អ្នកចាត់ការទូទៅក្រុមជម្រើសជាតិកម្ពុជា Keisuke Honda បានសម្រេចចិត្តចុះកិច្ចសន្យា១រដូវកាលជាមួយក្រុមបាល់ទាត់ FK Sūduva ក្នុងលីគពូលនៃប្រទេសលីទុយអានី A Lyga នៅយប់ថ្ងៃអង្គារ សប្ដាហ៍នេះ។
ក្លិប FK Sūduva ក្នុងទ្វីបអឺរ៉ុប មួយនេះបានធ្វើសន្និសីទសារព័ត៌មានបង្ហាញខ្លួនកីឡាករវ័យ៣៥ឆ្នាំរូបនេះ ដោយនឹងពាក់ឯកសណ្ឋានលេខ៣។ នេះជាប្រទេសទី៩ ហើយដែលបុរសជនជាតិជប៉ុន រូបនេះប្រកបអាជីពជាកីឡាករបាល់ទាត់ដោយក្នុងនោះមាន ជប៉ុន, រុស្ស៊ី, អ៊ីតាលី, ម៉ិចស៊ីកូ, អូស្ត្រាលី, ហុល្លង់, ប្រេស៊ីល,អាហ្សេបៃហ្សង់ និងលីទុយអានី នេះផ្ទាល់។
ក្រុមបាល់ទាត់ FK Sūduva កំពុងឈរកំពូលតារាងពានរង្វាន់ A Lyga ក្រោយប្រកួតបាន២៦លើក ឈ្នះបាន១៧លើក ស្មើ៤លើក និងចាញ់៥លើកមាន៥៥ពិន្ទុ។ ពានរង្វាន់ A Lyga តម្រូវឱ្យក្រុមជាសមាជិកទាំង១០ក្រុម ប្រកួតវិលជុំចំនួន៤ជើង គឺ៣៦សប្ដាហ៍ទើបបញ្ចប់៕