អ្នកដឹកនាំល្បីលោក កៅ សីហា កាលពីពេលថ្មីៗធ្លាប់បានបង្ហោះរូបភាពក្រុងពាលីថតរឿងបុរាណថ្មីមួយដែលប្រមូលផ្ដុំទៅដោយតារាប្រុសស្រីចាស់ក្មេងកំពុងពេញនិយម ប៉ុន្តែសុខៗ ស្រាប់តែលោកចេញមកបញ្ចេញកំហឹងលក្ខណៈឆេះដុំព្រោះតែមានតារាខ្លះលេងចរិតដាក់លោក។ នេះបើយោងតាមបង្ហោះរបស់លោកលើបណ្ដាញសង្គមហ្វេសប៊ុកកាលពីថ្ងៃព្រហស្បតិ៍ ទី១៤ ខែតុលា ឆ្នាំ២០២១ ម្សិលមិញនេះ។
បើមើលលើការរៀបរាប់ដ៏វែងអន្លាយរបស់អ្នកដឹកនាំរូបនេះបានបង្ហាញពីការមិនសប្បាយចិត្តនិងមិនពេញចិត្តជាខ្លាំងចំពោះតួអង្គខ្លះដែលសម្ដែងនិងថតឱ្យរឿងភាគរបស់លោក ព្រោះតែបញ្ហាឱ្យថ្ងៃថតជាន់គ្នា ដែលធ្វើឱ្យប៉ះពាល់ដល់ការងារថតរឿងរបស់លោកយ៉ាងខ្លាំង ទើបធ្វើឱ្យអ្នកដឹកនាំរឿងរូបនេះបង្ហូរបញ្ចេញកំហឹងតាមរយៈបណ្ដាញសង្គម ដើម្បីជាការព្រមានជៀសវាងមានបញ្ហាបែបនេះកើតឡើងជាបន្តទៀត។
«តួខ្លះ អាងខ្លួនថតហើយ ជាប់រ៉ាក់គ័រ គិតថាចង់កូរខ្ញុំបានតាមអំពើចិត្តមែន? ឬក៏ចង់ល្បីលើសពីជំនាញសម្ដែងកុន? មកឲ្យបញ្ជាឲ្យខ្ញុំរុះរើថ្ងៃថតដើម្បីតែអ្នកឯងម្នាក់ ហើយប៉ះពាល់គេម៉ារឿង យកលេសជ្រុលឲ្យថ្ងៃខាងគេ ខាងគេជួលទីតាំងថតសម្រាប់ខ្លួនអស់លុយច្រើន! ហើយចុះម៉េចខាងខ្ញុំ ទីតាំងថតfree freeមែន? ផ្ដាំឲ្យដូចសូត្រមេសូត្រ ថាមុនទទួលការងារអ្វីក៏ដោយ សូមឲ្យដំណឹងខាងខ្ញុំផង ជៀសវាងជាន់ថ្ងៃគ្នា ហើយជាក់ស្ដែងអាថ្មីៗនេះ គួរណាស់តែគិតថា ខាងខ្ញុំផ្អាកថតយូរក្រែលដែរហើយ ដោយសារសៀមរាប បិទខ្ទប់ និងភ្ជុំភ្ជរ ត្រូវយល់ថា ខាងខ្ញុំនឹងរៀបថ្ងៃចេញថតវិញហើយ ហើយខ្ញុំក៏តែងរំលឹកក្នុងគ្រុបទៀតថា មុនទទួលការងារផ្សេង ទម្លាក់ថ្ងៃឲ្យខាងគេ សូមប្រាប់ខ្ញុំមុនផង។ ទីបំផុតនៅតែកើតមាន ឬក៏អាងថាខ្លួនថតជាប់រ៉ាក់គ័រហើយ ធ្វើអីតាមអំពើចិត្ត? កុំភ្លេចណា ថា កុងត្រា ផ្ដិតមេដៃ មានត្រឹមត្រូវ! ឬក៏ខ្ញុំស្លូតពេក?»
ការលើកឡើងខាងលើរបស់លោកនេះ គឺជាការរំលឹក និងដាស់តឿនដើម្បីកុំឱ្យពេលក្រោយមានបញ្ហាដដែលជាដដែលនេះកើតឡើងជាបន្ត ព្រោះធ្វើឱ្យរាំងស្ទះដល់ដំណើរការការងារទាំងមូល។
បន្ទាប់ពីបញ្ចេញកំហឹងលើបណ្ដាញសង្គមរួច អ្នកគាំទ្រនិងមិត្តភក្ដិបានចូលមកខមមិន លើកទឹកចិត្ត និងផ្ដល់កម្លាំងចិត្តចំពោះលោក ដោយមានអ្នកខ្លះថែមទាំងពោលអាណិតអាសូរចំពោះលោកដែលត្រូវហត់ទាំងកាយ ទាំងចិត្ត និងខួរក្បាល ហើយអាចនិយាយបានថាការងារជាអ្នកដឹកនាំសម្ដែងរបស់លោកមិនមែនជាការងារមួយស្រួលៗ សប្បាយៗដូចការមើលឃើញពីខាងក្រៅនោះឡើយ៕
សារព័ត៌មានត្រយងបានទំនាក់ទំនងទៅកាន់លោកដើម្បីសុំការបកស្រាយចំពោះការលើកឡើងខាងលើរបស់លោក ប៉ុន្តែទំនាក់ទំនងទៅកាន់ទូរស័ព្ទលោកជាប់រវល់រហូត៕
