ប្រតិភូកីឡាពិការកម្ពុជា មាន២រូប គឺលោក យី សុភក្ត្រា ទទួលបន្ទុកនាយបេសកកម្ម និងកីឡាករ វ៉ាន វ៉ុន ត្រូវធ្វើដំណើរត្រឡប់មកមាតុភូមិវិញនៅយប់ថ្ងៃអង្គារ នេះ ក្រោយចប់បេសកកម្មក្នុងព្រឹត្តិការណ៍កីឡាប៉ារ៉ាឡាំពិក Paralympic Games 2020 នៅទីក្រុងតូក្យូ ប្រទេសជប៉ុន។
លោក យី សុភក្ត្រា បានបញ្ជាក់នៅលើហ្វេសប៊ុករបស់លោកថាប្រតិភូកីឡាប៉ារ៉ាឡាំពិកកម្ពុជា ចាកចេញពីប្រទេសជប៉ុន នៅវេលាម៉ោង ២២:៥៥ ថ្ងៃអង្ការ ទី៧ ខែកញ្ញា (ម៉ោងនៅជប៉ុន) និងគ្រោងមកដល់អាកាសយាន្តដ្ឋានអន្តរជាតិភ្នំពេញ នៅម៉ោង១៧:៣០ ថ្ងៃ ពុធ ទី ៨ ខែកញ្ញា ហើយត្រូវធ្វើចត្តាឡីស័ក១៤ថ្ងៃ តាមវិធានការក្រសួងសុខាភិបាល។
អត្ថបទពាក់ព័ន្ធ៖ប្រទេសអាស៊ានស្ពាយមេដាយ៣៥គ្រឿងពីព្រឹត្តិការណ៍កីឡាប៉ារ៉ាឡាំពិកនៅជប៉ុន
សម្រាប់លទ្ធផលប្រកួតរបស់កីឡាករ វ៉ាន វ៉ុន បានប្រកួតក្នុងវិញ្ញាសាប្រណាំងរទះផ្នែកបុរសMen’s 100 Metres T54 បានឆ្លងផុតវគ្គជម្រុះក្នុង Heats 1 ក្រោយឈរលេខ២ ដែលប្រើថិរវេលា១៤.៣៩វិនាទី។ លទ្ធផលនេះបានធ្វើឱ្យកីឡាករកម្ពុជា មានឈ្មោះឡើងបន្តទៅប្រកួតជុំផ្ដាច់ព្រ័ត្រ តែលទ្ធផលធ្វើបានថិរវេលា១៤.២១ វិនាទីឈរលេខ៨ ហើយកីឡាករថៃ Athiwat Paeng-nuea ឈ្នះមេដាយមាស ក្រោយធ្វើបានថេរវេលា១៣.៧៦ វិនាទី៕