រមណីយដ្ឋានបុរាណវិទ្យាភ្នំចាស់ ជារមណីយដ្ឋានបែបប្រវត្តិសាស្ត្រ មានទេសភាពស្រស់ស្អាតខ្យល់អាកាសបរិសុទ្ធ មានផ្ទាំងថ្មតូចធំ ដុះស្រួច ក្លាយជាផ្ទាំងទស្សនីយភាពទាក់ចិត្តភ្ញៀវទេសចរ។ ទន្ទឹមនឹងនេះ ភ្នំចាស់ក៏ជារមណីយដ្ឋាន ដ៏ទាក់ទាញសម្រាប់អ្នកជឿលើអបិយជំនឿ ដែលអ្នកទេសចរមកបន់ស្រន់រមែងសម្រេចតាមសេចក្ដីប្រាថ្នា។
រមណីយដ្ឋានបុរាណវិទ្យាភ្នំចាស់មានទីតាំងស្ថិតនៅភូមិមនោរម្យ ឃុំហោងសំណុំ ស្រុកឱរ៉ាល់ខេត្តកំពង់ស្ពឺ។ បើធ្វើដំណើរពីទីរួមខេត្តកំពង់ស្ពឺតាមផ្លូវជាតិលេខ ៤៤ ឆ្ពោះទៅកាន់ទីរួមស្រុកឱរ៉ាល់ ចម្ងាយជាង ៣០ គីឡូម៉ែត្រ។
លោក សាម ខុន មន្រ្តីអភិរក្សរមណីយដ្ឋានបុរាណវិទ្យាភ្នំចាស់ បានប្រាប់សារព័ត៌មានត្រយងថា ភ្នំនេះមានបារមីខ្លាំងពូកែណាស់ ហើយជារៀងរាល់ឆ្នាំអ្នកស្រុកតែងតែនាំគ្នាធ្វើបុណ្យថ្វាយម្ចាស់ភ្នំ ពីព្រោះកាលពីសម័យដើមនៅតំបន់ភ្នំចាស់នេះ គឺសុទ្ធតែជនជាតិសួយរស់នៅ និងគ្រប់គ្រងដោយមេកន្រ្ទាញខ្លាំងពូកែម្នាក់ឈ្មោះបាភ្នំ ឬមេទ័ពឈ្មោះចំរើន។
លោក សាម ខុន បានឲ្យដឹងទៀតថា រមណីយដ្ឋាននេះ មានភ្ញៀវទេសចរមកទស្សនាជាហូរហែជាពិសេសអ្នកមានជំនឿ តែងតែមកបន់ស្រន់ ហើយការប៉ងរមែងទទួលបានជោគជ័យតាមក្ដីប្រាថ្នា។
ក្រៅពីទេសភាពស្រស់ត្រកាល ជាទីបន់ស្រន់ពូកែស័ក្ដិសិទ្ធ នៅលើកំពូលភ្នំនៃភ្នំចាស់ ក៏មានហ្វូងស្វាជាទីស្រឡាញ់ ទាំងតូចទាំងធំ ហើយស្វាគមន៍ភ្ញៀវទេសចរ។ ម៉្លោះហើយភ្ញៀវទេសចរនៅពេលឡើងកំពូលភ្នំកុំភ្លេចទិញផ្លែឈើ ជាពិសេសចេក ឲ្យពួកគេផង។
គួរបញ្ជាក់ថា រមណីយដ្ឋានភ្នំចាស់មានកម្ពស់ជាង200ម៉ែត្រ ចែកចេញជាបីផ្នែក គឺខ្នងភ្នំព្រះព្រហ្ម ខ្នងភ្នំព្រះពុទ្ធ និងខ្នងកិន្នរ ដែលមានក្រឡាផ្ទៃប្រមាណ 103ហិកតា។ ភ្នំចាស់ គឺជាភ្នំមួយដែលមានល្អាងជាច្រើន ប៉ុន្តែល្អាងដែលធំជាងគេ គឺល្អាងជង្រុកដែលប្រជាជនរស់នៅតំបន់នោះតែងមានជំនឿលើល្អាងភ្នំចាស់ គឺជាភ្នំធម្មជាតិមួយដែលមានអាយុកាលរាប់ពាន់ឆ្នាំមកហើយ និងជាទីតាំងប្រវត្តិសាស្ត្រ ដែលមានមនុស្សសម័យបុរេប្រវត្តិធ្លាប់រស់នៅ៕
សូមទស្សនាវីដេអូខាងក្រោមនេះ៖