លោក Carlos Queiroz ត្រូវបានសហព័ន្ធកីឡាបាល់ទាត់អេហ្ស៊ីប តែងតាំងជាអ្នកចាត់ការរបស់ក្រុមជម្រើសជាតិបាល់ទាត់បុរសរបស់ខ្លួនដើម្បីត្រៀមបេសកកម្មក្នុងវគ្គជម្រុះពានរង្វាន់ជើងឯកពិភពលោក 2022 FIFA World Cup Qatar ប្រចាំទ្វីបអាហ្វ្រិក ក្រោយចែកផ្លូវគ្នាជាមួយលោក Hossam al-Badry ដែលជាអ្នកចាក់ការក្រុមចាស់កាលពីថ្ងៃចន្ទ ថ្មីៗនេះ។
បើតាមការបញ្ជាក់របស់សហព័ន្ធកីឡាបាល់ទាត់អេហ្ស៊ីប នៅយប់ថ្ងៃពុធ សប្ដាហ៍នេះថាបុរសជនជាតិព័រទុយហ្គាល់ រូបនេះបានក្លាយជាអ្នកចាត់ការទូទៅថ្មីរបស់ក្រុមជម្រើសជាតិខ្លួន។
អត្ថបទពាក់ព័ន្ធ៖ជម្រុះ World Cup៖ អេហ្ស៊ីប បណ្តេញអ្នកចាត់ការទូទៅ ចោលក្រោយស្មើជាមួយហ្គាបុង
បុរសវ័យ៦៨ឆ្នាំរូបនេះធ្លាប់ធ្វើជាជំនួយការក្លិបបាល់ទាត់ Manchester United នៅប្រទេសអង់គ្លេស ក្នុងរជ្ជកាលលោក Alex Ferguson ជាអ្នកចាត់ការទូទៅរបស់ក្រុមចំនួន២លើកគឺនៅចន្លោះឆ្នាំ២០០២-២០០៣ និងឆ្នាំ២០០៤-២០០៨។ ក្រៅពីនោះលោកធ្លាប់ដឹកនាំក្លិបមួយចំនួនទៀតដូចជាSporting CP នៅព័រទុយហ្គាល់ New York Red Bulls នៅអាមេរិកNagoya Grampus Eight នៅជប៉ុន និង Real Madrid របស់អេស្ប៉ាញ ចន្លោះឆ្នាំ២០០៣-២០០៤។
ដោយឡែកការងារនៅក្រុមជម្រើសជាតិវិញ លោកធ្លាប់ដឹកនាំក្រុមជម្រើសព័រទុយហ្គាល់ ឈុតយុវជនក្រោមអាយុ២០ឆ្នាំ និងក្រុមឈុតធំ ចន្លោះឆ្នាំ២០៨៩ ដល់១៩៩៣ ហើយនៅឆ្នាំ១៩៩៨ ដល់១៩៩៩ លោកដឹកនាំក្រុមជម្រើសជាតិអារ៉ាប់រួម នៅអាស៊ី មុនបន្តដឹកនាំក្រុមអាហ្វ្រិកខាងត្បូង នៅអាហ្វ្រិក ចន្លោះឆ្នាំ២០០០-២០០២ ហើយនៅឆ្នាំ២០០៨ ដល់២០១០ លោកត្រឡប់ទៅដឹកនាំក្រុមព័រទុយហ្គាល់ នៅទ្វីបអឺរ៉ុបវិញ។ ពីឆ្នាំ២០១១ ដល់២០១៩ លោកដឹកនាំក្រុមអ៊ីរ៉ង់ នៅអាស៊ី ហើយពីឆ្នាំ២០១៩ ដល់២០២០ លោកដឹកនាំក្រុមកូឡុំប៊ី នៅទ្វីបអាមេរិកខាងត្បូង។
អត្ថបទពាក់ព័ន្ធ៖សហព័ន្ធបាល់ទាត់ទ្វីបអាហ្វ្រិក គាំទ្រគំនិតប្រកួត World Cup ២ឆ្នាំម្តង ព្រោះចំណេញខ្លាំង
លោក Carlos Queiroz ត្រូវដឹកនាំក្រុមជើងឯកទ្វីបអាហ្រ្វិក ៧សម័យកាលមួយនេះជួបក្រុមលេខ១ក្នុងពូលF ជុំទី២ ក្នុងវគ្គជម្រុះពានរង្វាន់ជើងឯកពិភពលោក 2022 FIFA World Cup Qatar ប្រចាំទ្វីបអាហ្វ្រិក គឺ លីប៊ី នៅថ្ងៃទី៦ ខែតុលា ឆ្នាំ២០២១ ខាងមុខ មុនបញ្ចប់ជុំទី១ក្នុងពូល ហើយជុំទី២ ជួបលីប៊ី ឡើងវិញ ហើយបន្តប៉ះអង់ហ្គោឡា និងចុងក្រោយប៉ះហ្គាបុង៕