះបានចេញមុខការពារម្ដាយ ព្រោះតែខឹងដែលភរិយាស្នើសុំឱ្យគេស្ងាត់មាត់។ ព័ត៌មាននៅផ្សាយទៀតថាមូលហេតុនេះហើយដែលធ្វើឱ្យ Maddox បដិសេធមិននិយាយស្ដីជាមួយនឹងឪពុករបស់ខ្លួនរហូតមកដល់បច្ចុប្បន្នទោះជា Brad Pitt ព្យាយាមចូលទៅជិតនិងសាងសម្ព័ន្ធភាពជាមួយនឹងកូនប្រុសយ៉ាងណាក្ដី៕
បច្ចុប្បន្ននេះ Maddox Chivan Jolie Pitt មានអាយុ ២០ឆ្នាំ បុរសវ័យក្មេង រូបនេះកើតនៅថ្ងៃទី៥ ខែសីហា ឆ្នាំ២០០១ ជានិស្សិតកំពុងសិក្សាជំនាញគីមីវិទ្យា នៅសកលវិទ្យាល័យ យ៉ន់សិ ក្នុងប្រទេសកូរ៉េខាងត្បូង៕
ទស្សនាវីដេអូព័ត៌មាននេះខាងក្រោម៖
