តារាសម្ដែងមុខសង្ហា ម្ចាស់ចិត្តអ្នកគាំទ្រនារីៗ លោក ខាត់ វ៉ៃហាំង បានបង្ហាញក្ដីរំភើបរីករាយជាពន់ពេកដែលលោកត្រូវបានគណៈកម្មការរៀបចំមហោស្រពភាពយន្ត សម្រេចជ្រើសរើសជាទូតសុច្ឆន្ទៈកម្ពុជាមួយនេះ ប៉ុន្តែលោកបែរជាជួបនឹងរឿងខកបំណងនិងសោកស្ដាយទៅវិញ។
តារាសម្ដែងពីភាពយន្តភាគ «ស្នាមស្នេហ៍សមុទ្ររាម» វគ្គកូនៗ លោក ខាត់ វ៉ៃហាំង នៅថ្ងៃទី១៩ ខែកញ្ញា ឆ្នាំ២០២១ នេះបានបង្ហោះដំណឹងដ៏សែនរីករាយនៅលើបណ្ដាញសង្គមដើម្បីចែករំលែកក្ដីរំភើបរីករាយជាមួយនឹងអ្នកគាំទ្រថា លោកត្រូវបាន គណៈកម្មការរៀបចំមហោស្រពភាពយន្តកម្ពុជា អាស៊ាន (Organizing Committee of Cambodia Asian Film Festival) ជ្រើសរើសជាទូតសុច្ឆន្ទៈ (Ambassador) នៃមហោស្រពភាពយន្តកម្ពុជា-អាស៊ាន (Cambodia Asian Film Festival) ប្រចាំឆ្នាំ 2021។
នៅក្នុងសំណេរដដែលនោះ តារារូបនេះបានសរសេររៀបរាប់បន្តទៀតថា ៖ «នេះជាកិត្តិយសដ៏គួរឱ្យមោទកភាព ក៏ដូចជាសមិទ្ធិផលដ៏ប្រពៃក្នុងចំណោមសមិទ្ធិផលនានាដែលខ្ញុំបាទទទួលបានពីកិច្ចខិតខំប្រឹងប្រែងក្នុងឋានៈជា តារាសម្តែង/សិល្បករ មួយរូបប្រចាំព្រះរាជាណាចក្រកម្ពុជា។»
ទន្ទឹមនឹងបង្ហាញក្ដីរំភើបរីករាយចំពោះការទទួលបានកិត្តិយសដ៏ខ្ពង់ខ្ពស់ពីកម្មវិធីតារាសម្ដែងមានដើមកំណើតមកពីខេត្តបន្ទាយមានជ័យរូបនេះ បានសម្ដែងក្ដីខកបំណងនិងសោកស្ដាយខ្លាំងព្រោះតែកម្មវិធីដែលត្រៀមប្រារព្ធឡើងនៅកម្ពុជានេះត្រូវបានប្ដូរមកធ្វើតាមរយៈប្រព័ន្ធអនឡាញវិញដោយសារតែការរីករាលដាលនៃជំងឺកូវីដ-១៩។
«ពិតជាគួរ្ឱ្យសោកស្តាយដែល ព្រឹត្តិការណ៍នៃ មហោស្រពភាពយន្តកម្ពុជា អាស៊ាន (Cambodia Asian Film Festival) ប្រចាំ 2021 ពុំអាចប្រារព្ធរៀបចំក្នុងព្រះរាជាណាចក្រកម្ពុជាដោយសារពិភពលោកទាំងមូលកំពុងតែឆ្លងកាត់នូវដំណាក់កាលនៃជំងឺរាតត្បាតដ៏កាចសាហាវនោះ ដោយផ្លាស់ប្តូរប្រារព្ធរៀបចំព្រឹត្តិការណ៍ដ៏មានអត្ថន័យនេះតាមរយៈប្រព័ន្ធអ៊នឡាញវិញ។»
គួរដឹងដែរថាក្រៅពីតារាសម្ដែងកម្ពុជាលោក ខាត់ វ៉ៃហាំង ដែលនឹងត្រូវបានតែងតាំងជាទូតសុច្ឆន្ទៈសម្រាប់ព្រឹត្តិការណ៍មហស្រពភាពយន្តកម្ពុជាអាស៊ាននេះហើយ ក៏នៅមានតារាសម្ដែងស្រីល្បីវ័យក្មេងជនជាតិចិនកញ្ញា Jiang Mengjie ជាទូតសុច្ឆន្ទៈក្នុងព្រឹត្តិការណ៍នេះចាប់ពីថ្ងៃទី១ខែមិថុនា ឆ្នាំ២០២១ រហូតដល់ថ្ងៃទី៣១ ខែធ្នូ ឆ្នាំ២០២១៕
