នៅរសៀលថ្ងៃព្រហស្បត្តិ៍ ទី១៤ ខែតុលា ឆ្នាំ២០២១ នេះសហព័ន្ធកីឡាបាល់ទាត់កម្ពុជា បានធ្វើសន្និសិទសារព័ត៌មានមួយជុំវិញសមាជិកក្រុមជម្រើសជាតិកម្ពុជា មានវិជ្ជមានជំងឺកូវីដ-១៩ អំឡុងពេលហ្វឹកហាត់និងប្រកួតជម្រុះជើងឯកទ្វីបអាស៊ី AFC Asian Cup 2023 នៅប្រទេសបារ៉ែន ដែលជាទឹកដីកណ្ដាល។
ជាលទ្ធផលក្រុមជម្រើសជាតិកម្ពុជា បានយកឈ្នះលើកោះហ្គាម ដោយលទ្ធផលទាំង២ជើង ៣ទល់១ (ជើងទី១ ឈ្នះ១ទល់០) ហើយដឹកដៃក្រុមជម្រើសជាតិឥណ្ឌូណេស៊ី ឡើងទៅជុំបន្ទាប់ ដែលមានក្រុម២២កំពុងតែរង់ចាំ។
ងាកមកស្ថានភាពក្នុងក្រុមជម្រើសជាតិកម្ពុជា វិញមានកីឡាករសំខាន់ៗចំនួន៦រូបបានទទួលវិជ្ជមានជំងឺកូវីដ-១៩ ដោយក្នុងនោះមាន ចាន់ វឌ្ឍនាកា, គួច សុកុម្ភៈ, កែវ សុខសិលា, សឿយ វិសាល, សារ៉េត គ្រីយ៉ា និង អ៊ាន ពិសី។
នៅក្នុងសាលសន្និសិទព័ត៌មាន ដែលបកស្រាយដោយលោក ភា សុភត្រា ដែលជាគ្រូជំនួយ និងលោក ឈូក ពិសិដ្ឋ ជាអ្នកចាត់ការក្រុមជម្រើសជាតិកម្ពុជា បានបញ្ជាក់ថា កីឡាករទាំង៦រូបនេះត្រូវស្នាក់នៅសម្រាកព្យាបាល ក្នុងប្រទេសបារ៉ែនសិន ខណៈប្រតិភូនិងមិត្តរួមក្រុមផ្សេងទៀតត្រូវធ្វើដំណើរចេញពីប្រទេសនេះមុន ក្នុងថ្ងៃព្រហស្បតិ៍ នេះផ្ទាល់។
តំណាងក្រុមទាំង២បានបញ្ជាក់ពីស្ថានភាពកីឡាករទាំង៦រូបដែលត្រូវសម្រាកព្យាបាលសុខភាពក្នុងប្រទេសតំបន់មជ្ឈិមបូព៌ាមួយនេះចំនួន១០ ថ្ងៃសិន។ «កីឡាករមិនទៅពេទ្យទេ គឺនៅសម្រាកព្យាបាលដាច់ដោយឡែក ក្នុងសណ្ឋាគារ មួយកន្លែងក្នុងប្រទេសបារ៉ែន។ ដោយសារកីឡាករទាំងអស់បានចាក់វ៉ាក់សាំងរួចរាល់ ហើយបញ្ហាវិជ្ជមានជំងឺកូវីដ-១៩នេះ មិនបានរំខានធ្ងន់ធ្ងរដល់សុខភាពពួកគាត់នោះឡើយ ប៉ុន្តែការស្នាក់នៅដាច់ដោយឡែក កុំមានមានការឆ្លងរីករាលដាល»។
ចំពោះប្រតិភូរបស់ក្រុមជម្រើសជាតិកម្ពុជា បានធ្វើដំណើរចាកចេញពីប្រទេសបារ៉ែន នៅថ្ងៃព្រហស្បតិ៍ នេះដោយឆ្ពោះទៅកាន់ទីក្រុងឌូប៉ៃ ប្រទេសអារ៉ាប់រួម មុនប្តូរជើងហោះហើរទៅកាន់ប្រទេសសិង្ហបុរី។ ដល់ប្រទេសសិង្ហបុរី សមាជិកក្រុមជម្រើសជាតិកម្ពុជា ត្រូវធ្វើដំណើរត្រឡប់មករាជធានីភ្នំពេញវិញ ហើយសមាជិកក្រុមជម្រើសជាតិក្រោមអាយុ២៣ឆ្នាំត្រូវបន្តទៅប្រកួតជម្រុះជើងឯកទ្វីបអាស៊ី 2022 AFC U-23 Asian Cup ក្នុងពូល K នៅប្រទេសជប៉ុន ជាបន្ត។
ក្នុងពូល K កម្ពុជា ស្ថិតនៅជាមួយម្ចាស់ផ្ទះជប៉ុន និងហុងកុង ខណៈកូរ៉េខាងជើង បានប្រកាសដកខ្លួន។
«មិនមានមន្រ្តីនៅមើលថែកីឡាករទាំង៦នាក់នោះទេ។ ប៉ុន្តែអំឡុងពេលសម្រាកព្យាបាល ឬ ប្រសិនបើ១០ថ្ងៃក្រោយស្ថានភាពសុខភាពអ្នកទាំង៦ បានជាសះស្បើយ នោះសហព័ន្ធកីឡាបាល់ទាត់កម្ពុជា សហការជាមួយសហព័ន្ធកីឡាបាល់ទាត់បារ៉ែន ក្រសួងសុខាភិបាលបារ៉ែន និងរាជរដ្ឋាភិបាលបារ៉ែន នឹងជួយសម្រួលដល់កីឡាករកម្ពុជា ត្រឡប់មកមាតុភូមិវិញ ដោយសុវត្ថិភាព»។ មន្ត្រីទាំង២ថ្លែងក្នុងសន្និសីទសារព៌តមាន។
មន្រ្ដីតំណាងក្រុមជម្រើសជាតិកម្ពុជា បន្តថា៖«មូលហេតុដែលមានការយឺតយ៉ាវក្នុងការជូនដំណឹងពីស្ថានភាពកីឡាកររបស់ជម្រើសជាតិកម្ពុជា វិជ្ជមានជំងឺកូវីដ-១៩ ដោយសារពាក់ព័ន្ធនឹងបច្ចេកទេសក្រុមមុនការប្រកួត ជាពិសេសគឺនៅក្នុងជើងទី២ផ្ទាល់តែម្ដង ព្រោះមិនត្រូវឱ្យគូប្រកួត (កោះហ្គាម) បានដឹងពីស្ថានភាពក្រុមរបស់យើង មុនការប្រកួតនោះទេ»។
សារព័ត៌មានត្រយង សូមជូនពរឱ្យក្រុមកីឡាករកម្ពុជា ទាំង៦រូបដែលកំពុងតែសម្រាកព្យាបាលនៅប្រទេសបារ៉ែន ឆាប់ជាសះស្បើយឡើងវិញ ព្រមទាំងត្រឡប់មកមាតុភូមិវិញដោយសុវត្តិភាព និងសូមជូនពរអ្នកដែលត្រឡប់មកវិញ និងបន្តទៅប្រកួតនៅប្រទេសជប៉ុន សូមមានសុខភាពល្អ និងទទួលបានជ័យជម្នះក្នុងការប្រកួតផងដែរ៕
ខាងក្រោមជាវីដេអូក្នុងសន្និសិតសារព័ត៌មានទាំងស្រុង៖