ក្រុមបាល់ទះប្រមូលផ្ដុំដោយជើងខ្លាំងនៅក្នុងប្រទេសកម្ពុជា គឺវិសាខា ថ្មីៗនេះបានបានប្រកាសថានឹងចូលរួមប្រកួតក្នុងពានរង្វាន់បាល់ទះ Special Volleyball Challenge 2021 នៅពេលខាងមុខនេះដែរ។
បើតាមការបញ្ជាក់នៅលើហ្វេសប៊ុករបស់សមាគមបាល់ទះវិសាខា បានបញ្ជាក់ថាកីឡាករចំនួន៦រូបដែលបានចូលរួមមាន ប្រធានក្រុម សួន ចាន់ណារ៉ូ, គួន មុំ, មួន និមល, វឿន វាសនា, សឿន ហេង និង ឈឹម ឈាងនី។
លោក នៅ សាម៉េត គ្រូបង្វឹករបស់ក្រុមបាល់ទះវិសាខា បានប្រាប់សារព័ត៌មានត្រយងថា៖«ពួកខ្ញុំបានត្រៀមខ្លួនរួចរាល់ហើយ។ ប៉ុន្តែការប្រកួតបែប៤ស្មើ បែបនេះគឺពួកខ្ញុំមានបញ្ហាប្រឈមខ្លះដែរព្រោះថាយើងមិនសូវបានប្រកួតបែបនេះទេ តែយើងច្រើនហ្វឹកហាត់បែប៦ទល់៦ ស្តង់ដារ។ យើងមានបញ្ហាខ្លះដែរពីការប្រកួត បើធៀបនឹងក្រុមគេផ្សេងគេលេងធ្លាប់លេងបែបនេះខាងក្រៅកន្លងមក តែយើង»។
«បើទោះជាការប្រកួតនេះមិនស្តង់ដារអន្តរជាតិក្ដី តែពួកយើងរីករាយក្នុងការចូលរួម ហើយអរគុណដល់ថ្នាក់ដឹកនាំក៏ដូចជាគណៈកម្មការ ដែលព្យាយាមបង្កើតការប្រកួតនេះឡើយ ព្រោះយើងខកខានប្រកួតយូរមកហើយ។ នេះគន្លឹះមួយដែលធ្វើឱ្យមានសកម្មភាពប្រកួតឡើងវិញ»។គ្រូបង្វឹកខាងលើបន្ថែម។
សូមបញ្ជាក់ថាលោកបណ្ឌិត អាំង សេរីពិសិដ្ឋ ប្រធានគណៈកម្មការរៀបចំការប្រកួតថារៀបចំការប្រកួតនេះឡើង ក្នុងគោលបំណងដកស្រង់បច្ចេកទេសថ្មីៗ និងផ្ដល់ឱកាសឱ្យកីឡាករបានហ្វឹកហាត់កន្លងមកបានបង្ហាញសមត្ថភាពរៀងៗខ្លួន។ មួយវិញទៀតចង់បំផុតការគាំទ្រពីមហាជន ព្រោះការប្រកួតក្រៅប្រព័ន្ធកន្លងមកមិនទាន់មានការរៀបចំស្តង់ដារត្រឹមត្រូវ។ ដូច្នេះហើយទើបយើងកំណត់ជាគោលការណ៍និងស្តង់ដារមួយឱ្យសមស្របតាមលក្ខណៈបច្ចេកទេសត្រឹមត្រូវវិញ។ ជាមួយគ្នានេះការរៀបចំការប្រកួតនេះគឺដើម្បីរិតចំណងមិត្តភាព សាមគ្គីភាព រវាងកីឡាករ គ្រូបង្វឹកនិងថ្នាក់ដឹកនាំក្រុមនានា។
ការប្រកួតពានរង្វាន់បាល់ទះ Special Volleyball Challenge 2021 គ្រោងដំណើរការពីថ្ងៃទី២៤ ខែកញ្ញា ដល់ថ្ងៃទី១០ ខែតុលា ឆ្នាំ២០២១ នៅទីលានកីឡដ្ឋានព្រីនស៍។ ក្រុមដែលឈ្នះជើងឯកនឹងទទួលបានពាន ចំនួនមួយ និងថវិកាចំនួន ១០លានរៀល ហើយក្រុមជើងឯករងទទួលបានថវិកា៨លានរៀល និងក្រុមចំណាត់ថ្នាក់លេខ៣ ទទួលបាន៦លានរៀល។ ជាមួយគ្នានេះដែរក៏មានពានរង្វាន់ឯកត្តជនផងដែរ ដូចជាកីឡាករវាយប្រយុទ្ធល្អជាងគេ, កីឡាករធ្វើរនាំងល្អជាងគេ, កីឡាករវាយសេវាល្អជាងគេ និងកីឡាករលើកបាល់ល្អជាងគេ ទទួលរង្វាន់ជាថវិកាម្នាក់ ចំនួន ៤សែនរៀល។
ចំណែកការប្រកួតបែងចែកជាវគ្គជម្រុះតាមពូល វគ្គ៨ក្រុមចុងក្រោយ វគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រ។ សម្រាប់ក្រុមដែលចង់ចូលរួមប្រកួតប្រជែងអាចចុះឈ្មោះតាមរយៈលេខ 098 229 192 / 077 910 009 (លោកគ្រូ ទែន ឡន)៕
