កម្មវិធីប្រកួតប្រជែងសម្រស់ស្វែងរកស្រីស្អាត ឆ្លាត មានសមត្ថភាព និងចំណេះដឹង ដើម្បីជាបេក្ខភាពតំណាងប្រទេសកម្ពុជាទៅប្រកួតប្រជែងកម្រិតពិភពលោករកបានបេក្ខនារីរូបស្អាតស្រស់សោភាបែបខ្មែរមួយរូបហើយ មកក្ដោបតំណែងដ៏សំខាន់មួយនេះ កាលពីរាត្រីទី១៤ ខែតុលា ឆ្នាំ២០២១ ដោយនារីរូបស្រស់ម្នាក់នោះគឺនាងក្រមុំមកពីខេត្តក្រចេះ។
ឆ្លងកាត់វគ្គជម្រុះដ៏តឹងតែងមានតែបេក្ខនារីមួយរូបគត់ដែលនឹងក្លាយជាម្ចាស់ពាននិងម្ចាស់តំណែង Miss World Cambodia 2022 គឺបេក្ខនារីពាក់ស្លាកលេខ៥ មានវ័យ២៣ឆ្នាំ កញ្ញា សារី សុវត្តី ដែលធ្លាប់បានឈ្នះពានរង្វាន់ «ស្រស់សោភាបែបខ្មែរ Award» ពីវគ្គប្រកួតបឋម។
សម្រាប់ម្ចាស់ជយលាភី សារី សុវត្តី មិនចាត់ទុកថាក្មេងខ្ចីពេកនោះឡើយសម្រាប់បទពិសោធនៅក្នុងវិស័យសិល្បៈព្រោះកន្លងមកកញ្ញា ធ្លាប់ធ្វើជាពិធីការិនី និងជាតារាសម្ដែង។ យោងតាមការបញ្ជាក់ក្នុងហ្វេសប៊ុកម្ចាស់ជយលាភីប្រចាំឆ្នាំ២០២១ មានដើមកំណើតមកពីខេត្តក្រចេះ តែបច្ចុប្បន្នកំពុងតែរស់នៅភ្នំពេញរូបនេះ។
សារី សុវត្តី មិនត្រឹមតែមានមុខមាត់ស្អាត មានខួរក្បាលឆ្លាតវ័យ ថែមទាំងមានចំណេះដឹងខ្ពង់ខ្ពស់ ព្រោះសព្វថ្ងៃកញ្ញាគឺជាគ្រូបង្រៀនភាសាអង់គ្លេស និងជានិស្សិតសិក្សាថ្នាក់អនុបណ្ឌិតថែមទៀតផង។
គួរដឹងថាបវរកញ្ញាពិភពលោកកម្ពុជាឆ្នាំ២០២១ នេះមាន៖ ចំណាត់ថ្នាក់លេខ១ កញ្ញា សារី សុវត្តី (ស្លាកលេខ ៥) ចំណាត់ថ្នាក់លេខ២ កញ្ញា ស៊ីម ច័ន្ទស្រីមុំ (ស្លាកលេខ ១៦) ចំណាត់ថ្នាក់លេខ៣ អៀ លីនហ្សា (ស្លាកលេខ២០) ចំណាត់ថ្នាក់លេខ៤ ញឿន សុភ័ណ្ឌ (ស្លាកលេខ៨) និងចំណាត់ថ្នាក់លេខ៤ នូ រីតា (ស្លាកលេខ ១៧)៕