បច្ចុប្បន្ននេះសម្រាប់ការងារសិល្បៈអាចនិយាយបានថាម្ដាយកូន អ្នកនាង សឿនផាន ផាភួង និងកូនស្រីកំពុងដល់អាយុត្រូវប៉ាន់យីអ៊ុនឡើងក្រឺតៗ ព្រោះសង្កេតឃើញថាប្រមូលកើបលុយទាំងម្ដាយទាំងកូន រឿងណាមានកូនស្រី រឿងនោះក៏ឃើញមានវត្តមានម្ដាយសម្ដែងជាមួយគ្នាដែរ។
មួយរយៈចុងក្រោយនេះតាមរយៈការតាមដានបណ្ដាញសង្គម ពិសេសគឺហ្វេសប៊ុកផេករបស់តារាសម្ដែងផាភួង ឧស្សាហ៍ឃើញតារារូបនេះ Update ពីជីវិតនិងការងារក្នុងរង្វង់សិល្បៈឱ្យអ្នកគាំទ្របានតាមដានមិនដាច់ ជាពិសេសមួយរយៈក្រោយៗមកនេះភាគច្រើនការងារសម្ដែងរបស់អ្នកនាង សឿនផាន ផាភួង ច្រើនតែសម្ដែងក្នុងរឿងជាមួយនិងកូនស្រី អាង សុជាតា ហៅឈូឈូ សម្ដែងរួមគ្នាជានិច្ច និយាយងាយយល់គឺម្ដាយនិងកូនសម្ដែងរឿងតែមួយ។
បើនិយាយរឿងត្រូវប៉ាន់យីអ៊ុនកើបលុយក៏មិនខុសដែរ ព្រោះកាលពីពេលថ្មីៗនេះ អ្នកម្ដាយរូបស្រស់ទើបតែធ្វើការ Surprise កូនស្រីបណ្ដូលចិត្តដោយរថយន្តទំនើបមួយគ្រឿងថ្មីសន្លាងចេញពីក្រុមហ៊ុន ដោយរថយន្តនេះបើតាមភ្នាក់ងារលក់របស់ក្រុមហ៊ុនបានបង្ហើបថាមានតម្លៃជាង៣ម៉ឺនដុល្លារ។
គួរដឹងថាអ្នកម្ដាយនិងកូនស្រីមានវត្តមានសម្ដែងក្នុងរឿងជាច្រើនជាមួយគ្នា ដោយរឿងដែលបានថតចប់សព្វគ្រប់នោះគឺរឿង តម្លង់៧សណ្ដាន ថតផ្សព្វផ្សាយរមណីយដ្ឋាន ថតស្ពតសម្អាងការ និងមានរឿងផ្សេងៗជាច្រើនទៀតកំពុងថតរួមគ្នា៕
