«ដូចដែលយើងមើលឃើញពីការវិភាគទិន្នន័យនៃការប្រកួតក្នុងជើងទី១ គឺយើងគ្រប់គ្រងបាល់បានច្រើនជាងក្រុមកម្ពុជា ពោលគឺចាប់ពីនាទី៣០ រហូតដល់ចប់ការប្រកួត។ នេះជាសារមួយជំរុញយើងសម្រាប់ក្ដីសង្ឃឹមសម្រាប់ប្រកួតជើងទី២»។ នេះជាសម្ដីរបស់លោក Sang Hoon Kim គ្រូបង្វឹករបស់ក្រុមជម្រើសជាតិហ្គាម បង្ហាញពីក្ដីសង្ឃឹមវាយបកលើក្រុមជម្រើសជាតិកម្ពុជា ក្នុងជើងទី២។
កម្ពុជា ជួបកោះហ្គាម ចំនួន២ជើង ដើម្បីស្វែងរកកៅអីឡើងទៅវគ្គជម្រុះជុំទី៣ នៃពានរង្វាន់បាល់ទាត់ជើងឯកទ្វីបអាស៊ី 2023 AFC Asian Cup ដែលមាន២២ក្រុមកំពង់រង់ចាំ។ ជើងទី១ នៅថ្ងៃទី៩ ខែតុលា ឆ្នាំ២០២១ ថ្មីៗនេះកម្ពុជា បានយកឈ្នះកោះហ្គាម ១-០ ហើយជើងទី២ ក្រុមទាំង២ត្រូវជួបគ្នានៅវេលាម៉ោង១១:៣០នាទីយប់ថ្ងៃពុធទី១២ តុលា ឆ្នាំ២០២១ លើទីលានកីឡដ្ឋាន Khalifa Sports City Stadium ក្នុងទីក្រុង Isa Town ប្រទេសបារ៉ែន (ទឹកដីកណ្ដាល)។
ការប្រកួតនេះមានផ្សាយផ្ទាល់នៅលើហ្វេសប៊ុករបស់សហព័ន្ធកីឡាបាល់ទាត់កម្ពុជា ផងដែរ។ ក្រុមដែលរកបានគ្រាប់បាល់ច្រើនជាងគេនឹង ឈានទៅជុំទី៣ ជាបន្ត។
នៅលើវិបសាយសហព័ន្ធកីឡាបាល់ទាត់ហ្គាម គ្រូបង្វឹកកូរ៉េខាងត្បូង រូបនេះបន្ថែមថា៖«លទ្ធផលជើងទី១ យើងពិតជាខកចិត្ត ប៉ុន្តែយើងមានពេលប៉ុន្មានដើម្បីកែប្រែកំហុសមុនការប្រកួតដ៏សំខាន់ក្នុងជើងទី២មកដល់។ បញ្ហាប្រឈមរបស់យើងគឺការបញ្ចប់ទីរបស់គូប្រកួត»។
ប្រធាននិងខ្សែប្រយុទ្ធជើងចាស់ Jason Cunliffe ក្នុងក្រុមមានរហ្សនាមថា Matao និងកីឡាករក្នុងក្រុមសុទ្ធសឹងតែរង់ចាំការប្រកួតជើងទី២មកដល់ទាំងអស់គ្នា។ កោះហ្គាម ត្រូវការគ្រាប់បាល់ជាខ្លាំងដើម្បីវាយបកលើក្រុមកម្ពុជា ក្នុងគ្រាប់បាល់ក្រៅដី (Away Goal)។
សូមបញ្ជាក់ថាការប្រកួតវគ្គជម្រុះនេះមានតែ២គូប៉ុណ្ណោះ គឺកម្ពុជា ជួបកោះហ្គាម ហើយឥណ្ឌូណេស៊ី ជួបតៃវ៉ាន់។ ពេលនេះឥណ្ឌូណេស៊ី បានឡើងទៅជុំបន្តមុន ក្រោយយកឈ្នះលើកោះតៃវ៉ាន់ ទាំង២ជើង ដោយលទ្ធផល ៥ទល់១។ អ្នកឈ្នះក្នុងការប្រកួតវគ្គជម្រុះនេះ មានឈ្មោះឡើងទៅបង្គ្រប់ក្រុមទាំង២២ដែលកំពុងអង្គុយចាំ ដើម្បីចែកពូល ក្នុង១ពូលមាន៤ក្រុម។
ពានរង្វាន់ 2023 AFC Asian Cup នឹងរៀបចំនៅប្រទេសចិន ក្នុងឆ្នាំ២០២៣ ហើយពេលនេះមានក្រុមចំនួន១៣ក្រុមហើយ កក់កៅអីបានមុនគេ ខណៈក្រុមចំនួន២៤មានឈ្មោះប្រកួតនៅវគ្គជុំចុងក្រោយនេះ៕
