តារាចម្រៀងជើងចាស់មានឈ្មោះល្បី អ្នកនាង ម៉េង កែវពេជ្ជតា បានបង្ហោះវីដេអូកូនប្រុសស្រីទាំងពីររបស់ខ្លួន ព្រមទាំងពោលសរសើរលើទេពកោសល្យសិល្បៈរបស់កូនដែលអាចលេងឧបករណ៍តន្ត្រីដូចជា ព្យ៉ាណូ និង ហ្គីតាបានយ៉ាងល្អ ប៉ុន្តែបែរជាមានអ្នកចូលមក Comment ធ្វើឱ្យអ្នកស្រីឆេះដុំខឹងតូង ចំពោះការលើកឡើងនោះ។
អ្នកនាង ម៉េង កែវពេជ្ជតា បានធ្វើការតបតខ្លាំងៗចំពោះការលើកឡើងរបស់អ្នកលេងបណ្ដាញសង្គមមួយរូបដែលបានឱ្យតម្លៃថាកូនៗរបស់អ្នកស្រីមានទេពកោសល្យពូកែខាងសិល្បៈ ព្រោះតែទទួលបានហ្សែនពីខាងឪពុក។
កាលពីថ្ងៃទី៦ ខែកញ្ញា ឆ្នាំ២០២១ អ្នកមេម៉ាយកូនពីរបានបង្ហោះវីដេអូចំនួនពីរដោយវីដេអូទីមួយបានពោលសរសើរចំពោះកូនប្រុសច្បងដែលកំពុងលេងព្យ៉ាណូ ថាបង្ហាញពីអារម្មណ៍ស្ងប់ គំនិតចាស់ទុំ ពីរោះរលូនល្អ និងពេញដោយថាមពល។ ចំណែកវីដេអូទីពីរគឺជាវីដេអូកូនស្រីលេងហ្គីតា ដោយអ្នកស្រីលើកឡើងថា ទើបតែរៀនតែទឹកដៃដូចមនុស្សធំ ពីរោះរស់វើក។ ភ្ជាប់ជាមួយនឹងដុងសិល្បៈពេញខ្លួនរបស់កូនអ្នកស្រីក៏បានលើកសរសេរថាកូនពូកែ ឆ្លាត ស្អាតទាក់ទាញ មានចរិតនិស្ស័យថ្លៃថ្នូរដោយបានឱ្យកូនខិតខំបន្តទៀតដើម្បីថែរក្សាកេរ្តិ៍ដំណែលដូនតា។
ទន្ទឹមនឹងការលើកឡើងរបស់អ្នកនាងក៏មានអ្នកគាំទ្របានសរសើរចំពោះអ្នកមេម៉ាយរូបនេះថាចិញ្ចឹមបីបាច់កូនប្រុសស្រីបានយ៉ាងល្អ ក៏មាន មតិមួយបានលើកឡើងថា «មកពីហ្សែនឪពុករបស់គេល្អ»។ ពាក្យខ្លីប៉ុន្មានម៉ាត់នេះបានធ្វើឱ្យតារាជើងចាស់ខឹងតូសរហូតធ្លោយប្រើសម្ដីប្រមាថជាច្រើនលើបុគ្គលខ្វះសីលធម៌សុជីវធម៌រូបនោះ ដោយអ្នកនាងបានតបតថាកូនរបស់អ្នកនាងកាត់រកឪពុកយ៉ាងម៉េច បើអតីតស្វាមីគ្មានចេះសិល្បៈអ្វីសូម្បីតែបន្តិចនោះ?
យោងតាមរយៈការឆ្លើយតបនេះ សង្កេតឃើញថាអ្នកនាងដូចជាអាចកំណត់អត្តសញ្ញាណបុគ្គលរូបនោះ ព្រោះអ្នកនាងគំរាមប្ដឹងទៅលើគណនីដែលបានក្លែងអត្តសញ្ញាណខ្លួននោះថែមទៀតផង។
អ្នកនាង ម៉េង កែវពេជ្ជតា បានលែងលះជាមួយនឹងអតីតស្វាមីលោក មួង ឃីម ជាង ១០ឆ្នាំហើយ ប៉ុន្តែអ្នកស្រីបានបន្តឱបឈ្មោះជាស្ត្រីមេម៉ាយ ហើយចិញ្ចឹមបីបាច់កូនប្រុសស្រីទាំងពីរគឺកុមារា ពេជ្រ រតនៈ និងកុមារី ពេជ្ជតា សង្វាពេជ្រ៕