ទីបំផុត Ariel Lin មានទម្ងន់សមដូចបំណងហើយ ក្រោយរៀបការជាមួយនឹងស្វាមីជាអ្នកធុរកិច្ច Charles Lin កាលពីឆ្នាំ២០១៥។ មួយរយៈចុងក្រោយមកនេះតារាសម្ដែងស្រីសញ្ជាតិចិនតៃវ៉ាន់រូបនេះបានដកឃ្លាពីការងារសម្ដែងដើម្បីផ្ដោតលើគ្រួសារនិងការមានទម្ងន់ជាចំបងវិញ។
បើមិនរាប់បញ្ចូលភាពយន្ត A Choo ដែលបញ្ចាំងកាលពីឆ្នាំ២០២០ រឿងចុងក្រោយដែលអ្នកគាំទ្របានឃើញតារាស្រីរូបនេះនៅមុខកញ្ចក់កាំមេរ៉ាគឺរឿង «I Will Never Let You Go»។
កាលពីឆ្នាំមុន Ariel និងស្វាមី Charles ដែលមានគំរោងយក Baby បែរជាជាប់គាំងនៅពេលដែលមេរោគរាតត្បាតឆ្លងរាលដាលពិភពលោក ដោយសារតែអ្នកទាំងពីរត្រូវរស់នៅបែកគ្នា ខណៈដែល Ariel Lin បានហោះពីចិនទៅកាន់កោះតៃវ៉ាន់មុនពេលស្ថានភាព Covid-១៩ វាយប្រហារប្រទេសចិន ប៉ុន្តែស្វាមីរបស់ Ariel បានជាប់នៅសហរដ្ឋអាមេរិករហូតទាល់តែស្ថានភាពមានការធូរស្រាលទើបអាចត្រលប់ទៅកោះតៃវ៉ាន់ជួបជុំភរិយាបាន។
ថ្វីត្បិតតែច្រើនឆ្នាំកន្លងមកនេះគំរោងរបស់អ្នកទាំងពីរមិនអាចសម្រេចបានតាមការគ្រោងទុក ប៉ុន្តែនៅទីបំផុតការខិតខំប្រឹងប្រែងរបស់អ្នកទាំងពីរបានសម្រេចដូចចិត្តប៉ងប្រាថ្នា ព្រោះទីបំផុត Ariel ត្រៀមសម្រាលកូនដំបូងរបស់ខ្លួននៅចុងខែតុលាខាងមុខនេះ។
សម្រាប់ភេទរបស់កូនដំបូងរបស់អ្នកទាំងពីរនៅមិនទាន់បានទម្លាយចេញមកខាងក្រៅឱ្យអ្នកគាំទ្រនិងសាធារណជនបានដឹងនៅឡើយទេ ដូច្នេះហ្វេនៗកាន់តែអន្ទះសារចង់ដឹងថាតើកូនដំបូងរបស់អ្នកទាំងពីរជាកូនប្រុសឬកូនស្រី ទន្ទឹមនឹងនេះដែរហ្វេនៗក៏ជូនពរឱ្យអនាគតអ្នកម្ដាយសំរាលកូនប្រកបដោយសុខសុវត្ថិភាពផងដែរ៕