ថ្មីៗនេះមានគណនីហ្វេសប៊ុកមួយដែលមានឈ្មោះថា Aza Be Strong បានចេញមកទម្លាយរឿងរ៉ាវចម្រូងចម្រាសមួយថា មេតុងទីន (តារាស្រី សឿ សុធារ៉ា) របស់ខ្លួន មានចេតនាគេចវេស មិនព្រមទូទាត់លុយដើមដែលនៅសល់ចំនួនរាប់ពាន់ដុល្លារឱ្យដល់ខ្លួននោះទេ ព្រោះទាក់ទងតាមទូរស័ព្ទក៏មិនលើក ហើយផ្ញើសារក៏មិនខ្ចីតបទៀត។
យោងតាមសម្ដីនារីខាងលើដែលបានអះអាងថាខ្លួនគឺជាកូនតុងទីនរបស់តារាសម្ដែងវ័យជ្រេ អ្នកនាង សឿ សុធារ៉ា បានបង្ហោះនៅលើបណ្ដាញសង្គមដង្ហើយរកយុត្តិធម៌ ជាពិសេសនោះគឺស្នើឱ្យអ្នកនាង សឿ សុធារ៉ា ជួយទូទាត់លុយនៅសល់ឱ្យដល់ខ្លួន ព្រោះលេងតុងទីនជាមួយគ្នា ៧ទៅ ៨ខែមកនេះ រូបខ្លយនខាតបង់ មិនមានចំណេញឡើយ ដល់ថ្នាក់ខ្លួនសុខចិត្តសម្រួលយកតែដើមហើយ ក៏នៅព្រមសងទៀត។
អ្នកនាង Aza Be Strong ក៏ដាក់ជាសំនួរដែរថា «បងដេញតុងទីនកូនផ្សេងៗយកលុយហើយ រាប់ម៉ឺនយកទៅណាបង?» ស្ត្រីរូបនេះក៏បានបន្ថែមដែរថា «រូបខ្លួនខិតខំរកស៊ីតូចតាច លក់បន្លែ លក់ផ្អក លក់ម៉ាំ បានលុយតិចតួច យកទៅបង់ឱ្យបង សង្ឃឹមថានឹងបានការ ប្រាក់ បានចំណេញខ្លះ ប៉ុន្តែអ្វីដែលខ្លួនបានទទួលគឺខាតពេលវេលា មិនចំណេញហើយបង់ដើមឱ្យទាំងវេទនាទៀត…។»
តាមរយៈវីដេអូឆ្លើយឆ្លងសារដែលត្រូវបានទម្លាយចេញមកក្រៅដោយកូនតុងទីនខាងលើនេះ សង្កេតឃើញថាភាគីអ្នកនាង សឿ សុធារ៉ា បានព្យាយាមទូទាត់ថវិកាជូនកូនតុងទីន ដោយផ្ញើជាប្រាក់ម្ដង១០០០ដុល្លារ ១៥០០ដុល្លារ តាមរយៈABA ដែរ ទើបតែបាត់ការឆ្លើយឆ្លងចុងក្រោយនេះប៉ុណ្ណោះ។
សារព័ត៌មានត្រយង បានព្យាយាមទាក់ទងទៅកាន់ទូរស័ព្ទដៃរបស់អ្នកនាង សឿ សុធារ៉ា ដើម្បីសុំការបកស្រាយជុំវិញរឿងរ៉ាវខាងលើនេះដែរ ប៉ុន្តែមិនមានការឆ្លើយតប ប្រសិនបើមានដំណឹងអ្វីជាបន្តទៀតនោះ សារព័ត៌មានត្រយងនឹងលើកយកមកផ្សាយជាបន្តបន្ទាប់ទៀត៕
ស្ដាប់វីដេអូសន្ទនារវាងអ្នកនាង Aza Be Strong និងអ្នកនាង សឿ សុធារ៉ា ខាងក្រោមនេះ៖