ក្រុមបាល់ទាត់ភ្នំពេញក្រោន បានយកឈ្នះលើក្រុមអគ្គស្នងការដ្ឋាននគរបាលជាតិ (ប៉ូលិស) ដោយលទ្ធផល៤-១ នៅល្ងាចថ្ងៃពុធ ទី៨ ខែកញ្ញា ឆ្នាំ២០២១ នេះលើទីលានកីឡដ្ឋាន 7NG ប្រចាំសប្ដាហ៍ទី៧ ដែលនៅសេសសល់នៃពានរង្វាន់លីគកំពូលកម្ពុជា Metfone Cambodian League 2021។
ការប្រកួតដែលចាប់ផ្ដើមពីម៉ោង៣:៣០នាទីរសៀលក្រុមភ្នំពេញក្រោន រកគ្រាប់បាល់ជ័យជម្នះដោយថ្វីជើងកីឡាករប្រេស៊ីល Matheus Souza E Silva នៅនាទី២៧ ហើយកីឡាករជប៉ុន Yudai Ogawa បន្ថែមគ្រាប់បាល់ទី២នៅនាទី២៩។ ចូលដល់តង់ទី២ កីឡាករជនជាតិកូឡុំប៊ី Andres Nieto រកបានគ្រាប់បាល់បន្ថែម២គ្រាប់ទៀតនៅនាទីទី៥៨ និងនាទី៧១។ យ៉ាងណាក្តីកីឡាករជប៉ុន Otani Soma រកជួយរកគ្រាប់បាល់វាយបកបាន១គ្រាប់វិញឱ្យក្រុមអគ្គស្នងការដ្ឋាននគរបាលជាតិ វិញនៅនាទីទី៨២ ក្រោយទាត់បាល់ពិន័យ១១ម៉ែត្របានសម្រេច។
ប្រកួតនេះដែរកីឡាករ Yudai Ogawa ត្រូវពិន័យកាតក្រហម ស្របពេលកីឡាករ Andres Nieto ជាប់ឈ្មោះជាកីឡាករលេងល្អប្រចាំការប្រកួត (MVP)។
គិតត្រឹមពេលនេះភ្នំពេញក្រោន និងក្រុមវិសាខា មិនទាន់ស្គាល់បរាជ័យដូចគ្នា ក្រោយប្រកួតបាន១១លើកមកនេះ។
សម្រាប់កម្មវិធីប្រកួតបន្ទាប់ ក្នុងពានរង្វាន់លីគកំពូលកម្ពុជា នឹងបន្តធ្វើនៅរសៀលថ្ងៃព្រហស្បតិ៍ សប្ដាហ៍នេះដោយក្រុមអាស៊ីអឺរ៉ុប ប៉ះសូលទីឡូអង្គរ ក្នុងសប្ដាហ៍ទី១១ នៅវេលាម៉ោង៣:៣០នាទីរសៀលលើទីលានកីឡដ្ឋាន AEU Sport Part ព្រមទាំងផ្សាយផ្ទាល់តាមប៉ុស្តិ៍ BTV News ផងដែរ៕
រូបថត៖CNCC
