ភ្នំពេញ ៖ បុរសម្នាក់សង្ស័យចាញ់ល្បិចក្រុមជនសង្ស័យ នាំទៅផឹកសុីបន្លំដាក់ថ្នាំ មឹមអេង វង្វេងបាត់ស្មារតីហើយ ដឹកនាំយកទៅទម្លាក់ផ្លុងចោល តាមផ្លូវបេតុង កែងផ្លូវសហព័ន្ធរុស្សី ក្រុម១ ភូមិព្រៃទា១ សង្កាត់ចោមចៅទី៣ ខណ្ឌពោធិសែនជ័យ រាជធានីភ្នំពេញ បង្កឲ្យភ្ញាក់ផ្អើលកាលពីវេលាម៉ោង៦ព្រឹក ថ្ងៃទី១២ ខែកញ្ញា ឆ្នាំ២០២១ ។
ជនរងគ្រោះ គ្រាន់តែដឹងថា ជាបន្តីនគរបាលខណ្ឌទួលគោក អាយុជាង៣០ឆ្នាំ ។ សម្ភារៈបាត់បង់ ត្រូវបានក្រុមគ្រួសារប្រាប់ថា បាត់ម៉ូតូស្កុបពី មួយគ្រឿង ខ្សែកមាស ប្លាកដៃ ចិញ្ចៀន កាបូបលុយ និងទូរស័ព្ទ Iphone 11pro មួយគ្រឿង ។
តាមប្រជាពលរដ្ឋក្បែរកន្លែងកើតហេតុ បានឲ្យដឹងថា កាលពីរំលងអធ្រាត ចូលថ្ងៃទី១២ ខែកញ្ញា ឆ្នាំ២០២១ គេជឭឃើញមនុស្សប្រុសស្រីប្រមាណ៥ទៅ៦នាក់ ជិះម៉ូតូ៣គ្រឿង តាមផ្លូវសហព័ន្ធរុស្សី ចូលទៅផ្លូវបេតុងថ្មី ចំណុចកើតហេតុ ហើយក៏ជិះចេញទៅវិញ គ្មានអ្នកណាចាប់អារម្មណ៍ លុះដល់វេលាម៉ោង៦ព្រឹក ភ្លឺច្បាស់ ទើបប្រទះឃើញបុរសម្នាក់ ដេកសន្លប់វង្វេងបាត់ស្មារតី បែកពពុះមាត់ស្គុល ផ្អើលពលរដ្ឋ រាយការណ៍ទៅសមត្ថកិច្ច ចុះទៅពិនិត្យ ស្រាវជ្រាវ ទើបបងប្អូន ក្រុមការងារជាមួយគ្នាទៅដឹកយកទៅពេទ្យ ។
ករណីប្រទះឃើញបុរសម្នាក់ ស្រវឹងវង្វេង សន្លប់បែកពពុះមាត់ នៅកៀនរបងតាមផ្លូវបេតុងខាងលើ ត្រូវបានដាក់ការសង្ស័យ ល្បួងនាំជនរងគ្រោះផឹកសុី ប្រើល្បិចដាក់ថ្នាំសណ្តំ (មឹមអេង) ហើយដឹកជនរងគ្រោះទៅទម្លាក់ផ្លុងចោល រួចយកទ្រព្យសម្បត្តិអស់ ។
ជនរងគ្រោះត្រូវបានក្រុមគ្រួសារ ដឹកតាមរថយន្ត យកទៅមន្ទីរពេទ្យដោយខ្លួនឯង ហើយសមត្ថកិច្ច បន្តធ្វើការស្រាវជ្រាវ ៕
