នៅថ្ងៃទី២ ខែកញ្ញា ឆ្នាំ២០២១ វេលាម៉ោងប្រមាណជាង ៥ល្ងាច តារាសម្ដែងនិងជាពិធីករវ័យក្មេង លោក យក់ ឆេងហាក់ បានធ្វើការបង្ហោះថាមានជនអនាមិកបានប្រើរូបលោកយកទៅបោកប្រាស់ចិត្តនិងលុយពីមនុស្សស្រីអស់រាប់ពាន់ដុល្លារ។
យោងតាមការបង្ហោះរបស់លោកនៅលើបណ្ដាញសង្គម លោកបាននិយាយថានេះមិនមែនជាលើកទីមួយឡើយដែលជនខិលខូចប្រើប្រាស់រូបថតលោកទៅបង្កើត Account ក្លែងក្លាយ ដើម្បីយកទៅបោកប្រាស់លុយពីមនុស្សស្រី ក្រោមរូបភាពផ្សេងៗ។
តួសម្ដែងពីភាពយន្តភាគខ្មែររឿង «កញ្ញាមុខឈើ» រូបនេះបានអះអាងថារូបលោកប្រើប្រាស់គណនីហ្វេសប៊ុកតែមួយគត់ដែលដាក់ឈ្មោះពិតរបស់លោកផ្ទាល់គឺ យក់ ឆេងហាក់ ជាភាសាអង់គ្លេស (Youk Chhenghak) ចំពោះគណនីមានឈ្មោះផ្សេងៗ មិនមែនជារបស់លោកនោះទេ។
សារព័ត៌មានត្រយងបានធ្វើការទំនាក់ទំនងទៅកាន់តារារូបនេះដើម្បីសាកសួរឱ្យកាន់តែកម្អិតចំពោះបញ្ហាដែលលោកកំពុងតែប្រឈមដោយលោកបានឆ្លើយតបមកថា៖ «គណនីដែលបានយករូបលោកទៅប្រើប្រាស់នោះបានដាក់ឈ្មោះថា វណ្ណា រ៉ុងរ័ត្ន (Vanna Rong Rath) ហើយគណនីនោះបានយកទៅទាក់ទងជាមួយនារីម្នាក់ ដោយបច្ចុប្បន្ននារីរូបនោះ បានយល់ច្រឡំហើយ ចោទប្រកាន់លើរូបលោក ថែមទាំងផុសបរិហាកេរ្តិ៍លោកលើបណ្ដាញសង្គម ដែលធ្វើឱ្យប៉ះពាល់ដល់កិត្តិយសរបស់លោកជាខ្លាំង»
លោក យក់ ឆេងហាក់ ប្រាប់មកកាន់សារព័ត៌មានត្រយងដែរថានេះមិនមែនជាលើកទីមួយឡើយដែលលោកជួបរឿងអកុសល ហើយត្រូវគេយល់ច្រឡំ ដូចដែលលោកបានផុសលើបណ្ដាញសង្គមយ៉ាងដូច្នោះដែរ មានអ្នកខ្លះទៀតបានយករូបលោកទៅសន្យារៀបការជាមួយនឹងគេ ដែលធ្វើឱ្យត្រូវប្រឈមមុខនឹងគ្រួសារខាងស្រីក៏មាន។
លោកក៏បានបង្ហាញការសោកស្ដាយខ្លាំងដែរដែលមានមនុស្សត្រូវចាញ់បោក និងរងគ្រោះអស់ប្រាក់ដោយសារតែជនខិលខូចបានប្រើប្រាស់រូបថតរបស់លោក ប៉ុន្តែជាយោបល់របស់លោក លោកស្នើសុំឱ្យជនរងគ្រោះត្រលប់ទៅស្រាវជ្រាវគណនីនោះឡើងវិញ។
តារាសម្ដែងរូបនេះក៏បានបញ្ជាក់ថាលោកកំពុងតែស្វែងរកដំណោះស្រាយដោយលោកបានស្នើទៅកាន់នាយកដ្ឋានប្រឆាំងបទល្មើសបច្ចេកវិទ្យា (Anti Cyber Crime) ព្រមទាំងកំពុងសិក្សា ដាក់ពាក្យបណ្ដឹងទៅកាន់សមត្ថកិច្ចដើម្បីការពារភាពស្អាតស្អំ និងកិត្តិយសកេរ្តិ៍ឈ្មោះលោក និងក្រុមគ្រួសាររបស់លោក។
ជាចុងក្រោយលោក យក់ ឆេងហាក់ បានអះអាងថា លោក មិនមានប្រើប្រាស់គណនីក្លែងក្លាយនោះទេ ហើយលោកក៏មិនដឹងរឿងដូចការចោទប្រកាន់ណាមួយនោះដែរ ជាពិសេសនោះលោករូបផ្ទាល់ ក៏កំពុងតែសិក្សាផ្លូវច្បាប់ដើម្បីស្វែងរកយុត្តិធម៌និងភាពស្អាតស្អំសម្រាប់ខ្លួនលោកត្រលប់មកវិញផងដែរ៕