រឿងរ៉ាវចម្រូងចម្រាសពាក់ព័ន្ធនឹងនរណាជាម្ចាស់សំនៀងដើមបទ «ជំនោរដើមខែ» នៅតែមានកំសួលក្ដៅងុំ ហាក់មិនអាចរកទីបញ្ចប់បានប្រៀបដូចជាទូកកំពុងអណ្ដែតកណ្ដាលទន្លេ ព្រោះកាលពីម្សិលមិញនេះផ្ទុះរឿងតារាចម្រៀងជើងចាស់ លោកស្រី ម៉េង កែវពេជ្ជតា ប្រតិកម្មនឹងការលើកឡើងរបស់ក្រុមព្រះសុរិយាឆ្លើយតបទៅនឹងការសាកសួរពីសំណាក់ហ្វេន តើអ្នកណាជាម្ចាស់បទចម្រៀងដើម?
លោកស្រី ម៉េង កែវពេជ្ជតា បានចេញមកបញ្ចេញកំហឹងចំពោះក្រុមព្រះសុរិយា ដែលបានឆ្លើយលើកឡើងថាបទចម្រៀងជំនោរដើមខែគឺជាកម្មសិទ្ធបញ្ញារបស់ផលិតកម្ម ឆ្លងដែន ព្រោះលោកស្រីបានលក់សិទ្ធិឲ្យផលិតកម្មហើយ។
កាលពីថ្ងៃទី២០ ខែកញ្ញា ឆ្នាំ២០២១ តារាចម្រៀងជើងចាស់ លោកស្រី ម៉េង កែវពេជ្ជតា បានបញ្ចេញសំណេរវែងអន្លាយដូចកន្ទុយខ្លែង រៀបរាប់ទាំងកំហឹងដោយចោទទៅកាន់ភាគីក្រុមព្រះសូរិយាថា ខំប្រឹងសាងកំហុសទម្លាក់ឱ្យលោកស្រីម្ដងជាពីរដង ថែមទាំងលួចវាយប្រហារលោកស្រីមិនចេះចប់មិនចេះហើយ តើឯណាគំនិតអ្នកស្រលាញ់សិល្បៈ? ឯណាគំនិតអព្យាក្រឹត? ខំអួតថាបង្កើតស្ថាប័នស្រាវជ្រាវពីសិល្បៈដើម្បីលើកស្ទួយអ្នកសិល្បៈធ្វើស្អី បើតាមចងអាឃាតអ្នកសិល្បៈអត់ឈប់ឈរសោះអញ្ចឹង?
អ្នកមេម៉ាយកូនពីរបានបន្តទៀត៖ ក្រុមព្រះសុរិយា បានកាឡៃរឿងថាលោកស្រីចង់ដណ្ដើមបទចម្រៀង «ជំនោរដើមខែ» ដែលជាសំនៀងដើមរបស់លោកស្រី ម៉ម សុខា មកធ្វើជាកម្មសិទ្ធផ្ទាល់ខ្លួន។ លោកស្រីបានសួរត្រលប់វិញថាបើសិនលោកស្រីមិនបង្ហោះប្រាប់ថាម្ចាស់ដើមជាតារារូបណាក៏គ្មានអ្នកណាដឹងដែរ ព្រោះបទនេះលោកស្រីម៉េង ពេជ្ជតាបានបកស្រាយតាំងពីឆ្នាំ១៩៩៨មកម្ល៉េះ។
នៅក្នុងសំណេរនោះក៏មិនភ្លេចរំលឹកដល់តារាចម្រៀងស្រករក្រោយកញ្ញា បាន មុន្នីលក្ខ ថាបានលើកយកបទចម្រៀងអ្នកស្រី២០បទទៅច្រៀងឡើងវិញហើយមិនមានភ្ជាប់ឈ្មោះអ្នកស្រីសោះ? ដូច្នេះតើរវាងអ្នកស្រីនិងកញ្ញា បាន មុនីល័ក្ខ ម្នាក់ណាជាមុខក្រាស់មានគំនិតអាក្រក់ចង់ធ្វើជាម្ចាស់គេដោយអត់ខ្មាស់អៀន?
លោកស្រី ម៉េង កែវពេជ្ជតា បានបន្ថែមទៀតថាការដែលមួយរយៈនេះមិនតបតទុកឱ្យគេលាបពណ៌ខ្លួនព្រោះលោកស្រីដឹងថាជាកលល្បិចដើម្បីទាក់ទាញចំណាប់អារម្មណ៍ ធ្វើឱ្យមហាជនយល់ថាលោកស្រីជាតួកាច ហើយព្រួតគ្នាធ្វើឱ្យអ្នកស្រីហត់ អស់កម្លាំង និងទម្លាក់ចោលការតស៊ូមតិ។ នៅក្នុងនោះអ្នកស្រីហាក់ចោទថាក្រុមព្រះសុរិយា ជួយកញ្ញាបាន មុន្នីល័ក្ខបិទបាំងកំហុ ធ្វើឱ្យម្ចាស់ស្នាដៃប្រែក្លាយជាបិសាច ចំណែកឯអ្នកលួចគេក្លាយជាហង្ស។
តារាចម្រៀងជើងចាស់ខាងលើបានប្រើសម្ដីបែបមិនទុកមុខទៅកាន់ក្រុមព្រះសុរិយាថាជាមនុស្សប្រុសតែចោមរោមធ្វើបាបស្ត្រីម្នាក់ មិនបង្ហាញពីភាពអស្ចារ្យទេ តែបង្ហាញពីភាពកំសាក ពួកអ្នកគួរតែស្លៀកសារុងវិញទៅ។
ចុងក្រោយលោកស្រីក៏បានបោះសម្ដីធ្ងន់បន្ថែមទៀតថា៖ ពិតទេដែលគេថាអ្នកមិនបានធ្វើការអោយត្រូវនឹងទិសដៅ និងមិនគោរពវិជ្ជាជីវៈ តែអ្នកបែជាចាំតែវាយប្រហារសិល្បៈណាដែលខ្លួនស្អប់តាមចិត្តគំនុំព្រោះតែអ្នកតាមផ្ចាញ់គេមិនបាន ?